Sapta 103

Em i Go Bek Gen Long Tempel

JISAS wantaim ol disaipel i bin lusim Jeriko na ol i slip 3-pela nait pinis long Betani. Nau em i tulait long Mande, Nisan 10, na ol i wokabaut long rot i go long Jerusalem. Jisas i hangre, olsem na taim em i lukim wanpela diwai fik i gat lip, em i go long en bilong kisim sampela fik na kaikai.

Em mun Mas na i no taim bilong ol diwai fik i putim lip na karim kaikai​—taim bilong en em Jun. Tasol ating Jisas i ting olsem ol lip i kamap pinis na i mas i gat sampela kaikai tu i stap. Tasol nogat. Olsem na Jisas i tokim diwai: “Yu no ken karim kaikai moa.” Long de bihain ol disaipel i save long samting i painim dispela diwai, na long as bilong samting Jisas i mekim long diwai.

Orait ol i wokabaut i go na ol i kamap long Jerusalem, na Jisas i go insait long tempel. Asde long apinun em i bin i go insait long en na lukim ol samting. Tasol nau em i kirap mekim wankain samting olsem em i bin mekim 3-pela yia bipo, taim em i kam long Pasova bilong yia 30. Em i kirap rausim ol man i wok bisnis long tempel, na em i kapsaitim tebol bilong ol man bilong senisim mani, na sia bilong ol man i wok bisnis long ol pisin. Na em i tambuim ol long karim ol samting i go i kam insait long tempel.

Jisas i krosim ol dispela man na em i tokim ol: “Buk bilong God i gat tok olsem, ‘Haus bilong mi bai i stap haus bilong ol manmeri bilong olgeta kantri i ken i kam long en na beten long mi.’ Tasol yupela i mekim em i kamap olsem ples hait bilong ol stilman.” Jisas i tok ol i stilman, long wanem ol i pulim bikpela mani long ol man i mas baim ol animal samting long ol bilong mekim ofa.

Ol bikpris wantaim ol saveman bilong lo ol i harim stori bilong dispela samting Jisas i mekim na ol i kirap gen long painim rot bilong kilim em i dai. Olsem na ol i kamapim bel bilong ol, olsem ol i no inap tru long tanim bel. Tasol ol i no save long rot bilong kilim Jisas i dai, long wanem olgeta manmeri i wok long i kam bung long em bilong harim ol tok bilong em.

I no ol Juda tasol i kam long Pasova​—ol man bilong ol narapela lain tu ol i kam, em ol i save bihainim lotu Juda. Sampela Grik namel long ol i kam tokim Filip, ol i laik lukim Jisas. Orait Filip i go askim Andru; ating em i laik save, i stret ol i ken i go lukim Jisas o nogat. Jisas i stap yet long tempel, na long dispela hap em i stap long en ol Grik inap i go lukim em.

Jisas i save, i no gat planti de moa na bai ol i kilim em i dai, olsem na em i tok: “Taim bilong Pikinini Bilong Man i laik kisim biknem, em i kamap pinis nau. . . . sapos pikinini wit i no pundaun long graun na i dai, orait em wanpela tasol bai i stap. Tasol sapos em i dai, orait em bai i kamap na karim planti kaikai.”

Wanpela pikinini wit i olsem samting nating. Tasol sapos ol i planim long graun, em “i dai,” olsem em i pinis long i stap pikinini bilong wit. Nau em i putim kru na i kamap wanpela stik bilong wit, na bihain em i karim planti pikinini wit. Em nau, dispela wanpela pikinini wit i no samting nating, a? Na Jisas tu em i wanpela man tasol, i nambawan olgeta. Tasol sapos em i stap gut long God na em i dai, em i kamap olsem rot bilong givim laip oltaim long ol man i stap gut long God na ol i daunim laik bilong ol yet olsem Jisas i mekim. Olsem na Jisas i tok: “Sapos wanpela man i laikim tumas laip bilong em yet, laip bilong en bai i lus. Tasol sapos wanpela man i givim baksait long laip bilong en long dispela graun, orait em bai i holimpas laip bilong en inap oltaim oltaim.”

Yumi save Jisas i no tingim em yet tasol, long wanem nau em i tok: “Sapos wanpela man i mekim wok bilong mi, em i mas bihainim mi. Na long ples mi stap long en, wokman bilong mi tu bai i stap wantaim mi. Sapos man i mekim wok bilong mi, orait Papa bai i givim biknem long em.” Em nau, ol dispela man i bihainim Jisas na mekim wok bilong em, bai ol i kisim gutpela prais tru! Papa bai givim biknem long ol na bai ol i stap wantaim Jisas long Kingdom.

Jisas i tingim bikpela pen tru liklik taim em bai kisim, na ol bai kilim em i dai. Olsem na em i tok: “Nau bel bilong mi i hevi na mi tingting planti. Na bai mi tok wanem? Ating bai mi tok, ‘Papa, yu ken tekewe dispela samting i laik kamap long mi nau’?” Sapos em inap abrusim dispela samting, em bai gutpela. Tasol nogat. Olsem na em i tok: “Dispela taim bilong hevi i mas kamap long mi. Long dispela as tasol mi kam.” Jisas i wanbel wantaim olgeta samting God i laik mekim long rot bilong em, na i dai bilong em tu. Matyu 21:​12, 13, 18, 19; Mak 11:​12-18; Luk 19:​45-48; Jon 12:​20-27.

▪ I gat wanem as na Jisas i ting em bai painim sampela kaikai long diwai fik, tasol i no taim bilong en?

▪ Bilong wanem Jisas i tok, ol man i wok bisnis long tempel ol i “stilman”?

▪ Olsem wanem Jisas i kain olsem wanpela pikinini wit ol i planim long graun na i dai?

▪ Jisas i ting olsem wanem long bikpela pen em i mas karim na ol bai i kilim em i dai?