Sapta 54

“Bret Tru Bilong Heven”

JISAS i bin mekim planti samting long asde. Em i bin givim kaikai long planti tausen manmeri, na ol i laik mekim em i kamap king bilong ol, tasol em i lusim ol na i go. Long nait em i bin wokabaut antap long wara. Na taim Pita i wokabaut antap long wara na em i laik i go daun insait long wara, Jisas i helpim em; na em i mekim dai win bambai bot bilong ol disaipel i no ken bagarap.

Dispela bikpela lain em Jisas i bin givim kaikai long ol long hap bilong raunwara Galili, ol i kam painim Jisas long Kaperneam, na ol i tokim em: “Tisa, yu kam hia long wanem taim?” Jisas i krosim ol na i tok ol i no ken wok long painim kaikai i save bagarap; ol i mas wok long painim dispela kaikai em inap helpim man long i stap oltaim. Olsem na ol i askim Jisas: “Mipela i mas mekim wanem na mipela i ken mekim wok bilong God?”

Jisas i kolim wanpela bikpela samting ol i mas mekim, olsem: “Yupela i mas bilip long dispela man, God i bin salim em i kam.”

Jisas i bin wokim planti mirakel, tasol ol manmeri i no bilip long em na ol i askim em: “Bai yu wokim wanem mirakel olsem mak bilong mipela i ken lukim na mipela i ken bilipim tok bilong yu? Ol tumbuna bilong mipela i bin kaikai mana long ples nating, olsem tok i stap long buk bilong God, ‘Em i givim bret bilong heven long ol manmeri na ol i kaikai.’ Tasol bai yu wokim wanem kain mirakel?”

Ol i laik lukim wanpela mak, olsem na Jisas i kamapim long ples klia as bilong ol dispela mak. Em i tok: “Tru tumas mi tokim yupela, i no Moses i bin givim bret bilong heven long yupela. Nogat. Papa bilong mi em i save givim bret tru bilong heven long yupela. Dispela bret God i givim, em i lusim heven na i kam daun na i givim laip long ol manmeri bilong graun.”

Ol i tokim em: “Bikman, yu mas givim dispela bret long mipela oltaim.”

Na Jisas i bekim tok long ol, olsem: “Mi yet mi bret bilong laip. Man i kam long mi, em bai i no hangre moa. Na man i bilip long mi, em bai i no i dai moa long dring wara. Mi bin tokim yupela, yupela i lukim mi pinis, tasol yupela i no bilip. . . . Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa, . . . em i olsem: Mi no ken lusim wanpela bilong ol manmeri em i givim mi pinis. Nogat. Mi mas kirapim ol long las de. Laik bilong Papa bilong mi em i olsem: Olgeta man i lukim Pikinini na i bilip long em, ol bai i kisim laip i stap gut oltaim oltaim.”

Ol Juda i bel nogut long Jisas, long wanem em i tok, “Mi yet, mi dispela bret i bin lusim heven na i kam daun.” Ol i tingim Jisas em i pikinini bilong wanpela man na meri long graun; ol i gat wankain tingting long em olsem ol Nasaret, na ol i kros na i tok: “Dispela man em Jisas, pikinini bilong Josep. . . . Orait olsem wanem na nau em i tok, ‘Mi bin lusim heven na mi kam daun’?”

Jisas i tokim ol: “Yupela i no ken toktok planti namel long yupela yet. Papa i bin salim mi na mi kam. Na i no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi. Na long las de bai mi kirapim em long matmat. . . . olgeta manmeri i harim tok bilong Papa na i kisim save long em, ol i save kam long mi. I no gat wanpela man i bin lukim Papa. Nogat. Dispela man i bin i stap wantaim God na i kam, em tasol i bin lukim Papa. Tru tumas mi tokim yupela, man i bilip long mi, em i gat laip i stap gut oltaim.”

Jisas i tok moa, olsem: “Mi yet, mi bret bilong laip. Ol dispela tumbuna bilong yupela ol i kaikai mana long ples nating, ol i dai pinis. Tasol dispela bret i lusim heven na i kam daun, em i bilong ol manmeri i ken kaikai na bai ol i no inap i dai. Mi dispela bret i gat laip na i lusim heven na i kam daun. Sapos wanpela man i kaikai dispela bret, em bai i gat laip i stap oltaim.” Sapos ol man i bilip long Jisas, em dispela Man God i bin salim i kam, bai ol inap kisim laip oltaim. Sapos man i kaikai mana o narapela kain bret, em i no inap kisim dispela gutpela samting!

Ating Jisas i bin kirap toktok wantaim ol manmeri long bret bilong heven taim em i stap klostu long Kaperneam na ol i kam painim em. Orait Jisas i toktok wantaim ol i go moa, na bihain, taim em i skulim ol manmeri long haus lotu long Kaperneam em i pinisim dispela stori. Jon 6:​25-51, 59; Buk Song 78:24; Aisaia 54:13; Matyu 13:​55-57.

▪ Wanem ol samting i bin kamap na nau Jisas i stori long bret i kam long heven?

▪ Bilong wanem i no stret ol manmeri i askim Jisas long wokim wanpela mak?

▪ Taim Jisas i tok em i bret tru i kam long heven, bilong wanem ol Juda i bel nogut long dispela tok?

▪ Jisas i stap we na em i stori long bret i kam long heven?