Sapta 19

Em i Lainim Wanpela Meri Bilong Samaria

JISAS wantaim ol disaipel i lusim Judia na wokabaut i go long Galili na ol i brukim hap bilong Samaria. Skin bilong ol i les na ol i sindaun malolo long wanpela hul wara klostu long taun Sikar. Planti handet yia bipo Jekop i bin wokim dispela hul bilong kisim wara, na hul i stap yet klostu long taun Nablus bilong nau.

Jisas i sindaun klostu long hul wara na ol disaipel i go long taun bilong baim kaikai. Wanpela meri bilong Samaria i kam bilong pulimapim wara. Jisas i tokim em: “Wara i kam. Mi laik dring.”

Ol Juda i no save poromanim ol Samaria; ol i tingting nogut long ol dispela man bilong narapela lain. Olsem na dispela meri i kirap nogut na em i tok: “Yu Juda, na mi meri bilong Samaria. Olsem wanem na yu tok, ‘Wara i kam, mi laik dring’?”

Jisas i tokim em: “Sapos yu save long dispela man i tokim yu, ‘Wara i kam, mi laik dring,’ orait bai yu tokim em, na em bai i givim yu wara i gat laip.”

Meri i tok: “Bikman, yu no gat baket, na dispela hul wara em i daun moa. Olsem na dispela wara i gat laip, bai yu kisim we? Tumbuna bilong yumi Jekop em i givim dispela hul wara long mipela. Na em yet wantaim ol pikinini bilong en na ol bulmakau sipsip samting bilong en, olgeta i bin dring long dispela hul wara. Ating yu winim Jekop, a?”

Jisas i tok: “Olgeta man i dring long dispela wara hia, nek bilong ol bai i drai gen. Tasol . . . man i dring long dispela wara mi laik givim em, i no gat wanpela taim nek bilong en bai i drai gen.” Dispela wara bai kamap olsem ‘hul wara insait long man na i kamap kamap oltaim na givim laip i stap oltaim long em.’

Meri i tok: “Bikman, givim dispela wara long mi. Na bihain nek bilong mi i no ken drai moa, na mi no ken i kam hia bilong pulimapim wara.”

Nau Jisas i tok: “Yu go singautim man bilong yu pastaim.”

Meri i tok: “Mi no gat man.”

Jisas i tok: “Yu tok tru tumas, long wanem, bipo yu gat 5-pela man. Na dispela man nau yu stap wantaim em, em i no man bilong yu.”

Meri i kirap nogut na em i tok: “Bikman, nau mi save, yu wanpela profet.” Meri i gat laik long lotuim God, olsem na em i tok: “Ol tumbuna bilong mipela ol i save bung long dispela maunten [Gerisim] na mekim lotu. Tasol yupela Juda i save tok, ples ol man i mas i go long en na mekim lotu, em i stap long Jerusalem tasol.”

Tasol olsem Jisas i tok, ol man i lotu we, em i no bikpela samting. Jisas i tok: “God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.”

Meri i pilim tru dispela tok na em i tok: “Mi save, Mesaia bai i kam, em dispela man God i makim bilong kisim bek ol manmeri bilong en. Taim em i kam, em bai i tokim yumi long olgeta samting.”

Jisas i tokim em, “Em mi tasol, nau mi toktok wantaim yu.” Ating dispela meri i sem long pasin bilong em, olsem na em i kam long 12 klok belo bilong pulimapim wara, long wanem ol narapela meri i no save kam long dispela taim. Tasol olaman! Jisas i mekim gut tru long em​—Jisas i tokaut klia long em long samting em i no bin tokim narapela man long en. Orait, nau wanem samting i kamap?

Planti Samaria i Bilip

Taim ol disaipel i kam bek ol i lukim Jisas i sindaun yet long arere bilong dispela hul wara na em i toktok wantaim dispela meri bilong Samaria. Taim ol i kam kamap, dispela meri i lusim baket bilong em, na em i go bek long taun.

Meri i tingim tru ol tok bilong Jisas na em i go tokim ol man: “Yupela kam lukim wanpela man. Em i tokim mi long olgeta samting mi bin mekim bipo.” Na bilong kirapim tingting bilong ol bambai ol i laik save long Jisas, meri i tok: “Ating em dispela man tasol God i bin promis long salim em i kam?” Em nau, ol i kirap i go lukim Jisas.

Ol disaipel i wok long tokim Jisas, em i mas kisim sampela kaikai ol i bin kisim i kam. Tasol Jisas i tokim ol: “Mi gat kaikai yupela i no save long en.”

Ol disaipel i toktok namel long ol yet, olsem: “Ating wanpela man i bringim kaikai i kam givim em?” Jisas i tokim ol: “Kaikai bilong mi, em long bihainim laik bilong God. Em i bin salim mi na mi kam, na mi mas pinisim wok bilong em. Yupela i save tok olsem, ‘I gat 4-pela mun i stap yet na taim bilong kisim kaikai bai i kamap.’ Tasol . . . yupela i mas . . . lukim gut ol gaden. Ol kaikai i redi pinis.” Na bihain em i tok, “Man i wok long kisim kaikai, em i kisim pe bilong en na em i bungim kaikai bilong laip i stap gut oltaim oltaim.” Em i tok long wok bilong bungim ol man.

Jisas i bin toktok wantaim dispela meri na ating Jisas i save long gutpela samting bai kamap long dispela​—olsem planti man bai harim tok dispela meri i autim long ol na bai ol i bilip long Jisas. Meri i tokim ol Samaria bilong taun Sikar olsem: “Em i tokim mi long olgeta samting mi bin mekim bipo.” Orait taim ol i kam long Jisas, ol i tokim em long i stap wantaim ol na toktok moa wantaim ol. Olsem na em i stap tupela de long dispela ples.

Planti Samaria moa i harim tok bilong Jisas long maus bilong em yet na ol i bilip. Na ol i tokim dispela meri: “Mipela i no harim tok bilong yu tasol na mipela i bilip long dispela man. Nogat. Mipela yet i harim tok bilong en, na mipela i save, dispela man tasol em i man bilong kisim bek olgeta manmeri bilong graun.” Dispela meri bilong Samaria i makim gutpela pasin yumi ken bihainim, olsem yumi ken autim tok bilong Krais na kirapim tingting bilong ol man bambai ol i gat laik long kisim sampela save moa!

Jisas i tok i gat 4-pela mun moa na bai taim bilong kisim kaikai long gaden i kamap​—em taim bilong kisim bali. Long Palestain dispela taim i kamap long mun Mas samting, olsem na Jisas i mekim dispela tok long Novemba o Disemba. Long dispela yumi save, bihain long Pasova bilong yia 30, Jisas wantaim ol disaipel i bin i stap inap 8-pela mun samting long Judia. Ol i lainim ol man na givim baptais long ol. Nau ol i laik go bek long ples bilong ol long Galili. Wanem samting bai painim ol long Galili? Jon 4:​3-43.

▪ Taim Jisas i toktok wantaim meri bilong Samaria, bilong wanem meri i kirap nogut?

▪ Jisas i tok wanem long em long wara i gat laip na long ples bilong lotuim God?

▪ Olsem wanem Jisas i kamapim em yet long dispela meri? Bilong wanem yumi kirap nogut long em i tokaut olsem long dispela meri?

▪ Meri bilong Samaria i mekim wanem wok bilong autim tok? Wanem samting i kamap?

▪ Olsem wanem kaikai bilong Jisas i kain olsem wok bilong bungim kaikai bilong gaden?

▪ Olsem wanem yumi inap save hamas mun Jisas i stap long Judia bihain long Pasova bilong yia 30?