Sapta 34

Em i Makim Ol Aposel

JON Bilong Baptais i tokaut olsem Jisas em i Pikinini Sipsip bilong God, na nau Jisas i bin mekim wok inap wanpela yia hap pinis. Taim Jisas i kirap autim tok, Andru na Saimon Pita, na Jon na ating Jems tu (brata bilong Jon), na Filip wantaim Nataniel (Bartolomyu) ol i kamap disaipel bilong em. Bihain planti moa ol i kirap bihainim Jisas.

Nau Jisas i redi long makim sampela bilong kamap aposel bilong em. Ol bai i poromanim em, na bai em i lainim ol gut. Tasol pastaim Jisas i go long wanpela maunten na long nait olgeta em i beten. Ating em i beten askim God long givim gutpela tingting long em na blesim ol samting em i laik mekim. Tulait pinis, orait em i singautim ol disaipel i kam long em na em i makim 12-pela. Ol i kamap aposel bilong em, tasol Baibel i kolim ol olsem disaipel, long wanem ol i lain yet na dispela em i insait bilong tok “disaipel.”

Jisas i makim ol dispela 6-pela disaipel bilong pastaim, em yumi kolim pinis nem bilong ol. Na Jisas i makim Matyu tu, em Jisas i bin singautim em taim em i sindaun long haus takis. Na narapela 5-pela em Judas (Tadius), na Judas Iskariot, na Saimon bilong lain Selot, na Tomas, na Jems, em pikinini bilong Alfius. Sampela taim Baibel i kolim dispela Jems olsem namba tu Jems.

Nau dispela 12-pela disaipel i bin i stap longtaim liklik wantaim Jisas na em i save gut long ol. Sampela ol i wanblut bilong em. Tupela brata hia, em Jems na Jon, i kasen brata bilong Jisas. Ating Alfius em i brata bilong Josep, em waspapa bilong Jisas. Olsem na Jems, pikinini bilong Alfius, em tu i kasen brata bilong Jisas.

I no hatwok long Jisas i tingim nem bilong ol aposel bilong em. Tasol yu inap tingim? Bilong helpim yu long tingim, yu ken mekim olsem: Yu mas tingim tupela i gat nem Saimon, na tupela i gat nem Jems, na tupela i gat nem Judas, na Saimon i gat brata bilong em, nem bilong em Andru, na Jems i gat brata, nem bilong em Jon. Em nau, yu tingim pinis nem bilong 8-pela. Na narapela 4-pela, em man bilong kisim takis (Matyu), na man i no bilip tumas olsem Jisas i kirap bek (Tomas), na man i stap long as bilong diwai na Jisas i singautim em (Nataniel), na pren bilong em Filip.

Elevenpela aposel ol i bilong hap bilong Galili, em as ples bilong Jisas. Nataniel em i bilong Kana. Filip na Pita na Andru, ol i bilong Betsaida pastaim. Tasol bihain Pita na Andru i go sindaun long Kaperneam, na ating Matyu tu i bin sindaun long dispela hap. Jems tupela Jon i man bilong kisim pis na ating tupela tu i sindaun long Kaperneam o klostu long dispela ples. Judas Iskariot, em man bilong kamapim Jisas long ol birua, em wanpela tasol em i bilong Judia. Mak 3:13-19; Luk 6:12-16.

▪ Wanem ol aposel ol i wanblut bilong Jisas?

▪ Kolim nem bilong ol aposel bilong Jisas. Yu ken mekim wanem na bai yu inap tingim nem bilong ol?

▪ Ol aposel i bilong wanem wanem hap?