Sapta 59

Jisas Em i Husat Tru?

JISAS na ol disaipel i kalap long bot, na taim bot i sua long ples Betsaida ol manmeri i kisim wanpela aipas i kam long Jisas, na ol i tokim Jisas long oraitim ai bilong em. Jisas i bringim dispela man i go ausait long ples, na em i spet long ai bilong em, na em i askim em olsem: “Yu lukim wanpela samting, o nogat?”

Dispela man i tok: “Mi lukim sampela man. Tasol mi lukim ol i olsem ol diwai i wokabaut i go.” Jisas i putim han long ai bilong em, na ai bilong em i kamap gutpela na em i lukim olgeta samting i kamap klia. Jisas i salim dispela man i go bek long haus bilong em na i tokim em, em i no ken i go insait long ples.

Nau Jisas wantaim ol disaipel i go long ol ples bilong Sisaria Filipai, long hap bilong not long Palestain. Ol i mas bihainim rot i go antap long maunten, na ating ol i mas wokabaut inap tupela de bilong kamap long dispela gutpela hap.

Long rot, wanpela taim Jisas i lusim ol disaipel na em wanpela i beten i stap. Em i save i gat 9-pela o 10-pela mun moa na bai em i dai, na em i wari long ol disaipel bilong em. Planti ol i lusim em pinis. Na sampela ol i tingting planti, long wanem, taim ol man i laik putim em i stap king, Jisas i sakim ol, na taim ol birua i tokim em long wokim wanpela mirakel bilong makim olsem em i king, Jisas i no wokim wanpela mirakel. Orait, ol aposel i ting Jisas em i husat? Taim ol i kamap long ples Jisas i beten i stap long en, Jisas i askim ol: “Ol manmeri i save tok, mi husat tru?”

Ol i tok: “Sampela i save tok, yu Jon Bilong Baptais. Na sampela i tok, yu Elaija. Na sampela i save tok, yu Jeremaia o wanpela profet.” Ol manmeri i ting Jisas em i wanpela bilong ol dispela man na em i kirap bek long matmat!

Jisas i askim ol: “Na yupela yet i tok mi husat?”

Wantu Pita i tok: “Yu dispela man God i bin makim bilong kisim bek ol manmeri bilong en. Yu Pikinini Bilong God i gat laip.”

Jisas i amamas long tok bilong Pita, na em i tok: “Yu Pita, na bai mi wokim [kongrigesen] bilong mi antap long dispela ston. Na bai strong bilong Dai i no inap daunim dispela [kongrigesen].” Em namba wan taim Jisas i stori long em bai kamapim wanpela kongrigesen. Ol manmeri bilong dispela kongrigesen, taim ol i dai, bai dai i no gat strong inap long holimpas ol. Nau Jisas i tokim Pita: “Bai mi givim ol ki bilong kingdom bilong heven long yu.”

Tok bilong Jisas i makim olsem Pita bai kisim bikpela wok. Em i no tok Pita i stap namba wan na i winim ol narapela aposel, na em i no makim Pita i stap olsem as bilong kongrigesen. Jisas yet i ‘as ston’ bilong kongrigesen Kristen. Tasol Pita bai kisim 3-pela ki na em i mas mekim wok long ol dispela ki bilong opim rot long sampela lain bambai ol inap i go insait long Kingdom bilong heven.

Pita i mekim wok long namba wan ki long Pentikos long yia 33 bilong helpim ol Juda i bin tanim bel. Em i helpim ol long save long samting ol i mas mekim na bai God i ken orait long ol i kisim laip. Bihain liklik em i mekim wok long namba 2 ki bilong opim rot long ol Samaria i bilip, na bai ol inap insait long Kingdom bilong God. Na long yia 36, em i mekim wok long namba 3 ki bilong opim rot long ol manmeri bilong ol arapela lain, olsem Kornilius na famili bilong em, bambai ol tu inap kisim wankain blesing.

Jisas i tokim ol aposel, klostu nau em i mas karim pen na hevi na ol man bai kilim em i dai long Jerusalem. Ol i kirap nogut long dispela tok bilong em. Pita i no pilim tru tok bilong Jisas, na em i no save Jisas bai kirap bek na kisim laip long heven, olsem na em i kisim Jisas i go long arere na em i tokim Jisas: “Bikpela, nogat tru. Dispela samting i no inap kamap long yu.” Jisas i tanim na em i tokim Pita: “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.”

I gat sampela moa ol i wokabaut wantaim Jisas na ol aposel na em i tokim ol: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en [olsem karim hevi] long olgeta de, na em i mas bihainim mi. Long wanem, sapos wanpela man i laik holimpas laip bilong em yet, laip bilong en bai i lus. Tasol sapos wanpela man i ting long mi na i lusim laip bilong en, orait laip bilong en bai i stap gut.”

Sapos ol i laik bai Jisas i amamas long ol, ol i mas strongim bel na redi long lusim laip bilong ol. Jisas i tok: “Sapos wanpela man i sem long mi na long tok bilong mi, orait bihain, taim Pikinini Bilong Man . . . i kam, em bai i sem long dispela man tu.” Mak 8:​22-38; Matyu 16:​13-28; Luk 9:​18-27.

▪ Bilong wanem Jisas i wari long ol disaipel bilong em?

▪ Ol man i ting Jisas em i husat?

▪ Pita i kisim wanem ol ki? Em i mas mekim wanem wok long ol dispela ki?

▪ Jisas i givim wanem tok long Pita bilong stretim em? Bilong wanem Jisas i stretim em?