Sapta 82

Jisas i Go Bek Gen Long Jerusalem

BIHAIN liklik Jisas i kirap raun gen long ol taun na ol liklik ples na em i skulim ol man. Ating em i stap long distrik bilong Perea, tasol em i tingting long i go long Jerusalem.

Wanpela man i askim Jisas: “Bikpela, ating God bai i kisim bek wan wan man tasol, a?” Jisas i tok: “Yupela i mas taitim bun tru, bilong i go insait long liklik dua.” Em i tok olsem bilong kirapim ol long tingim samting ol i mas mekim bilong kisim laip i stap oltaim.

Ol i mas taitim bun tru, long wanem “planti man bai i laik i go insait, tasol bai ol i no inap.” Bilong wanem bai ol i no inap? Jisas i tok, ‘Bihain papa bilong haus bai i pasim dua. Na ol man bai i kam paitim dua na singaut olsem, “Bikpela, opim dua long mipela.” Na em bai bekim tok olsem, “Mi no save long yupela. Yupela ol man bilong mekim pasin nogut, yupela klia long mi.” ’

Ating ol dispela man i kam long taim i stret long ol yet. Tasol dua i pas pinis. Bilong i go insait, ol i mas i kam paslain long dispela taim, maski dispela i no stret long ol. Tru tumas, ol man i no laik kirap kwik long lotuim Jehova, sori tumas, bai ol i lus olgeta!

Planti Juda i no laik i go insait long dua na bihainim rot em God i putim bilong kisim laip i stap oltaim. Olsem na Jisas i tok, bai ol i tromoi ol dispela man i go ausait, na ol bai i krai nogut. Tasol sampela man bilong olgeta lain, olsem bilong ‘hap sankamap na hap san i go daun na hap not na hap saut,’ ol bai “i kam sindaun long kaikai insait long kingdom bilong God.”

Na Jisas i tok: “Sampela man nau ol i stap las tru [olsem ol narapela lain, em ol Juda i nolaik tru long ol, na sampela Juda yet em ol bikman bilong lotu Juda i daunim ol], ol bai i kamap namba wan. Na sampela man nau ol i stap namba wan [ol Juda i gat planti samting bilong skin na biknem long lotu], ol bai i stap las tru.” Dispela tok, “ol bai i stap las tru,” i makim olsem dispela lain i no ken i stap long Kingdom bilong God, long wanem ol i no laik taitim bun na ol i no tenkyu long God i bin singautim ol pastaim.

Orait nau ol Farisi i kam na i tokim Jisas: “Yu mas lusim dispela ples . . . Herot [Antipas] i laik kilim yu i dai.” Ating Herot yet i bin kirapim dispela tok win na bai Jisas i pret na i lusim dispela hap. Ating Herot i pret, nogut ol i kirap kilim i dai narapela profet bilong God na ol i pulim Herot i go insait long dispela, olsem em i bin insait long i dai bilong Jon Bilong Baptais. Tasol Jisas i tokim ol Farisi: “Yupela go tokim dispela weldok nogut olsem, ‘Harim. Nau na tumora bai mi rausim ol spirit nogut na mekim orait ol sikman. Na long de namba 3 bai mi pinisim wok bilong mi.’ ”

Orait Jisas i pinisim wok bilong em long dispela hap na em i wokabaut i go long Jerusalem, long wanem, olsem em i tok, “Profet i no ken i stap long narapela ples na ol i kilim em i dai. Nogat. Ol i mas kilim em i dai long Jerusalem tasol.” I gat wanem as na Jisas i ting ol bai kilim em i dai long Jerusalem? Long wanem, Jerusalem em i namba wan biktaun, na namba wan bikpela kaunsil [i gat 71 memba] i stap long en, na long dispela ples ol i save ofaim ol animal long God. Olsem na ol i no ken kilim i dai “Pikinini Sipsip Bilong God” long narapela hap​—ol i mas mekim long Jerusalem tasol.

Jisas i bel hevi na i tok: “Jerusalem, Jerusalem, yu save kilim ol profet i dai, na yu save kisim ol man God i salim i kam long yu na tromoi ston long ol bilong kilim ol i dai. Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en . . . Tasol yupela i no laik. Harim. Nau ples bilong yupela bai i bagarap na i stap nating.” Lain Juda i bin sakim Pikinini bilong God, olsem na bagarap i mas painim ol!

Orait Jisas i wokabaut yet i go long Jerusalem na wanpela hetman bilong ol Farisi i singautim em i go long haus bilong em. Em i de Sabat, na wanpela man i stap, skin bilong em i solap nogut. Ol man i was long Jisas, em bai mekim wanem long dispela sikman. Sampela Farisi na saveman bilong lo ol tu i stap, na Jisas i askim ol: “Ating yumi ken mekim orait ol sikman long de Sabat, o nogat?”

Olgeta i pasim maus na ol i no bekim tok. Olsem na Jisas i oraitim dispela man na salim em i go. Nau Jisas i tokim ol: “Sapos wanpela bilong yupela i lukim pikinini man bilong en o bulmakau bilong en i pundaun long hul wara long de Sabat, ating em bai i pulim dispela pikinini o bulmakau i kam antap kwiktaim, o nogat?” Na ol i no inap bekim tok. Luk 13:​22–14:6; Jon 1:29.

▪ Jisas i tok, man i mas mekim wanem bilong kisim laip oltaim? Bilong wanem dua i pas long planti man?

▪ Husat ol dispela man “i stap las tru” na ol bai i kamap namba wan? Na husat ol “i stap namba wan” na ol bai i stap las tru?

▪ Ating i gat wanem as na ol i tok Herot i laik kilim i dai Jisas?

▪ Bilong wanem ol i no ken kilim i dai profet long narapela hap​—ol i mas kilim em i dai long Jerusalem tasol?