Sapta 99

Jisas i Skulim Ol Man Long Jeriko

JISAS wantaim ol bikpela lain i wokabaut wantaim em ol i kamap long Jeriko, em wanpela taun i stap longwe liklik long Jerusalem. I gat tupela hap bilong Jeriko​—wanpela hap em olpela taun bilong ol Juda, na wanpela em nupela taun bilong ol Rom i stap klostu liklik long en, inap olsem wanpela kilomita samting. Orait Jisas wantaim dispela lain i kam klostu long nupela taun, na tupela aipas i save singaut long mani samting ol i harim pairap bilong dispela lain. Nem bilong wanpela aipas em Bartimeus.

Tupela i harim olsem Jisas i kam, na tupela i singaut olsem: “Yu Pikinini Bilong Devit, yu mas sori long mitupela.” Ol manmeri i krosim tupela na tokim tupela long pasim maus, tasol tupela i singaut strong moa yet na mekim tok olsem.

Jisas i harim na em i sanap na i tokim ol man long singautim tupela aipas i kam. Ol i go long tupela na ol i tokim wanpela: “Bel bilong yu i ken strong. Yu kirap. Em i singautim yu.” Orait dispela aipas i tromoi saket bilong em na i sanap kwik na i go long Jisas.

Jisas i tok: “Yutupela i laik bai mi mekim wanem long yutupela?”

Tupela aipas i tok: “Bikpela, mitupela i laik bai yu opim ai bilong mitupela.”

Jisas i sori tru na i putim han long ai bilong tupela. Olsem Mak i stori long en, Jisas i tokim wanpela, “Yu ken i go. Bilip bilong yu i bin mekim yu i orait.” Na wantu tasol tupela aipas i lukluk, na ating tupela wantaim i kirap na litimapim nem bilong God. Olgeta man i lukim dispela na ol tu i litimapim nem bilong God. Kwiktaim Bartimeus na poroman bilong em i bihainim Jisas.

Orait Jisas i laik lusim Jeriko na i wokabaut i go na bikpela lain moa yet i kam bungim em. Ol i laik lukim dispela man em i bin oraitim ai bilong tupela aipas. Ol i pas pas klostu long Jisas, olsem na sampela i no inap lukim em. Wanpela em Sakius, em i bosim wok bilong kisim takis long hap bilong Jeriko. Em i sotpela man na em i no inap lukim Jisas.

Olsem na Sakius i ran i go pas na em i go antap long wanpela diwai fik na bai em i ken lukim Jisas. Em i save Jisas bai wokabaut i kam long dispela rot. Orait Jisas i kamap long dispela hap na em i lukluk i go antap long diwai na i tokim Sakius: “Yu kam daun hariap. Nau mi mas i stap long haus bilong yu.” Orait Sakius i kam daun hariap na em i amamas tru na i go pas long haus bilong redim ol samting bilong Jisas.

Tasol olgeta man i lukim dispela na ol i tok kros​—ol i ting i no stret Jisas i go long haus bilong kain man olsem. Sakius i bin giaman na pulim nating takis long ol man na em i kamap maniman.

Planti man ol i bihainim Jisas, na taim em i go insait long haus bilong Sakius ol i tok kros olsem: “Em i go i stap long haus bilong wanpela man bilong mekim sin.” Tasol Jisas i save, Sakius inap tanim bel. Na em nau, Sakius i kirap na i tok: “Bai mi tilim olgeta samting bilong mi long tupela hap na givim wanpela hap long ol rabisman. Na sapos mi bin giamanim wanpela man na stilim wanpela samting bilong en, orait bai mi bekim 4-pela samting long en.”

Sakius i kamapim long ples klia olsem em i tanim bel tru, long wanem, em i tilim wanpela hap bilong olgeta samting bilong em long ol rabisman, na em i mekim wok long ol narapela mani samting bilong em long bekim mani long ol man em i bin pulim mani bilong ol. Ating em inap lukim ol pepa bilong takis em i holim na em i ken save hamas mani em i mas bekim long ol. Olsem na em i tok promis long bekim inap 4-pela samting, olsem lo bilong God i tok: ‘Sapos wanpela man i stilim wanpela sipsip, em i mas bekim 4-pela sipsip.’

Jisas i amamas long dispela pasin em Sakius i tok long mekim bilong tilim ol samting bilong em, olsem na Jisas i tok: “Nau God i kisim bek pinis ol manmeri bilong dispela haus. Dispela man tu em i pikinini bilong Abraham. Pikinini Bilong Man i kam bilong painim ol man i lus na kisim bek ol.”

Bipo liklik Jisas i bin mekim tok piksa long wanpela yangpela man i lusim papa na bihain papa i kisim em bek. Orait nau wanpela man tru, em pastaim em i lus, tasol nau Jisas i kisim em bek. Ol hetman bilong lotu na lain bilong ol i kros long pasin bilong Jisas long helpim Sakius na ol kain man olsem, tasol Jisas i wok yet long painim na kisim bek ol pikinini bilong Abraham ol i lus. Matyu 20:​29-34; Mak 10:​46-52; Luk 18:​35–19:10; Kisim Bek 22:1.

▪ Ating Jisas i bungim we tupela aipas i save singaut long mani samting? Em i mekim wanem long tupela?

▪ Sakius em i husat? Na bilong wanem em i go antap long wanpela diwai?

▪ Olsem wanem Sakius i kamapim long ples klia olsem em i tanim bel tru?

▪ Dispela pasin Jisas i mekim long Sakius i ken lainim yumi long wanem samting?