Sapta 30

Em i Bekim Tok Long Ol Birua

OL HETMAN bilong lotu Juda i sutim tok long Jisas na i tok em i kalapim lo bilong Sabat. Jisas i bekim tok long ol: “Papa bilong mi em i save wok oltaim i kam inap long nau. Na mi tu mi save wok.”

Ol dispela Farisi i tok, lo bilong Sabat i tambuim dispela wok Jisas i mekim, tasol lo bilong Sabat i no tambuim dispela kain wok. God yet i givim wok long Jisas bilong autim tok na oraitim sik bilong ol man, na em i mekim dispela wok long olgeta de. Tasol ol dispela Juda i belhat moa yet long tok Jisas i bekim long ol, na ol i wok long painim rot bilong kilim em i dai. Bilong wanem ol i laik kilim em i dai?

Long wanem ol i ting Jisas i kalapim lo bilong Sabat na i no dispela samting tasol​—ol i ting Jisas i tok bilas long God, long wanem em i tok em i Pikinini bilong God. Tasol Jisas i no pret. Em i kamapim sampela tok moa olsem God em i Papa bilong em. Em i tok: “Papa i laikim tumas Pikinini na i save soim em olgeta samting em yet i save mekim.”

Na Jisas i tok: “Papa i save kirapim bek ol man i dai pinis na i givim laip long ol. Na olsem tasol Pikinini tu i save givim laip long ol man.” Tru tumas, Jisas i kirap pinis long kirapim bek ol man i olsem ol i dai long spirit! Jisas i tok: “Man i harim tok bilong mi, na i bilip long Papa, em i bin salim mi na mi kam, em i . . . lusim dai pinis, na nau em i stap laip.” Na em i tok: “Taim i laik kamap, na nau i kamap pinis, na ol manmeri i dai pinis bai i harim maus bilong Pikinini Bilong God. Na ol manmeri i harim, ol bai i kisim laip.”

Inap long taim Jisas i mekim dispela tok, Baibel i no stori olsem Jisas i bin kirapim bek wanpela man i dai pinis. Tasol em i tokim ol dispela birua bilong em: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”

Paslain long dispela taim Jisas i no bin tokaut long bikpela wok em i kisim bilong kamapim laik bilong God. Tasol Jon i bin tokaut long dispela. Jisas i tok: “Bipo yupela i bin salim ol man i go long Jon [na] . . . Jon i bin tokaut long tok i tru.”

Tupela yia paslain long dispela taim, Jon Bilong Baptais i bin tokim ol dispela hetman bilong lotu Juda long dispela Man i mas kam bihain long em. Nau Jon i stap kalabus, tasol bipo ol i save amamas long Jon, na Jisas i tok: “Jon em i bin i stap olsem lam i lait na i givim lait long ol man. Na long sotpela taim bel bilong yupela i bin amamas long lait bilong em.” Jisas i laik kirapim tingting bilong ol bambai ol i ken bilip long em na em i ken kisim bek ol. Tasol sapos Jon i no bin tokaut, i gat narapela rot bilong helpim ol na bai ol i ken bilip long Jisas.

Jisas i tok: “Olgeta wok Papa i bin givim long mi bilong mekim . . . i tokaut gut long ol manmeri olsem, Papa i bin salim mi na mi kam.” Na em i tok: “Papa . . . yet i tokaut long mi.” God i bin tokaut long Jisas long taim Jisas i kisim baptais, God i tok: “Dispela em i Pikinini bilong mi. Mi laikim em tumas.”

I no gat as na ol dispela hetman i sakim em. Ol i tok ol i save kaunim na skelim ol tok bilong Baibel, tasol Baibel yet i tokaut long Jisas! Olsem na Jisas i tok: “Sapos yupela i bilipim tok bilong Moses, orait bai yupela i bilipim tok bilong mi tu, long wanem, ol tok em i bin raitim i tokaut long mi. Tasol sapos yupela i no bilipim tok em i bin raitim, orait olsem wanem bai yupela i bilipim tok bilong mi?” Jon 5:17-47; 1:19-27; Matyu 3:17.

▪ Bilong wanem wok Jisas i mekim i no kalapim lo bilong Sabat?

▪ Jisas i tok wanem long bikpela wok em i kisim bilong kamapim laik bilong God?

▪ Bilong soim ol em i Pikinini bilong God, Jisas i tok husat i bin tokaut long em?