Sapta 42

Jisas i Krosim Ol Farisi

JISAS i tok, sapos em i rausim ol spirit nogut long strong bilong Satan, orait lain bilong Satan i bruk pinis. Na Jisas i tok moa olsem: “Sapos diwai i gutpela, orait kaikai bilong en tu bai i gutpela. Na sapos diwai i nogut, orait kaikai bilong en tu bai i nogut. Ol man i save lukim kaikai [bilong diwai] pastaim, na ol i save, diwai em i gutpela o em i nogut.”

Jisas i mekim gutpela wok long rausim ol spirit nogut. Tasol ol man i tok em i mekim wok bilong Satan. Sapos kaikai i gutpela, orait diwai i no nogut. Tasol kaikai ol Farisi i kamapim em nogut​—ol i sutim tok long Jisas na ol i birua long em, tasol i no gat as long ol i mekim olsem. Ol i kamapim kaikai nogut, olsem na yumi save, ol i man nogut. Jisas i tok: “Yupela man nogut, . . . Olsem wanem na yupela inap mekim gutpela tok? Maus bilong man em i save autim kain tingting i pulap long bel.”

Olsem na Jisas i tok: “[God] bai i tingting long olgeta toktok nabaut ol manmeri i bin mekim na em bai i skelim ol. Long tok bilong yu yet God bai i kolim yu stretpela man. Na long tok bilong yu yet em bai i kolim yu man nogut.”

Jisas i mekim planti strongpela wok, tasol ol saveman bilong lo na ol Farisi i tok: “Mipela i laik bai yu wokim wanpela mirakel olsem mak bilong soim mipela olsem yu mekim wok bilong God.” Ating ol yet i no bin lukim Jisas i wokim wanpela mirakel, tasol planti man i bin lukim long ai bilong ol yet. Olsem na Jisas i tokim ol: “Ol manmeri bilong dispela taim ol i lain manmeri nogut na ol i no save bel tru long God. Oltaim ol i save singaut long lukim mak. . . . Wanpela mak tasol bai ol i lukim, em mak bilong profet Jona.”

Jisas i kamapim insait bilong dispela tok bilong em, em i tok: “Jona i bin i stap tripela san na tripela nait insait long bel bilong bikpela pis, na olsem tasol Pikinini Bilong Man bai i stap tripela san na tripela nait insait long graun.” Pis i daunim Jona na bihain em i trautim Jona, na i olsem Jona i kirap bek long matmat. Jisas i laik tok bai em i dai na long namba tri de bai em i kirap bek. Tasol bihain, taim Jisas i kirap bek long matmat, ol hetman bilong lain Juda i no ken bilip long dispela “mak.”

Jisas i tok, ol Ninive i bin harim tok bilong Jona na tanim bel na dispela i kamapim rong bilong ol Juda, em ol i no harim tok bilong Jisas. Jisas i stori tu long kwin bilong kantri Seba em i kam harim Solomon i autim gutpela save bilong em, na Jisas i tok: “Tasol i gat wanpela man i stap hia, em i winim tru Solomon.”

Bihain Jisas i mekim tok piksa long wanpela man em spirit nogut i bin lusim em. Tasol em i no pulimapim gutpela samting long tingting bilong em, olsem na 7-pela spirit i moa nogut ol i kam i stap long em. Jisas i tok: “Pastaim dispela man i stap nogut, tasol nau em bai i stap nogut moa yet. Wankain pasin tasol bai i kamap long ol manmeri nogut bilong dispela taim.” Sampela taim ol Israel i bin bikhet long God, tasol bihain ol i stretim pasin bilong ol na kamap klin​—ol i olsem dispela man em spirit nogut i lusim em inap liklik taim. Tasol ol i sakim ol profet bilong God na ol i birua long Krais, olsem na nau ol i stap nogut moa yet, winim bilong bipo.

Jisas i toktok yet na wanpela man i tokim em: “Mama bilong yu wantaim ol brata bilong yu ol i sanap ausait, na ol i laik toktok wantaim yu.”

Jisas i tok: “Husat em i mama na brata bilong mi?” Na em i makim ol disaipel bilong em long han na em i tok: “Man o meri i save bihainim laik bilong Papa bilong mi i stap long heven, em i brata na susa na mama bilong mi.” Tru Jisas i laikim tumas ol wanblut bilong em, tasol dispela tok em i mekim i kamapim klia olsem em i pas moa yet wantaim ol disaipel bilong em. Matyu 12:​33-50; Mak 3:​31-35; Luk 8:​19-21.

▪ Ol Farisi i mekim wanem na yumi save ol i olsem diwai nogut i kamapim kaikai nogut?

▪ Wanem dispela “mak bilong profet Jona”? Bihain wanem samting i kamap na sampela man i no bilip long dispela mak?

▪ Olsem wanem lain Israel i kain olsem wanpela man em spirit nogut i bin lusim em?

▪ Jisas i tok wanem na yumi save em i pas tru wantaim ol disaipel bilong em?