Sapta 7

Jisas na Ol Saveman Bilong Ol Haiden

SAMPELA saveman bilong ol haiden ol i kam long hap bilong sankamap​—ol i save lukluk long ol sta bilong painim save. Taim ol i stap yet long ples, ol i lukim wanpela nupela sta, na ol i bihainim i kam longwe tru na ol i kamap long Jerusalem.

Taim ol i kamap pinis long Jerusalem, ol i askim olsem: “Nupela pikinini em king bilong ol Juda, em i stap we? Mipela i lukim sta bilong en . . . na mipela i kam bilong lotu long em.”

King Herot long Jerusalem i harim dispela tok na em i tingting planti. Em i singautim ol bikpris i kam na em i askim ol: “Dispela man God i bin promis long salim i kam . . . em bai i kamap long wanem ples?” Ol i kolim tok bilong Baibel na bekim tok long em olsem: “Long taun Betlehem.” Orait Herot i tokim ol man long kisim ol dispela saveman i kam long em na em i tokim ol, ‘Yupela go painim dispela pikinini, na taim yupela i lukim em pinis, orait yupela i kam toksave long mi, na bai mi tu mi go lotu long em.’ Tasol Herot i laik painim dispela pikinini bilong kilim em i dai!

Ol i wokabaut i go na olaman! Dispela sta ol i bin lukim long hap bilong sankamap em i go paslain long ol! Em i no wanpela sta nating; nogat; wanpela man i putim dispela bilong soim rot long ol. Ol dispela saveman bilong ol haiden i bihainim sta i go na bihain sta i sanap antap long haus Josep tupela Maria i stap long en.

Taim ol saveman bilong ol haiden i kam insait long haus, ol i lukim Maria i stap wantaim pikinini Jisas, nau em i bikpela liklik. Ol i brukim skru na lotu long pikinini. Ol i opim paus bilong ol na ol i givim sampela presen long em, olsem gol, na gutpela sanda na paura bilong kamapim smok smel. Bihain God i toksave long driman long ol i no ken i go bek long Herot na tokim em pikinini i stap we. Olsem na ol i bihainim narapela rot na ol i go bek long ples.

Yu ting husat i putim dispela sta bilong soim rot long ol dispela saveman bilong ol haiden? Yu mas tingim: Dispela sta i no kisim ol i go stret long Jisas long Betlehem, a? Em i kisim ol i go long King Herot long Jerusalem, em King Herot i laik kilim i dai Jisas. Tasol God i tokim ol dispela saveman ol i no ken i go bek long Herot, olsem na Herot i no inap mekim. Em nau yumi save, birua bilong God, em Satan, em i putim dispela sta, long wanem em i laik kilim i dai Jisas. Matyu 2:​1-12; Maika 5:2.

▪ Olsem wanem yumi save, dispela sta bilong ol saveman bilong ol haiden i no wanpela sta nating?

▪ Jisas i stap we taim ol saveman bilong ol haiden i painim em pinis?

▪ Olsem wanem yumi save Satan i putim dispela sta bilong soim rot long ol dispela saveman bilong ol haiden?