Sapta 114

Kaikai Bilong Bikpela

TAIM Jisas i wasim pinis lek bilong ol aposel, em i kolim wanpela tok bilong Baibel long Buk Song 41:9 na em i tok: “Man i kaikai bret wantaim mi, em i litimapim lek bilong krungutim mi.” Nau bel bilong Jisas i hevi tumas na em i tok: “Wanpela bilong yupela bai i givim mi long han bilong ol man i birua long mi.”

Ol aposel i bel hevi tru na ol wan wan i askim Jisas: “Bikpela, ating yu tok long mi, a?” Judas Iskariot tu i givim dispela askim long Jisas. Na man i sindaun klostu long Jisas, em Jon, em i askim Jisas: “Bikpela, yu tok long husat?”

Jisas i tok: “Em wanpela namel long yupela 12-pela. Em wanpela man i bin kisim bret na putim insait long dis wantaim mi. Tru, Pikinini Bilong Man bai i dai, olsem buk bilong God i tok pinis long em i mas i dai. Tasol sori tumas long dispela man i givim Pikinini Bilong Man long han bilong ol birua. Mobeta mama i no bin karim dispela man.” Orait nau Satan i go insait gen long bel bilong Judas, long wanem bel bilong em i go nogut. Bihain, long dispela nait yet, Jisas i kolim Judas olsem “man bilong lus.”

Orait nau Jisas i tokim Judas: “Samting yu laik mekim, em yu mas mekim hariap.” Ol narapela aposel i no save long as bilong dispela tok bilong Jisas. Judas i save lukautim bokis mani, olsem na sampela i ting Jisas i tokim em long i go “baim ol samting bilong bikpela de bilong lotu,” o long i go givim ol samting long ol rabisman.

Judas i go ausait pinis, orait Jisas i kirapim wanpela nupela samting wantaim ol gutpela disaipel, em wanpela bung bilong tingim bikpela samting i laik kamap. Em i kisim bret na i tenkyu long God, na em i brukim na givim long ol disaipel, na em i tok: “Yupela kisim na kaikai.” Na em i tok: “Dispela em i bodi bilong mi, mi givim bilong helpim yupela. Yupela i mas mekim olsem bilong tingim mi.”

Taim olgeta wan wan i kaikai bret pinis, Jisas i kisim wanpela kap wain, ating em i namba 4 kap. Em i tenkyu long God na i givim long ol, na em i tokim ol long dring, na em i tok: “Dispela kap wain em i nupela kontrak mi mekim long blut bilong mi, em mi kapsaitim bilong helpim yupela.”

Olsem na dispela em i wanpela kaikai bilong tingim i dai bilong Jisas. Long olgeta yia long Nisan 14, ol i mas mekim dispela bung bilong tingim em, olsem em i tok. Taim ol man i mekim dispela bung ol i ken tingim bikpela samting tru Jisas wantaim Papa bilong em i bin mekim bilong wokim rot bambai ol man i ken lusim dai, em sin bilong Adam i bin kamapim. Long ol Juda i kamap disaipel bilong Jisas, dispela bung bai senisim Pasova.

Dispela nupela kontrak i kamap long rot bilong blut bilong Jisas na i senisim olpela kontrak bilong Lo. Jisas em i namelman bilong dispela nupela kontrak em God Jehova i mekim wantaim ol 144,000 Kristen em i bin makim ol long spirit holi. Dispela kontrak i opim rot bambai God i ken lusim sin bilong ol man, na tu, em i opim rot bilong kamapim wanpela lain bilong i stap king na pris long heven. Matyu 26:​21-29; Mak 14:​18-25; Luk 22:​19-23; Jon 13:​18-30; 17:12; 1 Korin 5:7.

▪ Jisas i kamapim wanem tok profet bilong Baibel i stori long wanpela poroman bilong em? Na em i tok wanem long insait bilong dispela tok profet?

▪ Bilong wanem ol aposel i bel hevi tru? Olgeta wan wan i givim wanem askim long Jisas?

▪ Jisas i tokim Judas long mekim wanem? Tasol ol narapela aposel i ting Jisas i laik bai Judas i mekim wanem?

▪ Taim Judas i go ausait pinis, Jisas i kamapim wanem nupela bung bilong lotu? Dispela i gat wanem wok bilong en?

▪ Husat ol i insait long nupela kontrak? Dispela kontrak i mekim wanem wok?