Sapta 22

Em i Singautim Fopela Disaipel

JISAS i lusim Nasaret, long wanem, ol as ples i laik kilim em i dai, na em i go i stap long biktaun Kaperneam klostu long raunwara Galili. Dispela i truim narapela tok bilong profet Aisaia, em i tok ol man bilong Galili bai ol i lukim bikpela lait.

Jisas i autim tok bilong Kingdom long dispela hap tu bilong givim lait long ol man, na em i bungim 4-pela disaipel bilong em ol i bilong dispela hap. Bipo ol i bin raun wantaim em, tasol ol i bin kam bek wantaim em long taim em i lusim Judia, na ol i kirap gen long mekim wok bisnis bilong ol long kisim pis. Orait, nau Jisas i wok long painim ol, long wanem em i mas kirap long lainim sampela man bambai ol inap mekim wok bilong autim tok taim em i go bek long heven.

Olsem na taim Jisas i wokabaut long nambis, em i lukim Saimon Pita wantaim sampela poroman bilong em ol i wasim umben bilong ol, na em i go bungim ol. Em i kalap long bot bilong Pita na em i tokim Pita long subim bot i go lusim nambis liklik. Na em i sindaun long bot na givim tok long ol manmeri i stap long nambis.

Bihain Jisas i tokim Pita: “Pul i go namel long wara, na yutupela tromoi ol umben i go daun bilong kisim pis.”

Pita i tok: “Long nait mipela i wok hat tru i go inap tulait, na mipela i no kisim wanpela pis. Tasol bai mi bihainim tok bilong yu na tromoi ol umben.”

Em i mekim olsem na ol i kisim planti pis na umben i laik bruk. Olsem na ol i singautim ol poroman bilong ol long narapela bot i kam helpim ol. Ol i kam na ol i pulimapim pis long tupela bot. Hevi bilong pis i mekim na tupela bot i laik i go daun. Pita i lukim dispela na em i brukim skru klostu long lek bilong Jisas na em i tok: “Bikpela, yu lusim mi na yu go. Mi man bilong sin.”

Tasol Jisas i tokim em: “Yu no ken pret. . . . bihain bai yu wok long kisim ol manmeri i kam long mi.”

Jisas i singautim tu brata bilong Pita, em Andru. Em i tokim tupela: “Yutupela kam bihainim mi, na bai mi lainim yutupela long pasin bilong kisim ol manmeri.” Na em i singautim tupela wanwok bilong Pita na Andru, em Jems, pikinini bilong Sebedi, na brata bilong em Jon. Kwiktaim tupela i go bihainim Jisas. Dispela 4-pela man i lusim wok bilong kisim pis na i go bihainim Jisas. Ol i paslain long ol narapela disaipel long raun oltaim wantaim Jisas. Luk 5:​1-11; Matyu 4:​13-22; Mak 1:​16-20; Aisaia 9:​1, 2.

▪ Bilong wanem Jisas i singautim ol disaipel i go bihainim em? Em i singautim husat?

▪ Pita i lukim wanem mirakel na em i pret?

▪ Jisas i singautim ol disaipel bilong mekim wok bilong kisim wanem samting?