Sapta 11

Jon i Redim Rot

TAIM Jisas i gat 12-pela krismas em i bin givim askim long ol tisa long tempel. Orait, nau 17 yia i go pinis. Em yia 29 na olgeta man i wok long toktok long Jon, em kasen brata bilong Jisas. Jon i wok long autim tok klostu long wara Jordan.

Pasin na toktok bilong Jon i narapela kain. Em i putim klos ol i bin wokim long gras bilong kamel, na em i pasim let long bel. Em i save kaikai grasopa na hani bilong bus. Em i autim tok olsem: “Yupela tanim bel. Kingdom bilong heven em i kam klostu pinis.”

Ol man i harim tok bilong Jon ol i kirap nogut. Planti ol i save ol i mas tanim bel​—ol i mas senisim tingting bilong ol na ol i mas save, pasin ol i bihainim bipo i no gutpela. Olsem na planti man bilong ol ples klostu long wara Jordan, na bilong Jerusalem tu, ol i kam long Jon, na em i baptaisim ol. Em i putim ol i go daun insait tru long wara na apim ol i kam antap.

Jon i baptaisim ol bilong makim olsem ol i hevi long rong ol i bin mekim long kontrak bilong Lo God i wokim wantaim ol na ol i tanim bel pinis. Olsem na taim sampela man bilong lotu, olsem ol Farisi na Sadyusi, i kam bilong kisim baptais, Jon i tokim ol, ‘Yupela pikinini bilong snek nogut, pasin bilong yupela i mas soim olsem yupela i tanim bel pinis. Yupela i no ken tingting olsem “Abraham em i tumbuna papa bilong mipela.” God inap mekim ol dispela ston hia i kamap ol lain tumbuna pikinini bilong Abraham. Tamiok i stap pinis long as bilong diwai, na olgeta diwai i no save karim gutpela kaikai, em bai ol i katim na tromoi i go long paia.’

Planti man i harim tok bilong Jon, olsem na ol Juda i salim sampela pris na Livai i go askim Jon olsem: “Yu husat tru?”

Jon i tok: “Mi no dispela man God i makim bilong kisim bek ol manmeri bilong en.”

Olsem na ol i askim em: “Ating yu Elaija, a?”

Jon i tok: “Nogat.”

Ol i tok: “Ating yu dispela profet mipela i wetim?”

Jon i tok: “Nogat.”

Olsem na ol i askim em gen: “Yu husat tru? Mipela i mas bekim wanpela tok long ol man i bin salim mipela i kam. Yu tok wanem long yu yet?”

Orait na Jon i tok: “Mi dispela ‘maus bilong wanpela man i stap long ples i no gat man na i singaut olsem, “Stretim rot bilong Bikpela.” ’ Em i olsem bipo profet Aisaia i bin tok.”

Ol i tok: “Sapos yu no dispela man God i makim . . . , na yu no Elaija, na yu no dispela profet, orait watpo yu save givim baptais long ol manmeri?”

Jon i bekim tok olsem: “Mi save baptaisim ol long wara. Tasol i gat wanpela man i stap namel long yupela, na yupela i no save long em. Em i dispela man i kam bihain long mi.”

Jon i redim rot​—em i kirapim ol manmeri long tanim bel na bai ol i redi i stap na wetim Man bilong kisim bek ol, em man bilong kamap King, na taim em i kam, bai ol i bilip long em. Jon i stori long dispela Man na em i tok: “Man i kam bihain long mi, strong bilong en i winim strong bilong mi. Mi no gutpela man inap long karim su bilong em.” Na Jon i tok: “Man i kam bihain long mi, em i namba wan bilong mi. Long wanem, em i stap bipo, taim mi no kamap yet.”

Olsem na dispela tok Jon i autim, olsem “kingdom bilong heven em i kam klostu pinis,” em bilong tokaut long ol man olsem dispela king Jehova i bin makim, em Krais Jisas, em i laik kirap mekim wok bilong helpim ol. Jon 1:​6-8, 15-28; Matyu 3:​1-12; Luk 3:​1-18; Aposel 19:4.

▪ Jon em i wanem kain man?

▪ Bilong wanem Jon i givim baptais long ol man?

▪ Bilong wanem Jon inap tok olsem Kingdom i kam klostu?