Sapta 12

Jisas i Kisim Baptais

JON i kirap long autim tok na 6-pela mun bihain, taim Jisas i gat 30 krismas, Jisas i kam long Jon long wara Jordan. Bilong wanem em i kam? Ating em i laik toktok nating wantaim Jon, o em i laik save long wok bilong Jon na em i kam? Nogat. Em i laik baptais.

Tasol Jon i tok: “Mobeta mi kisim baptais long yu. Olsem wanem na yu kam long mi?” Jon i save, kasen brata bilong em, Jisas, em i Pikinini bilong God. Taim Maria i gat bel long Jisas em i go lukim Elisabet, em mama bilong Jon. Long dispela taim Elisabet i gat bel long Jon, na taim Maria i kam, dispela pikinini i stap long bel bilong Elisabet i amamas na i kalap. Ating bihain mama bilong Jon i tokim em long dispela samting i bin kamap. Na ating em i bin tokim Jon tu long ensel i bin tokaut long ol wasman bilong sipsip taim Maria i karim Jisas, na ol narapela ensel tu i kamap long ol.

Olsem na Jon i save gut long Jisas. Na em i save, baptais em i givim long ol man i no olsem baptais bilong Jisas. Long wanem Jon i baptaisim ol man bilong makim ol i tanim bel pinis, tasol Jisas i no gat sin na i no gat wok long em i tanim bel. Jon i strong long em i no ken givim baptais long Jisas, tasol Jisas i tok: “Maski, nau yu mas mekim olsem mi tok. Long dispela pasin bai yumi inapim olgeta samting God i laik bai yumi mas mekim.”

Bilong wanem i stret Jisas i mas kisim baptais? I no bilong makim em i tanim bel. Baptais bilong Jisas i makim olsem em i givim skin bilong em long God bilong mekim laik bilong God. Jisas i bin mekim wok kamda, tasol nau em i mas kirap mekim dispela wok God i bin salim em bilong mekim. Olsem wanem? Yu ting Jon i wetim narapela kain samting bai kamap taim em i givim baptais long Jisas?

Bihain Jon i tok, God i bin salim em bilong baptaisim ol man long wara, na God i tokim em, “Taim yu lukim Holi Spirit i kam daun na i stap long wanpela man, orait em dispela man tasol i kam bilong baptaisim ol manmeri long Holi Spirit.” Olsem na Jon i save spirit holi i mas kam daun long wanpela man em i givim baptais long em. Orait, taim Jisas i lusim wara i kam antap na Jon i lukim “Holi Spirit i kam daun long em” olsem wanpela pisin, ating Jon i no kirap nogut.

Tasol narapela samting tu i kamap taim Jisas i baptais. “Heven i op” long em. Dispela i makim olsem: Taim em i baptais, em i kisim bek tingting long i stap bilong em bipo long heven. Nau em inap tingim olgeta samting em i bin mekim taim em i stap wanpela pikinini spirit bilong God long heven, na em inap tingim olgeta tok God i bin givim long em taim em i no kam daun yet long graun.

Na taim Jisas i baptais, wanpela maus long heven i singaut na i tok: “Dispela em i Pikinini bilong mi. Mi laikim em tumas.” Em maus bilong husat? Yu ting em maus bilong Jisas? Nogat! Em maus bilong God. Tru tumas, Jisas em i Pikinini bilong God; em i no God yet olsem sampela man i save tok.

Tasol em i wanpela pikinini bilong God long graun, wankain olsem Adam. Luk i stori long Jisas i baptais na i tok: “Taim Jisas i kirapim wok bilong en, em i gat samting olsem 30 krismas. Na ol manmeri i ting em i pikinini bilong Josep.” Na nau Luk i kolim nem bilong ol tumbuna bilong Jisas, olsem Heli, Devit, Abraham, Noa, Adam, na Luk i tok: “Adam em i pikinini bilong God.”

Orait Jisas i wankain olsem Adam​—em tu i wanpela “pikinini bilong God” long graun. Jisas em i nambawan man tru i winim ol narapela man i bin i stap long graun, na dispela bai kamap ples klia taim yumi skelim ol wok em i bin mekim long graun. Tasol taim Jisas i kisim baptais, God i kapsaitim spirit holi long em na em i kamap wanpela pikinini bilong God long spirit. I olsem nau God i singautim em bilong bihainim rot i go bek long heven, long wanem nau bai em i kirap mekim wok na bai em i lusim laip bilong em olsem ofa bilong baim bek ol man, na em i no ken kisim bek dispela laip bilong graun. Matyu 3:​13-17; Luk 3:​21-38; 1:​34-36, 44; 2:​10-14; Jon 1:​32-34; Hibru 10:​5-9.

▪ Olsem wanem Jon i save gut long Jisas?

▪ Jisas i no bin mekim wanpela rong, orait bilong wanem em i kisim baptais?

▪ Jon i save long wanem samting na taim spirit holi i kam daun long Jisas ating Jon i no kirap nogut?