Sapta 129

Em i Kamap Gen Long Ai Bilong Ol

OL DISAIPEL i bel hevi yet. Ol i lukim matmat i stap nating, tasol ol i no save Jisas i kirap bek. Ol i no bilipim tok bilong ol meri. Olsem na bihain liklik, long Sande yet, Kliopas wantaim narapela disaipel i lusim Jerusalem na wokabaut i go long Emeus, em longwe inap 11-pela kilomita.

Long rot tupela i wok long toktok long olgeta samting i bin kamap, na wanpela man i kam klostu na wokabaut wantaim tupela. Em i tok, ‘Yutupela i toktok long wanem samting?’

Tupela i sanap na pes bilong tupela i soim olsem tupela i bel sori tru. Kliopas i tok: “Ating yu wanpela tasol yu no save long ol samting i bin kamap long Jerusalem long dispela taim?” Dispela man i tok: “Wanem samting?”

Tupela i tokim em olsem, ‘Mipela i tok long dispela ol samting i bin kamap long Jisas bilong Nasaret, em ol bikpris na ol hetman i bin putim em long han bilong gavman na ol i kilim em i dai.’ Na tupela i tok: “Pastaim mipela i bin bilip olsem, Jisas em dispela man God i makim bilong kisim bek ol manmeri bilong Israel.”

Na tupela i stori long ol samting i bin kamap em ol i kirap nogut long en na ol i no save long as bilong en, olsem ol meri i tok ol i bin lukim ol ensel, na matmat i stap nating. Nau dispela man i tokim tupela: “Yutupela i no gat tingting na bel bilong yutupela i no kirap kwik long bilipim olgeta tok ol profet i bin mekim. . . . Ating yutupela i no save, dispela man . . . bilong kisim bek ol manmeri bilong [God], em i mas karim pen pastaim na bihain em bai i kisim bikpela namba tru long God?” Na em i kirap long skulim tupela long as bilong sampela tok long buk bilong God i stori olsem.

Ol i kamap klostu long Emeus na dispela man i mekim olsem em i laik i go moa. Tasol tupela i laik harim sampela tok moa, olsem na tupela i tok: “Yu stap wantaim mitupela. . . . liklik taim bai tudak i kamap.” Olsem na em i go insait long haus wantaim tupela. Bihain ol i laik kaikai na em i kisim bret na i tenkyu long God, na i brukim, na i givim long tupela. Nau tupela i luksave olsem em Jisas tasol, em i tanim i kamap man. Na wantu em i lus nating na ol i no lukim em moa.

Nau tupela i save olsem wanem dispela man i gat bikpela save olsem! Long rot em i bin “autim as tingting bilong buk bilong God” long tupela na bel bilong tupela i kirap tru. Kwiktaim tupela i go bek long Jerusalem, na ol i lukim ol aposel na sampela moa ol i bung i stap. Tupela i no stori yet na ol narapela i kirap tokim tupela: “Tru tumas, Bikpela i kirap bek! Saimon i lukim em pinis!” Nau tupela i stori long Jisas i bin kamap long tupela tu. Em namba 4 taim Jisas i bin kamap long ai bilong sampela disaipel long dispela san.

Wantu Jisas i kamap long ai bilong ol long namba 5 taim. Ol disaipel i pret long ol Juda na ol i lokim pinis ol dua, tasol Jisas i kam sanap namel long ol. Em i tokim ol: “Bel bilong yupela i ken i stap isi.” Ol i kirap nogut na ol i pret. Ol i ting ol i lukim wanpela spirit. Tasol Jisas i tokim ol: “Bilong wanem yupela i tingting planti? Lukim han na lek bilong mi. Mi yet mi stap. Holim skin bilong mi, na lukim. Ol [spirit] i no gat mit na bun olsem yupela i lukim i stap long mi.” Tasol ol i no bilip yet.

Bilong helpim ol long save, tru em i Jisas, em i tokim ol: “Ating yupela i gat sampela kaikai i stap hia?” Ol i bin kukim pis na ol i givim hap pis long em na em i kaikai. Na em i tokim ol: “Taim mi stap yet wantaim yupela, mi bin tokim yupela pinis olsem, olgeta samting bipo ol i raitim long mi long lo bilong Moses na long buk bilong ol profet na long Buk Song, dispela olgeta samting i mas kamap tru.”

Nau Jisas i skulim ol long tok bilong Baibel, em i tok: “Buk bilong God i gat tok olsem, man God i makim bilong kisim bek ol manmeri bilong en, em i mas karim pen, na long de namba 3 em i mas kirap bek long matmat. Na long nem bilong em bai ol i mas autim tok long olgeta lain manmeri, bai ol i ken tanim bel, na bai God i lusim ol sin bilong ol. Yupela i mas statim dispela wok long Jerusalem, na yupela i mas autim tok long ol dispela samting i bin kamap.”

Em Sande long apinun, na long dispela taim Tomas i no i stap wantaim ol. Olsem na bihain ol narapela i wok long amamas na tokim em: “Mipela i lukim Bikpela pinis.”

Tomas i tok: “Sapos mi no putim pinga bilong mi i go long mak bilong ol nil, na sapos mi no putim han bilong mi i go long sait bilong en, orait mi no ken bilip. Nogat tru.”

Bihain long 7-pela de, olsem long namba 8 de, ol disaipel i stap insait gen na Tomas tu i stap. Ol i lokim olgeta dua pinis, tasol Jisas i kam sanap gen namel long ol na em i tok: “Bel bilong yupela i ken i stap isi.” Orait na em i tokim Tomas: “Yu kam putim pinga bilong yu hia, na yu lukim han bilong mi. Na yu putim han bilong yu i kam stret long sait bilong mi. Maski long tubel long bilip. Yu mas bilip tasol.”

Tomas i tok: “Yu Bikpela bilong mi. Yu God bilong mi.”

Jisas i tok: “Yu lukim mi pinis na yu bilip, a? Ol man i no lukim mi na ol i bilip, ol dispela man i ken amamas.” Luk 24:​11, 13-48; Jon 20:​19-29.

▪ Wanpela man i givim wanem ol askim long tupela disaipel long rot i go long Emeus?

▪ Dispela man i givim wanem tok long tupela na bel bilong tupela i kirap tru?

▪ Olsem wanem tupela i luksave long dispela man?

▪ Taim tupela i go bek long Jerusalem, ol i harim wanem gutpela tok?

▪ Jisas i kamap long ai bilong ol disaipel long wanem taim, em namba 5 taim? Wanem samting i kamap long dispela taim?

▪ Long 7-pela de bihain, wanem samting i kamap na nau Tomas i bilip tru olsem Jisas i kirap bek pinis?