Sapta 133

Jisas Inapim Pinis Olgeta Wok God i Bin Tokim Em Long Mekim

TAIM King Krais Jisas i rausim Satan wantaim olgeta lain nogut bilong Satan, bai bikpela amamas tru i kamap! Bai gutaim bilong 1,000 yia bilong wok king bilong Jisas i kirap!

Jisas na ol king i wok wantaim em bai ol i bosim wok, na ol man i winim Armagedon bai ol i wok long rausim ol samting i bin bagarap long dispela stretpela pait. Na ating inap liklik taim bai ol man long graun i kamapim pikinini, na bai ol pikinini tu i ken insait long dispela wok bilong mekim graun i kamap gutpela ples tru.

Na bai Jisas i truim tok promis bilong em na “olgeta manmeri i stap long matmat ol bai . . . i lusim matmat na i kam ausait.” Ol dispela planti milion manmeri em i kirapim bek ol, bai ol tu i amamas long i stap long dispela gutpela ples Paradais.

Jisas bai kirapim bek tu dispela man nogut ol i bin nilim long diwai klostu long em. Yu tingim tok promis Jisas i bin mekim long em? Em i tok, ‘Mi tok tru long yu nau, bai yu stap wantaim mi long Paradais.’ Jisas i no ken kisim em i go i stap wantaim em long heven bilong mekim wok king. Na Jisas i no ken kamap man gen na i stap wantaim em long Paradais long graun. Nogat. Jisas bai kirapim bek dispela man na lukautim em long ol samting bilong skin na spirit, na long dispela rot bai i olsem Jisas i stap wantaim em​—bai em i stap gutpela olsem piksa long narapela hapsait bilong dispela pes i makim.

Jisas bai sori long ol man na lukautim ol, na ol manmeri i winim Armagedon, na ol pikinini ol i kamapim, na ol planti milion manmeri i kirap bek na bihainim tok bilong Jisas, bai ol i kamap gutpela olgeta. Long rot bilong King Krais Jisas, bai God Jehova i stap wantaim ol manmeri long spirit. Na olsem Jon i harim wanpela maus long heven i tok, “Em bai i mekim drai wara i stap long ai . . . bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” Bai i no gat wanpela i kisim pen o i gat sik.

Jisas bai bosim graun inap 1,000 yia na long pinis bilong dispela hap taim bai olgeta samting long graun i stap wankain stret olsem God i gat laik long en taim em i tokim Adam tupela Iv long kamap planti na i go sindaun long olgeta hap bilong graun. Ol manmeri i stretpela tru bai ol i pulap long olgeta hap bilong graun, long wanem Jisas bai mekim wok long ofa bilong em na helpim ol. I dai i painim ol man long rot bilong sin bilong Adam bai pinis olgeta!

Em nau, bai Jisas inapim olgeta wok Jehova i tokim em long mekim. Olsem na taim dispela 1,000 yia i pinis, Kingdom na olgeta manmeri i kamap gutpela pinis, em Jisas bai putim long han bilong Papa. Nau bai God i opim hul i no gat as na larim Satan wantaim ol spirit nogut i kam ausait. Bilong wanem God i mekim olsem?

Long wanem, planti manmeri i stap long Paradais long dispela taim em ol manmeri i bin kirap bek, na i no gat wanpela samting i bin traim bilip bilong ol. Taim ol i no i dai yet, ol i no bin bilip long ol tok promis bilong God, long wanem ol i no save long en. Na taim ol i kirap bek na i stap long Paradais na ol i kisim save long ol tok i tru bilong Baibel, i no hatwok long ol i mekim wok bilong God, long wanem, i no gat wanpela man i laik pasim ol. Tasol sapos Satan inap wok long pasim ol, bai ol i sanap strong long dispela traim na i stap gut long God o nogat? Bilong stretim dispela askim, God bai larim Satan i lusim hul i no gat as.

Ol tok hait God i kamapim long Jon i makim olsem taim dispela 1,000 yia i pinis, bai Satan i pundaunim sampela man na bai ol i lusim wok bilong God. Baibel i no tok ol i hamas. Na bihain, taim dispela laspela traim i pinis, Satan wantaim ol spirit nogut na olgeta man em i bin giamanim ol, bai ol i pinis olgeta. Tasol ol manmeri i winim dispela traim na i stap gut long God, bai ol i stap; na inap long olgeta taim bihain bai ol i kisim ol blesing long Papa bilong ol em i stap long heven.

Olsem na Jisas i bin mekim bikpela wok long kamapim laik bilong God, na bai em i wok yet long mekim. Long rot bilong gutpela wok king Jisas i mekim long heven, yumi inap wetim gutpela samting i painim yumi. Tasol yumi no ken lusim tingting long olgeta wok em i bin mekim taim em i kamap man na em i stap long graun.

Long laik bilong em yet em i bin kam long graun na lainim yumi long Papa bilong em. Na em i makim ol gutpela pasin bilong Papa yumi mas bihainim. Taim yumi tingim pasin bilong em, em i no pret liklik, na em i gat bikpela save tru, na em i nambawan tisa, na em i no pret long i go pas, na em i gat bikpela sori long ol man, na em i bin karim bikpela pen tru na i dai olsem ofa bilong baim bek yumi na long dispela rot tasol yumi inap kisim laip i stap oltaim​—em nau, taim yumi tingim ol dispela samting, bel bilong yumi i kirap na yumi pilim tru gutpela pasin bilong em!

Yumi skelim pinis i stap na wok bilong Jisas na nau yumi pilim tru pasin bilong dispela man. Bel bilong yumi i kirap na yumi laik mekim tok wankain olsem Pontius Pailat, em i tok: “Lukim. Em hia dispela man.” Tru tumas, “dispela man” em i nambawan man tru i winim olgeta narapela man i bin i stap long graun!

Sapos yumi bilip long ofa bilong Jisas, hevi bilong sin na i dai yumi kisim long Adam inap tekewe long yumi, na Jisas inap kamap “Papa” bilong yumi, em “Papa bilong i stap oltaim oltaim.” Olgeta manmeri i laik kisim laip i stap oltaim, ol i mas kisim save long God na ol i mas kisim save long Pikinini bilong em tu, em Krais Jisas. Mipela laik bai yu kaunim dispela buk na lainim ol tok bilong en, na bai yu inap kisim dispela save bilong givim laip long yu! 1 Jon 2:17; 1:7; Jon 5:​28, 29; 3:16; 17:3; 19:5; Luk 23:43; Stat 1:28; 1 Korin 15:​24-28; Kamapim Tok Hait 20:​1-3, 6-10; 21:​3, 4; Aisaia 9:6.

▪ Ol manmeri i winim Armagedon na pikinini bilong ol, bai ol inap mekim wanem gutpela wok bilong amamas?

▪ Ol manmeri i winim Armagedon na pikinini bilong ol bai stap long Paradais, na husat moa bai ol i stap? Olsem wanem Jisas bai stap wantaim ol?

▪ Taim 1,000 yia i pinis, olgeta samting long graun bai stap olsem wanem? Na Jisas bai mekim wanem?

▪ Bilong wanem God bai larim Satan i lusim hul i no gat as? Tasol bihain bai wanem samting i painim Satan na olgeta lain i bihainim em?

▪ Olsem wanem Jisas inap kamap “Papa” bilong yumi, em “Papa bilong i stap oltaim oltaim”?