Sapta 72

Jisas i Salim 70 i Go

NAU em mun Oktoba samting long yia 32. Jisas i bin baptais inap 3-pela yia pinis. Nau tasol Jisas wantaim ol disaipel i bin i go long Jerusalem long bung bilong Ol Bikpela De Bilong I Stap Long Haus Win, na ating ol i stap yet long dispela hap. Jisas i gat 6-pela mun moa bilong mekim wok bilong em na em i go autim tok long hap bilong Judia o long hapsait bilong wara Jordan long Perea.

Bihain long Pasova long yia 30, inap 8-pela mun Jisas i bin autim tok long hap bilong Judia. Tasol long Pasova bilong yia 31, ol Juda i painim rot bilong kilim em i dai, olsem na em i go long Galili na em i autim tok long dispela hap inap wanpela yia hap. Insait long dispela hap taim, em i kamapim wanpela bikpela lain ol i save gut long autim tok. Olsem na nau em i laik kirapim bikpela wok bilong mekim save autim tok long hap bilong Judia.

Em i salim 70 disaipel i go tupela tupela na ol i autim tok bilong Kingdom long hap bilong Judia. Ol i go pas long olgeta ples em Jisas wantaim ol aposel i tingting long i go autim tok long en.

Jisas i no salim ol i go long ol haus lotu​—em i salim ol i go long haus bilong ol man. Em i tok: “Sapos yupela i go insait long wanpela haus, orait pastaim yupela i mas tok olsem, ‘Ol manmeri bilong dispela haus i ken i stap bel isi.’ Na sapos wanpela man bilong bel isi i stap long dispela haus, orait gutpela tok bilong yupela i ken i go i stap long dispela man.” Na Jisas i tok: “Yupela i mas autim tok long ol olsem, ‘Kingdom bilong God i kam klostu pinis long yupela.’ ” Wanpela buk (Matthew Henry’s Commentary) i stori long wok bilong dispela 70 disaipel, na i tok: ‘Ol i bihainim pasin bilong Bikpela bilong ol, na wanem wanem hap ol i go long en, ol i autim tok long olgeta wan wan haus.’

Tok Jisas i givim long dispela 70 disaipel i wankain liklik long tok em i bin givim long 12-pela aposel inap olsem wanpela yia bipo, taim em i salim ol i go autim tok long Galili. Em i toksave long ol olsem sampela man bai birua long ol, na em i lainim ol long autim tok, na em i givim strong long ol bilong oraitim sik. Olsem na taim Jisas i kamap long hap ol disaipel i bin i go long en, bai planti man i amamas long bungim dispela Bikpela Man em i bin givim strong long ol disaipel na ol inap mekim ol dispela strongpela wok.

Ol 70 disaipel i go pas na Jisas i go bihain na ol i autim tok bilong Kingdom. I no longtaim na wok bilong ol i pinis na ol i kam bek long Jisas. Na ol i amamas na i tok: “Bikpela, mipela i bin kolim nem bilong yu, na ol spirit nogut tu ol i bihainim tok bilong mipela.” Jisas i amamas tru long wok ol i bin mekim, na em i tok: “Mi lukim Satan i lusim heven na i pundaun olsem lait bilong klaut i pairap. Harim. Mi givim pinis strong long yupela, na yupela bai inap krungutim ol snek na ol binatang bilong bagarapim man.”

Jisas i save, taim Kingdom bilong God i kamap long taim bilong pinis, ol bai rausim Satan na ol spirit nogut bilong em long heven. Tasol nau ol disaipel i bin rausim ol spirit nogut i stap long ol man, olsem na ol i ken save tru, Satan bai raus long heven long bihain. Dispela samting bai kamap tru, olsem na Jisas i tok, em i lukim Satan i lusim heven. Orait yumi ken save, taim Jisas i tok ol 70 disaipel bai i gat strong bilong krungutim ol snek na ol binatang nogut, em i tok piksa tasol. Tasol Jisas i tok: “Yupela i no ken amamas na tok olsem, ‘Ol spirit nogut ol i bihainim tok bilong mipela.’ Nogat. Yupela i mas amamas long God i raitim pinis nem bilong yupela long buk bilong en long heven.”

Jisas i amamas tru na em i litimapim nem bilong Papa bilong em, long wanem Papa i mekim bikpela wok long rot bilong ol dispela gutpela wokboi bilong em. Nau Jisas i tokim ol disaipel: “Ol man i lukim ol samting yupela i save lukim, ol i ken amamas. Mi tokim yupela, bipo planti profet na planti king ol i laik lukim ol samting nau yupela i lukim, tasol ol i no bin lukim. Na ol i laik harim dispela ol tok yupela i save harim, tasol ol i no bin harim.” Luk 10:​1-24; Matyu 10:​1-42; Kamapim Tok Hait 12:​7-12.

▪ Inap 3-pela yia Jisas i autim tok long wanem hap? Insait long laspela 6-pela mun bilong em long graun, em i autim tok we?

▪ Jisas i tokim ol 70 disaipel long i go we bilong painim ol manmeri na autim tok long ol?

▪ Bilong wanem Jisas inap tok em i lukim Satan i lusim heven na i pundaun?

▪ Ol 70 disaipel bai krungutim tru snek na binatang nogut o olsem wanem?