Sapta 91

Jisas i Kirapim Bek Lasarus

ORAIT, nau Jisas wantaim dispela lain ol i kamap long matmat bilong Lasarus. Em wanpela hul bilong ston na wanpela bikpela ston i pasim ai bilong hul. Orait Jisas i tok: “Yupela rausim dispela ston.”

Marta i no save yet long samting Jisas i laik mekim, olsem na em i tok: “Bikpela, nau em i namba 4 de bilong em i stap long matmat. Olsem na smel nogut bai i kamap.”

Tasol Jisas i tok: “Pastaim mi tokim yu pinis, sapos yu bilip, orait yu bai lukim bikpela strong bilong God.”

Olsem na ol i rausim ston. Nau Jisas i lukluk antap na i beten olsem: “Papa, mi tenkyu long yu, long wanem, yu harim pinis beten bilong mi. . . . Tasol mi ting long ol manmeri i sanap hia na mi mekim dispela tok, bilong ol i ken save yu bin salim mi na mi kam.” Jisas i beten long ai bilong ol manmeri bambai ol i ken save, samting nau em i laik mekim, em bai mekim long strong em i kisim long God. Nau em i singaut strong: “Lasarus, yu kam ausait.”

Orait, Lasarus i kirap bek na i kam ausait. Laplap ol i bin pasim long lek na han na pes bilong em i stap yet long skin bilong em. Jisas i tokim ol: “Lusim laplap na larim em i wokabaut.”

Planti bilong ol dispela Juda i bin kam bilong krai sori wantaim Maria na Marta ol i lukim dispela bikpela mirakel Jisas i wokim na ol i bilip long em. Tasol sampela i go long ol Farisi bilong tokim ol long dispela samting. Kwiktaim ol Farisi wantaim ol bikpris i singautim ol kaunsil i kam bung.

Ol dispela kaunsil em Kaiafas, em hetpris bilong dispela yia, na sampela Farisi na Sadyusi na sampela hetpris bilong bipo. Ol i tok: “Bai yumi mekim wanem? Dispela man i save wokim planti mirakel. Sapos yumi larim em i mekim dispela kain pasin, orait bai olgeta manmeri bai i bilip long em. Na ol Rom bai i kam na bagarapim tempel bilong yumi wantaim ol lain bilong yumi.”

Tru ol dispela bikpela man bilong lotu ol i tokaut olsem Jisas “i save wokim planti mirakel,” tasol ol i tingim tasol bikpela namba na strong ol i holim. Na taim Jisas i kirapim bek Lasarus, dispela samting i daunim tru ol Sadyusi, long wanem ol i tok, ol man i dai pinis ol i no inap kirap bek.

Tasol Kaiafas i tok: “Yupela i no gat tingting tru. Ating yupela i no save long wanpela pasin em inap helpim yupela. I gutpela sapos wanpela man tasol i kisim ples bilong ol manmeri na i dai, nogut olgeta lain bilong yumi i lus.”

Yumi save, God yet i givim tingting long Kaiafas na em i mekim dispela tok, long wanem, bihain aposel Jon i raitim tok long Baibel olsem: “Kaiafas i no mekim dispela tok long tingting bilong em yet.” Tru Kaiafas yet i laik tok olsem ol i mas kilim i dai Jisas bambai em i no ken daunim moa namba na strong ol i holim bilong bosim ol man. Tasol olsem Jon i tok, ‘Kaiafas i mekim dispela tok profet na i tok, Jisas i no dai bilong helpim ol Juda tasol. Em i dai bilong bungim olgeta pikinini bilong God ol i stap nabaut.’ Na tru tumas, God i laik bai Pikinini bilong em i dai bilong baim bek olgeta man.

Kaiafas i kirapim pinis bel bilong ol kaunsil na ol i stretim toktok bilong kilim i dai Jisas. Tasol wanpela bilong ol dispela kaunsil, em Nikodemus, em i save laikim Jisas na ating em i toksave long Jisas, olsem na Jisas i lusim dispela ples. Jon 11:​38-54.

▪ Taim Jisas i laik kirapim bek Lasarus, bilong wanem em i beten long ai bilong olgeta man?

▪ Ol man i lukim Lasarus i kirap bek ol i mekim wanem?

▪ Olsem wanem yumi save, ol dispela kaunsil i man nogut tru?

▪ Kaiafas yet i laik mekim wanem? Tasol God i mekim wok long em bilong autim wanem tok profet?