Sapta 70

Jisas i Oraitim Wanpela Aipas

OL JUDA i laik tromoi ston long Jisas bilong kilim em i dai, tasol Jisas i no lusim Jerusalem. Bihain liklik, long de Sabat, em wantaim ol disaipel i wokabaut long taun, na ol i lukim wanpela aipas, em mama i karim em olsem. Ol disaipel i askim Jisas: “Husat i mekim sin na taim mama i karim dispela man em i kamap aipas? Dispela man yet i mekim sin, o papamama bilong en i mekim sin?”

Ating ol disaipel i wankain olsem sampela tisa bilong lotu Juda, em ol i bilip olsem pikinini i stap yet long bel bilong mama em inap mekim sin. Tasol Jisas i tok: “Dispela man i no mekim sin, na papamama bilong en tu i no mekim sin. Nogat. Dispela samting i bin kamap bai ol manmeri i ken lukim . . . na wok bilong God i ken kamap ples klia long ol.” I no sin bilong dispela man o papamama bilong em na em i kamap aipas. Nogat. Sin bilong Adam i mekim na nau skin bilong olgeta man i no gutpela olgeta, na sampela i aipas samting taim mama i karim ol. Tasol long rot bilong dispela aipas Jisas inap mekim wok bilong God i kamap ples klia long ol man.

Jisas i toksave olsem yumi mas hariap mekim wok bilong God, em i tok: “Nau em i tulait yet, na yumi mas mekim wok bilong God, . . . Tudak bai i kamap, na ol man bai i no inap mekim wanpela wok. Taim mi stap yet long dispela graun, mi yet mi lait bilong dispela graun.” Klostu nau na bai Jisas i dai na i stap long tudak bilong matmat, na bai em i no inap mekim wanpela samting. Tasol taim em i stap laip yet em i stap olsem lait bilong dispela graun.

Jisas i tok olsem na nau em i spet long graun. Em i tanim spet wantaim graun na putim long ai bilong dispela aipas na i tokim em: “Yu go waswas long hul wara Siloam.” Dispela man i mekim olsem na nau, long namba wan taim, em inap lukluk! Em i amamas tru!

Ol wanples bilong em na ol narapela man i save long em, ol i kirap nogut na ol i tok: “Olsem wanem? Ating em dispela man tasol bipo i save sindaun na askim ol man long mani?” Na sampela i tok: “Yes, em dispela man.” Tasol sampela ol i no bilip na ol i tok: “Nogat. Em i wankain olsem dispela man, tasol em i narapela.” Na dispela man i tok: “Em mi tasol.”

Ol i askim em: “Olsem wanem na ai bilong yu i gutpela?”

Em i tok: “Dispela man ol i kolim Jisas, em i tanim graun wantaim wara na i putim long ai bilong mi. Na em i tokim mi, ‘Yu go long hul wara Siloam na yu waswas.’ Olsem na mi go na mi waswas, na ai bilong mi i gutpela, na mi inap lukim gut ol samting.”

Na ol i askim em: “Dispela man i stap we?”

Em i tok: “Mi no save.”

Nau ol i kisim em i go long ol Farisi na ol tu i askim em, ai bilong em i kamap gutpela olsem wanem. Em i tok: “[Dispela man] i putim graun malumalum long ai bilong mi, na mi waswas, na mi inap lukim gut ol samting.”

Ol Farisi i no amamas long gutpela samting i painim dispela rabisman. Ol i daunim Jisas na ol i tok: “Yumi save, God i no salim dispela man i kam, long wanem, em i no save bihainim lo bilong de Sabat.” Tasol sampela Farisi i tok: “Olsem wanem na man i gat sin em inap wokim olkain mirakel olsem?” Na ol i bruk i go tupela lain.

Olsem na ol i askim dispela man: “Dispela man i mekim orait ai bilong yu, yu ting em i wanem kain man?”

Em i tok: “Em i wanpela profet.”

Ol Farisi i no bilip. Ol i ting Jisas i bin pasim tok wantaim dispela man long giamanim ol man. Olsem na ol i singautim papamama bilong em na givim sampela askim long ol, bilong save tru long dispela samting. Jon 8:59; 9:​1-18.

▪ Wanem samting i mekim na dispela man i aipas? Wanem samting i no mekim na em i aipas?

▪ Wanem dispela tudak bai kamap na man i no inap mekim wok?

▪ Taim Jisas i oraitim aipasman, ol manmeri i save long dispela man ol i mekim wanem?

▪ Aipasman inap lukluk na ol Farisi i gat wanem olkain tingting long dispela na ol i bruk?