Sapta 74

Em i Givim Tok Long Marta, na Lainim Ol Long Beten

TAIM Jisas i autim tok long hap bilong Judia, em i go long liklik ples Betani. Marta na Maria na brata bilong ol, em Lasarus, ol i stap long dispela ples. Ating Jisas i bin bungim ol inap olsem 3-pela yia i go pinis na ol i kamap gutpela pren bilong em. Nau Jisas i go long haus bilong ol, na Marta i amamas long lukim Jisas.

Marta i laik mekim gut long Jisas, em dispela man God i bin tok promis long salim i kam. Olsem na Marta i redim gutpela kaikai bilong Jisas, na em i mekim ol samting bilong lukautim gut Jisas.

Tasol Maria i sindaun klostu long lek bilong Jisas na i harim tok bilong em. Bihain liklik, Marta i go long Jisas na tokim em: “Bikpela, susa bilong mi em i lusim mi na mi wanpela tasol mi wok long redim kaikai. . . . Yu tokim em long kam helpim mi.”

Tasol Jisas i no mekim. Em i givim sampela tok long Marta, long wanem Marta i tingim tumas ol samting bilong skin. Jisas i tok isi na i tok: “Marta, Marta, yu wok long tingting planti na yu wari long planti samting. Yu mas tingting long wanpela samting tasol.” Jisas i laik tok, Marta i no ken lusim bikpela hap taim tumas long redim kain kain kaikai.

Marta i laik mekim gutpela pasin long Jisas. Tasol em i tingim tumas ol samting bilong skin, na taim Pikinini Bilong God i wok long lainim ol narapela, Marta i no sindaun harim ol tok bilong em. Olsem na Jisas i tok: “Dispela samting Maria i laik kisim, em i gutpela samting tru, olsem na yumi no ken tekewe dispela gutpela samting long em.”

Bihain, long narapela taim, wanpela disaipel i askim Jisas: “Bikpela, yu skulim mipela long mekim [beten], olsem bipo Jon i bin skulim ol disaipel bilong em.” Inap olsem wanpela yia hap bipo, Jisas i stap long maunten na i lainim ol manmeri long pasin bilong beten, tasol ating dispela disaipel i no bin i stap long dispela taim. Olsem na Jisas i tokim em long ol tok em i bin givim long ol, na em i mekim wanpela tok piksa long yumi mas beten oltaim.

Jisas i tok: “Sapos wanpela man . . . i gat wanpela pren, na long biknait tru em i go na i tokim dispela pren olsem, ‘Pren, mi laik yu givim mi tripela bret. Wanpela wantok bilong mi em i wokabaut long rot na i kam kamap long haus bilong mi, na mi no gat kaikai bilong givim em.’ Na sapos dispela man i . . . bekim tok olsem, ‘Yu no ken givim hatwok long mi. Dua i pas pinis, na mi wantaim ol pikinini bilong mi, mipela i slip pinis. Mi no inap kirap na givim ol samting long yu.’ Orait olsem wanem? Mi tokim yupela, papa bilong haus bai i kirap na givim pren bilong en olgeta samting em i sot long en. Tru, em bai i no ting olsem em i laik helpim pren bilong en, . . . Em bai i les tasol long harim pren i singaut planti, na em bai i kirap na givim ol samting long em.”

Jisas i no laik tok God Jehova i les long helpim ol man i singaut long em, olsem papa bilong haus i mekim long pren bilong em long tok piksa. Jisas i laik tok, sapos yu wok long singaut singaut long Papa bilong yumi long heven, bai em i helpim yu. Olsem na Jisas i tok: “Yupela i mas [wok long] askim God long givim ol samting long yupela, na em bai i givim long yupela. Yupela i mas wok long painim samting, na bai yupela i lukim. Yupela i mas paitim dua, na God bai i opim long yupela. Olgeta man i [wok long singaut] long God, ol i save kisim ol samting.”

Nau Jisas i stori long ol papa long graun na em i tok: “Sapos pikinini bilong wanpela bilong yupela em i askim papa long givim wanpela pis long em, ating papa bai i givim em wanpela snek nogut, a? Nogat. Na sapos pikinini i askim papa long givim em wanpela kiau, ating papa bai i givim em wanpela binatang nogut, a? Em tu nogat. Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” Jisas i mekim gutpela tok tru bilong kirapim yumi long beten long olgeta taim. Luk 10:​38–11:13.

▪ Bilong wanem Marta i mekim bikpela wok bilong redim kaikai samting bilong Jisas?

▪ Maria i mekim wanem? Bilong wanem Jisas i mekim gutpela tok long Maria, tasol em i no mekim olsem long Marta?

▪ Wanem samting i kamap na Jisas i mas stori gen long pasin bilong beten?

▪ Jisas i tok wanem na yumi save yumi mas beten oltaim?