Sapta 25

Em i Sori Long Lepraman

JISAS wantaim 4-pela disaipel bilong em ol i go long ol taun long hap bilong Galili, na stori bilong ol gutpela samting Jisas i mekim i go nabaut. Tok bilong em i go kamap long wanpela taun em wanpela lepraman i stap long en. Dokta Luk i tok, “sik lepra i pulap tru long bodi” bilong dispela man. Sik lepra inap bagarapim tru bodi bilong man. Olsem na yumi save dispela lepraman i stap tarangu tru.

Taim Jisas i kam kamap long dispela taun, dispela lepraman i go klostu long em. Lo bilong God i tok, lepraman i mas singaut na tok olsem “Mi no klin,” bilong toksave long ol man na bai ol i no ken i go klostu long em, nogut sik lepra i kalap long ol. Nau dispela lepraman i brukim skru na i krai long Jisas na i tok: “Bikpela, sapos yu laik, yu inap long mekim mi i kamap klin.”

Em i bilip tru long Jisas! Tasol em i stap tarangu tru! Bai Jisas i mekim wanem? Sapos yu bin i stap long dispela taim, bai yu mekim wanem? Jisas i sori tumas long em na i putim han long em, na i tok: “Mi laik. Yu kamap klin.” Orait, wantu sik bilong em i pinis.

Tingim bikpela sori bilong Jisas​—yu laik bai kain man olsem em i stap king bilong yu? Pasin Jisas i mekim long dispela lepraman i strongim yumi long bilip tru olsem taim em i stap King na bosim Kingdom, bai wanpela tok profet bilong Baibel i kamap tru, olsem: “Em i save sori long ol manmeri i no gat strong na i stap rabis.” Long dispela taim bihain, bai Jisas i mekim samting em i laik tru long mekim​—bai em i helpim olgeta man i gat sik.

Taim Jisas i no helpim yet dispela lepraman, ol manmeri i wok long toktok long ol samting em i mekim. Orait, nau Jisas i truim tok profet bilong Aisaia na em i tokim dispela man i kamap klin, “Yu no ken tokim wanpela man long dispela samting i bin kamap long yu. Nogat.” Na bihain em i tokim dispela man, “Yu go soim skin bilong yu long pris, na mekim ofa . . . olsem Moses i bin tok. Na bai ol man i ken save, sik bilong yu i pinis.”

Tasol dispela man i amamas tru long dispela mirakel Jisas i wokim, olsem na em i go na autim dispela stori long olgeta hap. Planti manmeri i harim tok long dispela samting Jisas i bin mekim na ol i laik lukim Jisas. Olsem na Jisas i no inap i go moa insait long wanpela taun long ai bilong ol man. Em i stap long ol hap i no gat man. Na ol manmeri bilong olgeta hap ol i kam long em bilong harim tok bilong em na bai em i ken oraitim sik bilong ol. Luk 5:​12-16; Mak 1:​40-45; Matyu 8:​2-4; Wok Pris 13:45; 14:​10-13; Buk Song 72:13; Aisaia 42:​1, 2.

▪ Sik lepra inap mekim wanem long skin bilong man? Man i gat sik lepra em i mas singaut na tok wanem bilong toksave long ol man?

▪ Wanpela lepraman i krai long Jisas na em i tok wanem? Yumi tingim ol samting Jisas i mekim long dispela lepraman na dispela i lainim yumi long wanem samting?

▪ Lepraman i kamap klin pinis, tasol em i no bihainim wanem tok bilong Jisas? Olsem na wanem samting i kamap?