Sapta 37

Jisas i Mekim Gut Bel Bilong Meri Wanpis

JISAS i oraitim pinis wokboi bilong kepten na bihain liklik em i go long taun Nain. Ol disaipel bilong Jisas na bikpela lain manmeri ol i go wantaim em. Long apinun ol i kamap klostu long Nain na ol i bungim sampela man ol i laik planim wanpela yangpela man i dai pinis na ol i karim skin bilong em i go ausait long taun.

Nau mama bilong dispela man i stap wanpis tru, long wanem bipo man bilong em i dai pinis na em i gat dispela wanpela pikinini tasol. Taim man bilong em i dai, pikinini bilong em i stap yet, na dispela inap mekim gut bel bilong em. Ating em i givim bel olgeta long dispela pikinini, na em i ting pikinini bai helpim em long olgeta samting. Tasol nau pikinini tu i dai na em i bel hevi tru na em i krai na wokabaut i go long ples matmat.

Jisas i lukim dispela meri na em i bel sori long em. Olsem na long pasin sori na long pasin bilong strongim bel, em i tokim meri: “Yu no ken krai.” Ol manmeri i kirap nogut long dispela tok na pasin bilong Jisas na ol i lukluk long em. Orait Jisas i go klostu na em i putim han long dispela bet em man i dai pinis i slip long en. Ol man i karim bet ol i sanap i stap. Ol i laik save, Jisas bai mekim wanem.

Ol manmeri i wokabaut wantaim Jisas ol i bin lukim em i oraitim planti sikman. Tasol ating ol i no bin lukim em i kirapim bek wanpela man i dai pinis. Tru em inap mekim olsem? Jisas i tokim man i dai pinis: “Yangpela man, mi tokim yu, yu kirap.” Olaman! Man i dai pinis i kirap na i sindaun! Em i kirap long toktok na Jisas i givim em long mama bilong em.

Taim ol manmeri i lukim yangpela man i kirap bek na i stap laip tru ol i kirap nogut na ol i tok: “Wanpela bikpela profet i kamap pinis namel long yumi.” “God i kam pinis bilong helpim ol manmeri bilong en.” Kwiktaim stori bilong dispela mirakel i go nabaut long olgeta hap bilong Judia na long ol narapela hap.

Jon Bilong Baptais i stap kalabus yet, tasol em i laik save moa long ol strongpela wok Jisas i mekim. Olsem na ol disaipel bilong Jon i go tokim em long olgeta samting Jisas i mekim. Jon i ting olsem wanem long ol dispela samting? Luk 7:11-18.

▪ Taim Jisas i kamap klostu long Nain, em i lukim sampela man i mekim wanem?

▪ Jisas i lukim dispela samting na bel bilong em i olsem wanem? Na em i mekim wanem?

▪ Ol man i lukim mirakel Jisas i wokim na ol i mekim wanem?