Sapta 38

Ating Jon i Sot Long Bilip?

INAP wanpela yia pinis Jon Bilong Baptais i stap kalabus. Na nau em i harim tok olsem Jisas i bin kirapim bek pikinini man bilong meri wanpis long Nain. Tasol Jon i laik save long as tru bilong ol wok Jisas i mekim. Olsem na em i salim tupela disaipel bilong em i go givim askim long Jisas, olsem: “Ating yu dispela man God i bin promis long salim i kam, o mipela i mas wetim narapela?”

Tupela yia bipo, Jon i baptaisim Jisas na em i lukim spirit bilong God i kam daun long Jisas, na em i harim maus bilong God i tok em i amamas long Jisas. Olsem na bilong wanem Jon i givim dispela askim long Jisas? Olsem wanem? Bilip bilong Jon i no strong moa? Nogat. Long wanem, taim ol i kam givim dispela askim long Jisas, Jisas i bin litimapim nem bilong Jon. Orait, bilong wanem Jon i mekim dispela askim?

Ating Jon i laik harim Jisas yet i tok, tru em i Krais. Dispela bai strongim Jon, long wanem em i stap kalabus. Tasol i gat bikpela samting moa Jon i laik save long en, olsem: Bai i gat narapela man i mas kam bihain long Jisas, olsem senis bilong em, bilong inapim olgeta samting ol profet i tok Krais bai mekim?

Jon em i save long ol tok profet bilong Baibel na em i save, Krais o man God i makim bilong helpim ol man, em bai mekim wok king na kisim bek ol man. Jisas i baptais inap planti mun pinis, tasol Jon i stap kalabus yet. Olsem na Jon i laik save, Jisas em i man bilong kamapim Kingdom bilong God wantaim strong bilong en long graun, o ol i mas wetim narapela man i kam bihain na em bai mekim olgeta samting ol profet i tok Krais i mas mekim taim em i kisim biknem.

Jisas i no tok stret long ol disaipel bilong Jon olsem: ‘Mi tasol mi dispela man! ’ Nogat. Tasol long dispela taim stret Jisas i kirap wokim planti mirakel, em i oraitim planti manmeri i gat kain kain sik. Na Jisas i tokim ol disaipel bilong Jon: “Yutupela go tokim Jon long ol samting nau yutupela i lukim na harim. Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas ol i harim toktok. Ol man i dai pinis, ol i kirap gen, na ol rabisman i harim gutnius.”

Olsem na ating Jon i mekim dispela askim long wanem em i laik save, Jisas bai mekim ol dispela wok tasol bilong helpim ol man, o em bai mekim sampela samting moa, olsem helpim Jon yet na bai em i lusim kalabus. Olsem na nau Jisas i tokim Jon, em i no ken wetim Jisas i mekim sampela samting moa.

Ol disaipel bilong Jon i go pinis, na bihain Jisas i tokim ol manmeri long Jon. Jisas i tok, Jon em i dispela “man bilong autim tok” bilong Jehova, em Malakai 3:1 i bin tok profet long em, na Jon em dispela man profet Elaija i makim, olsem Malakai 4:5 na 6 i tok long em. Olsem na Jisas i litimapim nem bilong Jon na i tok, Jon em i wankain olsem olgeta profet i kamap paslain long em. Jisas i tok olsem: “Mi tok tru long yupela, Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.”

Jisas i tok, man i liklik long Kingdom bilong heven, em i winim Jon, na dispela tok i makim olsem bai Jon i no i stap long Kingdom bilong heven. Jon i redim rot bilong Jisas, tasol em i dai paslain long taim Jisas i wokim kontrak wantaim ol disaipel bilong em long mekim wok king wantaim em long Kingdom. Olsem na Jisas i tok, bai Jon i no i stap long Kingdom bilong heven. Jon bai stap long graun aninit long Kingdom bilong God. Luk 7:18-30; Matyu 11:2-15.

▪ Bilong wanem Jon i laik save Jisas em i ‘dispela man i mas kam’ o ol “i mas wetim narapela”?

▪ Jisas i kolim wanem ol tok profet i makim Jon?

▪ Bilong wanem Jon bai i no i stap long heven wantaim Jisas?