Sapta 27

Jisas i Singautim Matyu

JISAS i mekim orait dispela sikman, na bihain em i lusim Kaperneam na i go long raunwara Galili. Na bikpela lain manmeri i kam long em na em i kirap lainim ol. Em i wokabaut i go na em i lukim Matyu, narapela nem bilong em Livai, em i sindaun long haus takis. Jisas i tokim em: “Yu kam bihainim mi.”

Taim Jisas i no singautim yet Matyu, em i mas save long ol tok Jisas i lainim ol man long en, na i olsem tasol long Pita na Andru na Jems na Jon. Olsem na wantu tasol Matyu i kirap lusim wok bilong em na bihainim Jisas, olsem 4-pela i bin mekim.

Jisas i singautim Matyu, na ating bilong amamas long dispela Matyu i wokim wanpela bikpela kaikai long haus bilong em. Jisas wantaim ol disaipel i go long dispela kaikai, na planti wanwok bilong Matyu long bipo, ol tu i go. Ol Juda i save bel nogut long ol dispela man bilong kisim takis, long wanem ol i wokboi bilong ol Rom, na ol Juda i no laikim tru ol dispela Rom i bosim ples bilong ol. Na tu, planti man bilong kisim takis ol i save giamanim ol man na pulim bikpela mani moa long ol, winim skel bilong takis.

Sampela Farisi i lukim Jisas i kaikai wantaim ol dispela kain man na ol i tokim ol disaipel bilong Jisas: “Watpo tisa bilong yupela em i save kaikai wantaim ol man bilong kisim takis na ol man bilong mekim sin?” Jisas i harim dispela, na em i tok, “Ol man i no gat sik, ol i no save go long dokta. Nogat. Ol sikman tasol i save go long dokta. . . . Mi no kam bilong singautim ol stretpela man. Nogat. Mi kam bilong singautim ol man bilong mekim sin.”

Matyu i singautim ol dispela man bilong kisim takis i kam long dispela kaikai bambai ol i ken harim tok bilong Jisas na ol i ken orait bek long spirit. Olsem na Jisas i bung wantaim ol bilong helpim ol long kamap gutpela long ai bilong God. Ol Farisi i hambak na tingim ol yet ol i stretpela man, olsem na ol i tingting nogut long ol dispela man bilong kisim takis. Tasol Jisas i no tingting nogut long ol.

Jisas i marimari long ol man bilong sin, tasol i no olsem em i orait long sin bilong ol. Nogat. Em i sori long ol dispela man i gat sik long spirit olsem em i save sori long ol man i gat sik long skin. Taim em i oraitim wanpela lepraman em i kamapim bikpela sori bilong em. Em i putim han long lepraman na em i tok: “Mi laik. Yu kamap klin.” Yumi tu i mas sori long ol man na helpim ol. Na yumi mas wok strong moa long helpim ol long ol samting bilong spirit. Matyu 8:3; 9:​9-13; Mak 2:​13-17; Luk 5:​27-32.

▪ Matyu i stap we na Jisas i lukim em?

▪ Matyu i mekim wanem wok? Bilong wanem ol Juda i bel nogut long ol man i mekim dispela wok?

▪ Ol Farisi i sutim wanem tok long Jisas? Jisas i tok wanem?

▪ Bilong wanem Jisas i bung wantaim ol man bilong sin?