Sapta 48

Em i Lusim Jairus na Go Bek Gen Long Nasaret

JISAS i bin i kam long bot long Dekapolis na oraitim meri i save karim blut, na em i kirapim bek pikinini bilong Jairus. Tasol i gat sampela wok moa Jisas i mas mekim long dispela de. Taim Jisas i lusim haus bilong Jairus, tupela aipasman i bihainim em na ol i singaut: “Yu Pikinini Bilong Devit, yu mas sori long mitupela.”

Taim ol i kolim Jisas olsem “Pikinini Bilong Devit,” ol i kamapim bilip bilong ol, ol i bilip olsem Jisas em i tumbuna pikinini bilong King Devit, olsem na em i dispela man God i tok promis long em bai kam. Tasol Jisas i mekim olsem em i no bin harim singaut bilong ol, long wanem em i laik traim ol​—ol i laik tru long em i helpim ol o nogat. Tasol tupela man i no les. Ol i bihainim Jisas i go long ples em i save slip long en, na taim em i go insait long haus ol i bihainim em i go insait.

Ol i kam insait long haus na Jisas i askim ol: “Yutupela i bilip olsem mi inap mekim dispela samting, o nogat?”

Tupela i tok: “Yes, Bikpela.”

Orait Jisas i putim han long ai bilong tupela na em i tok: “Yutupela i bilip long mi. Olsem tasol dispela samting i ken kamap long yutupela.” Na ai bilong tupela i op. Jisas i givim strongpela tok long tupela olsem, “Yutupela i no ken tru larim wanpela man i save long dispela [samting] i bin kamap long yutupela.” Tasol tupela i amamas tru na ol i go tokim ol manmeri long olgeta hap bilong dispela distrik long ol gutpela wok Jisas i save mekim.

Tupela i wokabaut i go, na ol manmeri i kisim wanpela man i kam long Jisas. Dispela man i gat spirit nogut i stap long em na em i mauspas. Jisas i rausim dispela spirit nogut na kwiktaim dispela man i toktok. Ol manmeri i kirap nogut long dispela na ol i tok: “Bipo i no gat kain samting olsem i kamap long kantri Israel.”

Ol Farisi tu i stap. Bel bilong ol i nogut na ol i no laik bilip long Jisas, olsem na ol i sutim tok long em long ol strongpela wok em i save mekim na ol i tok gen olsem: “Em i save rausim ol spirit nogut long strong bilong hetman bilong ol spirit nogut.”

Bihain long dispela, Jisas i go bek long Nasaret, na ol disaipel i go wantaim em. Bipo, olsem wanpela yia i go pinis, em i bin go long haus lotu na lainim ol man. Ol manmeri i kirap nogut long gutpela tok bilong em, tasol bihain ol i bel nogut long tok em i autim na ol i laik painim rot bilong kilim em i dai. Nau Jisas i marimari long ol na em i laik helpim gen ol wanples bilong em.

Taim Jisas i stap long ol narapela ples ol manmeri i save kam long Jisas, tasol long dispela ples ol i no mekim olsem. Olsem na long de Sabat, em i go long haus lotu bilong givim tok bilong God long ol manmeri. Planti ol i kirap nogut long tok bilong em, na ol i tok: “Dispela man em i kisim dispela save we? Na olsem wanem em inap wokim ol mirakel? Yumi save, dispela man em i pikinini bilong wanpela kamda, na Maria em i mama bilong en.”

Ol i tok, ‘Jisas em i olsem yumi tasol. Mipela lukim em i kamap bikpela. Olsem wanem na ol i tok em i dispela Man mipela wetim em i kam?’ Maski ol i lukim bikpela save bilong em na ol mirakel bilong em, ol i sakim em. Ol famili bilong em tu, ol i no bilip long em. Olsem na Jisas i tok: “Profet i gat nem long olgeta ples. Tasol long as ples bilong en . . . em i no gat nem.”

Jisas i tingting planti long ol i no bilip. Olsem na em i no wokim planti mirakel long dispela hap​—em i oraitim wan wan sikman tasol. Matyu 9:​27-34; 13:​54-58; Mak 6:​1-6; Aisaia 9:7.

▪ Taim ol aipasman i kolim Jisas olsem “Pikinini Bilong Devit,” ol i kamapim wanem bilip bilong ol?

▪ Ol Farisi i tok i gat wanem as bilong ol mirakel bilong Jisas?

▪ Olsem wanem yumi ken tok, Jisas i mekim pasin marimari taim em i go bek na helpim ol lain long Nasaret?

▪ Taim Jisas i go long Nasaret, ol Nasaret i mekim wanem? Bilong wanem ol i mekim olsem?