Sapta 69

Husat i Papa Tru Bilong Ol?

LONG taim bilong dispela bikpela bung, Jisas i givim strongpela tok moa long ol hetman bilong lotu Juda, em i tok: “Mi save, yupela i lain bilong Abraham. Tasol tok bilong mi em i no i stap insait long yupela. Olsem na yupela i laik kilim mi i dai. Mi save autim tok long ol samting Papa bilong mi i soim mi pinis. Na yupela i save mekim ol pasin yupela i kisim long papa bilong yupela.”

Jisas i no tokaut klia long papa bilong ol em i husat, tasol em i makim olsem papa bilong em i narapela na papa bilong ol i narapela. Ol dispela hetman i no save long man Jisas i toktok long en, na ol i tok: “ Tumbuna papa bilong mipela em Abraham.” Ol i ting ol i gat wankain bilip olsem Abraham, em pren bilong God.

Tasol ol i kirap nogut long tok bilong Jisas, em i tok: “Sapos i tru yupela ol tumbuna pikinini bilong Abraham, orait yupela bai i mekim wankain pasin olsem Abraham i bin mekim.” Long wanem pikinini i save bihainim pasin bilong papa bilong em. Tasol Jisas i tok: “Mi bin autim long yupela olgeta tok tru mi bin harim long God. Na nau yupela i laik kilim mi i dai. Dispela kain pasin em i no pasin bilong Abraham.” Olsem na Jisas i tokim ol gen: “Yupela i mekim pasin bilong papa bilong yupela tasol.”

Tasol ol i no kisim gut as bilong dispela tok bilong Jisas. Ol i wok long tokaut strong olsem ol i pikinini tru bilong Abraham, ol i tok: “Mama bilong mipela i no bin mekim pamuk na em i karim mipela.” Ol i tok ol i lotu tru long God olsem Abraham i bin mekim, na ol i tok: “Mipela i gat wanpela Papa tasol, em God.”

Tasol God em i Papa bilong ol o nogat? Jisas i tok: “Sapos i tru God em i Papa bilong yupela, orait yupela bai i laikim mi, long wanem, mi stap wantaim God na mi kam. Mi no kam long tingting bilong mi yet. Nogat. God i salim mi na mi kam. Tasol bilong wanem yupela i no klia gut long tok bilong mi? As bilong dispela em i olsem: Yupela i no inap long harim tok bilong mi.”

Ol dispela hetman i sakim Jisas, na em i bin wok long soim ol long ol samting bai painim ol. Nau Jisas i tok klia, olsem: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela.” Satan em i wanem kain papa? Jisas i tok em i man bilong kilim man i dai, na em i tok: “Em i man bilong tok giaman, na em i papa tru bilong pasin bilong tok giaman.” Na Jisas i tok moa: “Ol pikinini bilong God i save harim olgeta tok bilong God. Yupela i no pikinini bilong God, olsem na yupela i no save harim tok bilong em.”

Ol Juda i kros long tok bilong Jisas, na ol i tok: “Mipela i tok yu man bilong Samaria na wanpela spirit nogut i stap long yu, em i tru, a?” Ol Juda i no save laikim ol Samaria, olsem na taim ol i tok Jisas em wanpela Samaria, ol i laik tok bilas nogut long em.

Tasol Jisas i tok: “Mi no gat spirit nogut i stap long mi. Nogat. Mi litimapim nem bilong Papa bilong mi tasol, na yupela i daunim nem bilong mi.” Na nau Jisas i mekim wanpela tok promis ol i kirap nogut long en. Em i tok: “Sapos wanpela man i bihainim tok bilong mi, em i no inap i dai.” Jisas i no tok ol man i bihainim em i no ken i dai tru. Nogat. Em i tok ol i no ken bagarap olgeta long “namba 2 dai.” Man i go long “namba 2 dai” i no inap kirap bek.

Tasol ol Juda i ting Jisas i tok ol i no inap i dai tru. Olsem na ol i tok: “Nau mipela i save pinis, yu gat spirit nogut i stap long yu. Abraham em i dai pinis, na ol profet tu ol i dai pinis. Na yu tok, ‘Sapos wanpela man i bihainim gut tok bilong mi, em i no inap i dai.’ Olsem wanem? Ating yu winim tumbuna bilong yumi, Abraham? Em i dai pinis. Na ol profet tu ol i dai pinis. Yu ting yu husat tru?”

Jisas i laik lainim ol olsem em i dispela man God i bin tok long salim i kam. Tasol Jisas i no tokim ol klia long em i husat tru, em i tok: “Sapos mi litimapim nem bilong mi yet, orait nem bilong mi em i samting nating. Tasol Papa bilong mi, em i litimapim nem bilong mi. Na yupela i save tok, em i God bilong yupela. Tasol yupela i no save long em. Mi, mi save long em. Sapos mi tok, ‘Mi no save long em,’ orait mi bai kamap man bilong giaman olsem yupela. Tasol mi save pinis long em, na mi bihainim gut tok bilong em.”

Na Jisas i stori long gutpela man Abraham na em i tok: “Taim tumbuna bilong yupela Abraham em i tingting long lukim taim bilong mi, em i bin amamas. Na taim em i lukim pinis, orait bel bilong en i gutpela tru.” Abraham i bilip na i olsem em i lukim pinis taim bilong Jisas i kam, em dispela man God i tok long salim em i kam. Ol Juda i no bilip, na ol i tok: “Yu no gat 50 krismas yet, na yu bin lukim Abraham, a?”

Jisas i tokim ol: “Tru tumas mi tokim yupela, taim Abraham i no kamap yet, [mi stap].” Jisas i stori long taim em i bin i stap long heven, na em i no kam daun yet long graun.

Taim ol Juda i harim dispela tok ol i belhat na ol i kisim ol ston bilong tromoi long Jisas. Tasol Jisas i hait na i lusim tempel na i go. Jon 8:​37-59; Kamapim Tok Hait 3:14; 21:8.

▪ Jisas i tok wanem bilong makim olsem papa bilong em i narapela na papa bilong ol birua bilong em i narapela?

▪ Bilong wanem ol Juda i tok Jisas em i man bilong Samaria?

▪ Wanem insait bilong tok bilong Jisas, em i tok lain bilong em ol i no inap i dai?