Sapta 44

Em i Mekim Dai Bikpela Win

LONG san Jisas i mekim bikpela wok. Em i lainim ol man i bung long nambis, na bihain em i toktok wantaim ol disaipel tasol na em i stori gut long as bilong ol tok piksa em i bin mekim. Long apinun em i tok: “Yumi go long hapsait bilong raunwara.”

Long hapsait bilong raunwara Galili i gat wanpela hap ol i kolim Dekapolis. Insait bilong dispela nem em “10-pela biktaun.” Long ol dispela biktaun i gat planti Grik na Juda i stap. Jisas i no bin mekim bikpela wok long dispela hap. Na long dispela taim tu wanpela samting i kamap na em i no inap i stap longtaim long dispela hap.

Taim Jisas i tokim ol disaipel, “Yumi go long hapsait bilong raunwara,” ol disaipel i kisim em i go long bot. Tasol planti man i lukim ol i go na ol tu i kalap long bot bilong ol wan wan na i go wantaim ol. I no longwe. Raunwara Galili i longpela inap 21 kilomita, na braitpela inap 12 kilomita.

Jisas i bin mekim bikpela wok na skin bilong em i les. Olsem na taim bot i lusim nambis i go, em i go long stan na em i slip. Sampela aposel ol i man bilong solwara, na planti taim ol i bin raun kisim pis long raunwara Galili. Olsem na ol i stiaim bot i go.

Tasol dispela taim ol i hatwok. Win long hap bilong raunwara i hat liklik, long wanem raunwara i stap daunbilo long ol maunten, na win i kam long ol maunten i kol. Dispela samting i mekim na sampela taim strongpela win i lusim ol maunten i kam daun na i kirapim traipela bikwin long raunwara. Taim ol disaipel i kisim Jisas i go long bot, dispela samting i kamap. Traipela bikwin i kirap na si i sakim bot na kalap i go insait, na wara i laik pulap long bot. Tasol Jisas i slip i stap!

Ol disaipel i gat save long stiaim bot na ol i wok strong long stiaim i go. Ating bipo tu ol i bin i stap long raunwara long kain taim nogut olsem. Tasol nau ol i no inap moa, na ol i pret, nogut ol i lus long wara. Olsem na ol i kirapim Jisas, na ol i tok: “Tisa, klostu yumi laik lus, na ating yu no wari liklik long yumi bai i dai?”

Jisas i kirap na em i krosim win, na em i tokim wara, “Inap nau. Yu pinis! Yu dai nau!” Na bikpela win i dai na wara i no mekim nais liklik. Na em i tokim ol disaipel: “Bilong wanem yupela i pret? Yupela i no bilip, a?”

Nau narapela kain pret i kisim ol disaipel na ol i toktok namel long ol yet, olsem: “Dispela man em i husat tru, na win wantaim wara i harim tok bilong em?”

Jisas i kamapim bikpela strong bilong em! Nau yumi save, King bilong yumi i gat strong long bosim win na wara samting tu, na dispela i strongim bilip bilong yumi na yumi save, taim Kingdom bilong em i bosim graun na em i putim olgeta tingting bilong em i go long wok bilong bosim graun, bai olgeta manmeri long graun i stap gutpela na i no ken pret long bikpela win samting bai bagarapim ol!

Jisas i mekim i dai bikpela win na bihain liklik em wantaim ol disaipel bilong em i kamap gut long hapsait bilong raunwara. Ating bikpela win i no givim hatwok tumas long ol narapela bot, na ol man long ol dispela bot ol i go kamap gut long ples bilong ol. Mak 4:35–5:1; Matyu 8:​18, 23-27; Luk 8:​22-26.

▪ Wanem dispela hap ol i kolim Dekapolis? Em i stap we?

▪ Wanem samting i mekim na sampela taim bikpela win i kirap long raunwara Galili?

▪ Ol disaipel i gat save long stiaim bot, tasol ol i no inap moa, na ol i mekim wanem?