Sapta 16

Em i Strong long Mekim Wok Bilong Jehova

OL BRATA bilong Jisas, olsem Jems na Josep na Saimon na Judas, ol i go wantaim em na ol disaipel long taun Kaperneam klostu long raunwara Galili. Tasol ating pastaim ol i go long ples bilong ol, em Nasaret, bambai ol i ken bungim sampela samting bilong kisim i go wantaim ol.

Tasol bilong wanem Jisas i go long Kaperneam? Long wanem, Kaperneam em i wanpela biktaun na planti nupela disaipel bilong em i stap long dispela taun o long ol hap klostu, olsem na bai i no hatwok long ol i kam long Jisas na em i lainim ol.

Long Kaperneam Jisas i wokim planti mirakel, na sampela mun bihain em yet i stori long dispela. Tasol i no longtaim na Jisas wantaim ol disaipel i lusim Kaperneam na wokabaut i go long Jerusalem long bung bilong Pasova bilong yia 30. Long Jerusalem, ol disaipel i lukim Jisas i mekim wanpela samting ol i no bin lukim em i mekim bipo.

Lo bilong God i tok ol Israel i mas kisim ol animal na mekim ofa long God. Olsem na sampela man long Jerusalem ol i maketim ol animal na pisin samting, tasol ol i mekim insait long tempel, na ol i giamanim ol man na singaut long bikpela pe tru bilong en.

Jisas i belhat long dispela samting na em i wokim wip na rausim ol long tempel. Em i kapsaitim tebol na mani bilong ol man bilong senisim mani. Na em i tokim ol man i maketim ol pisin: “Kisim ol pisin bilong yupela i go. Yupela i no ken mekim haus bilong Papa bilong mi i kamap olsem haus bilong maket.”

Ol disaipel i lukim dispela samting Jisas i mekim na ol i tingim wanpela tok profet i stori long Pikinini bilong God, olsem: “Mi laikim tru haus bilong yu, olsem na mi wok strong long mekim dispela haus i stap gut.” Tasol ol Juda i askim Jisas: “Bai yu wokim wanem mirakel, olsem mak bilong soim mipela olsem yu gat namba bilong mekim dispela pasin nau yu bin mekim?” Jisas i tokim ol: “Yupela brukim dispela tempel, na long tripela de bai mi kirapim gen.”

Ol Juda i ting Jisas i toktok long tempel tru, olsem na ol i tok: “Inap long 46 yia ol i bin mekim wok bilong sanapim dispela tempel, na long tripela de tasol bai yu kirapim gen, a?” Tasol Jisas i stori long bodi bilong em yet. Na 3-pela yia bihain, taim Jisas i kirap bek, ol disaipel bilong Jisas i tingim dispela tok em i bin mekim. Jon 2:​12-22; Matyu 13:55; Luk 4:23.

▪ Jisas i go long Kana na bihain em i go long wanem ol ples?

▪ Bilong wanem Jisas i belhat? Na em i mekim wanem?

▪ Taim ol disaipel bilong Jisas i lukim ol samting em i mekim, ol i tingim wanem tok?

▪ Jisas i tok wanem long “dispela tempel”? Wanem insait bilong dispela tok bilong em?