Sapta 112

Laspela Pasova Bilong Jisas i Klostu Pinis

TUNDE Nisan 11 i laik pinis, na Jisas i skulim pinis ol disaipel long maunten Oliv. Em i bin mekim bikpela wok tru long dispela de! Nau ol i wokabaut i go bek long Betani bilong slip, na ating long dispela taim yet em i tokim ol disaipel: “Yupela i save, tupela de tasol i stap, na [Pasova], em bai i kamap. Na bai ol i putim Pikinini Bilong Man long han bilong ol birua na bai ol i hangamapim em long diwai.”

Long Trinde Nisan 12 Jisas i malolo wantaim ol disaipel. Long asde em i bin krosim ol bikpris long ai bilong ol man, na em i save ol i laik painim rot bilong kilim em i dai. Olsem na long Trinde em i no kamap long ples klia, long wanem em i no laik bai wanpela samting i kamap na i pasim em long mekim Pasova wantaim ol aposel tumora long apinun.

Orait, ol bikpris na ol hetman i bung insait long banis bilong Hetpris Kaiafas. Ol i belhat long strongpela tok Jisas i bin givim long ol long asde, olsem na ol i wokim toktok bilong painim rot long giamanim Jisas na holimpas em bilong kilim em i dai. Tasol ol i tok olsem: “Yumi no ken mekim dispela samting long ol bikpela de bilong lotu. Nogut ol manmeri i lukim na ol i kros na kirapim pait.” Ol i pret long ol man, long wanem ol man i save laikim Jisas.

Taim ol dispela bikpris i wok long painim rot bilong kilim i dai Jisas, wanpela man i kamap long ol. Ol i kirap nogut, long wanem em i wanpela aposel bilong Jisas, em Judas Iskariot, em dispela man Satan i bin givim tingting nogut long em long kamapim Bikpela bilong em long ol birua! Judas i askim ol: “Sapos mi givim Jisas long han bilong yupela, yupela bai i givim wanem samting long mi?” Ol i amamas tru long dispela tok bilong Judas na ol i pasim tok long givim 30 mani silva long em, em pe bilong baim wanpela wokboi, olsem Lo bilong Moses i makim. Kirap long dispela taim Judas i wok long painim rot bilong givim Jisas long han bilong ol bikpris, taim i no gat planti man i stap wantaim Jisas.

Jisas i bin lusim Jeriko na em i kamap long Betani long Fraide, na nau em Trinde na san i go daun pinis na de Nisan 13 i kirap. Em namba 6 nait, na laspela nait, bilong Jisas long slip long Betani. Orait, long de bihain, olsem Fonde, em taim bilong redim ol samting bilong wokim Pasova. Ol i save wokim Pasova taim san i go daun pinis. Long dispela taim ol i mas kilim sipsip bilong Pasova na kukim long paia. Ol bai wokim Pasova we? Na husat bai redim ol samting bilong en?

Jisas i no tokaut long ol dispela samting; ating em i ting, nogut Judas i go toksave long ol bikpris na ol bai kam holim Jisas taim em i wokim Pasova wantaim ol disaipel. Tasol long Fonde long belo bek samting, Jisas i salim Pita na Jon i go na em i tokim tupela: “Yutupela go redim kaikai bilong yumi bilong dispela bikpela de.”

Tupela i askim em: “Yu laikim bai mitupela i go redim we?”

Jisas i tok: “Yutupela go insait long taun, na wanpela man i karim bikpela sospen wara bai i bungim yutupela long rot. Yutupela bihainim em i go insait long dispela haus em i go insait long en. Na yutupela i mas tokim papa bilong dispela haus olsem, ‘Tisa i askim yu, “Dispela rum i stap we na mi wantaim ol disaipel bilong mi i ken kaikai [Pasova]?” ’ Na bai em i soim yutupela wanpela bikpela rum i stap antap, em i gat tebol na sia samting. Yutupela redim kaikai long dispela rum.”

Ating papa bilong dispela haus em i wanpela disaipel bilong Jisas na em i save Jisas i laik wokim Pasova long haus bilong em. Olsem na taim Pita wantaim Jon i kamap long Jerusalem, olgeta samting i kamap olsem Jisas i bin tok. Orait tupela i redim sipsip na ol i redim olgeta narapela samting bambai Jisas wantaim 12-pela disaipel i ken kaikai Pasova. Matyu 26:​1-5, 14-19; Mak 14:​1, 2, 10-16; Luk 22:​1-13; Kisim Bek 21:32.

▪ Ating Jisas i mekim wanem long Trinde? Bilong wanem em i mekim olsem?

▪ Wanem bung i kamap long haus bilong hetpris? Na bilong wanem Judas i go lukim ol bikpris?

▪ Long Fonde Jisas i salim husat ol i go long Jerusalem? Ol i go bilong mekim wanem?

▪ Taim tupela i kamap long Jerusalem, wanem samting i kamap na tupela i pilim tru narapela kain save bilong Jisas?