Sapta 65

Em i Hait i Go Long Jerusalem

LONG Pasova bilong yia 31 ol Juda i bin painim rot long kilim i dai Jisas, olsem na bihain em i autim tok long hap bilong Galili tasol. Nau em mun Oktoba samting long yia 32 na Ol Bikpela De Bilong I Stap Long Haus Win i kam klostu. Insait long dispela yia i go pinis, ating Jisas i bin i go 3-pela taim tasol long Jerusalem long 3-pela bikpela bung bilong lotu Juda.

Ol brata bilong Jisas i tokim em, ‘Yu mas go long Judia. Sapos wanpela man i laik bai ol man i save long em, em i no save mekim wok long ples hait.’ Ol i tok olsem, long wanem, Jerusalem em i namba wan biktaun bilong Judia, na em i as ples bilong lotu Juda.

Jems na Saimon na Josep na Judas, ol i no bilip olsem bikbrata bilong ol em i Man bilong kisim bek ol man, tasol ol i laik bai Jisas i wokim ol mirakel long ai bilong ol manmeri i kam long dispela bikpela bung. Tasol Jisas i save, sapos em i mekim olsem, bagarap inap painim em, olsem na em i tok: “Ol manmeri bilong graun ol i no inap birua long yupela. Tasol ol i birua long mi, long wanem, mi save autim tok long ol pasin nogut ol i save mekim.” Olsem na Jisas i tokim ol brata bilong em: “Yupela go long ol dispela bikpela de bilong lotu long Jerusalem. Mi, bai mi no inap i go, long wanem, taim bilong mi em i no kamap yet.”

Dispela bikpela bung em inap 7-pela de olgeta. Em i kamap long taim bilong kisim ol kaikai bilong gaden, na em i taim bilong amamas na tok tenkyu. Long namba 8 de, ol i mekim sampela pasin bilong lotu bilong pasim dispela bung. Ol brata bilong Jisas i go wantaim ol narapela long Jerusalem, na sampela de bihain Jisas wantaim ol disaipel ol i hait na i go, nogut ol man i luksave long ol. Ol i no bihainim rot klostu long wara Jordan, em planti man i save bihainim; ol i bihainim rot i go long hap bilong Samaria.

Jisas na lain bilong em ol i mas painim ples slip long wanpela ples bilong ol Samaria. Tasol ol Samaria i harim olsem Jisas i laik i go long Jerusalem, olsem na ol i no laik helpim em. Jems na Jon i bel nogut, na ol i tok: “Bikpela, yu laik bai mipela i singautim paia i kam daun long heven na i kukim ol dispela man?” Tasol Jisas i krosim tupela long dispela tok tupela i mekim, na ol i wokabaut i go long narapela ples.

Ol i wokabaut i go na wanpela saveman bilong lo i kam tokim Jisas: “Tisa, olgeta ples yu go long en, bai mi bihainim yu i go.”

Jisas i tok: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” Jisas i laik tokim dispela man, sapos em i laik bihainim Jisas, bai em i gat hatwok. Tasol dispela man i gat pasin antap na em i no laik lusim gutpela sindaun bilong em.

Jisas i tokim narapela man: “Yu kam bihainim mi.”

Tasol dispela man i tok: “Bikman, larim mi i go planim papa bilong mi pastaim.”

Na Jisas i tokim em: “Maski. Ol man i dai pinis, ol i ken planim ol lain bilong ol yet. Tasol yu go autim tok bilong kingdom bilong God.” Yumi save, papa bilong dispela man i no i dai yet, long wanem sapos em i dai pinis, dispela man i no inap i stap na toktok wantaim Jisas. Dispela man i laik i go bek long ples na wet inap long taim papa bilong em i dai. Em i no laik tingim Kingdom bilong God pastaim.

Ol i wokabaut i go moa long rot na narapela man i tokim Jisas: “Bikpela, mi laik bihainim yu. Tasol inap yu larim mi i go pastaim na bai mi ken tok gutbai long ol lain bilong mi? ”

Jisas i tokim em: “Man i holim stia, tasol oltaim em i lukluk i go long baksait, em i no inap long mekim wok bilong kingdom bilong God.” Ol man i laik kamap disaipel bilong Jisas, ol i mas tingim wok bilong Kingdom pastaim. Sapos man i “lukluk i go long baksait,” olsem em i tingim ol samting bilong dispela graun na em i no givim bel long Kingdom, bai em i lusim rot i go long laip. Jon 7:​2-10; Luk 9:​51-62; Matyu 8:​19-22.

▪ Kolim nem bilong ol brata bilong Jisas. Ol i ting olsem wanem long em?

▪ Bilong wanem ol Samaria i no mekim gutpela pasin long Jisas na lain bilong em? Jems na Jon i laik mekim wanem?

▪ Taim ol i wokabaut long rot, Jisas i toktok wantaim 3-pela man long wanem samting? Em i tok wanem na bai man i ken save em i mas lusim sampela samting bilong em bambai em i ken mekim wok bilong God?