Sapta 101

Long Betani, Long Haus Bilong Saimon

JISAS i lusim Jeriko long ples daun, na em i laik i go long Betani long ples maunten. Rot i go antap inap olsem 19 kilomita, olsem na em i mas wokabaut inap long dispela san olgeta. Betani em i ples bilong Lasarus wantaim tupela susa bilong em, olsem yumi stori pinis. Em i longwe long Jerusalem inap olsem 3-pela kilomita, na em i stap long hap sankamap bilong maunten Oliv.

Planti manmeri ol i kamap pinis long Jerusalem long lukim Pasova. Ol i bin kam paslain liklik na bai ol i ken mekim ol samting bilong lotu long kamap klin. Ating sampela i bin holim skin bilong wanpela man i dai pinis o ol i mekim ol narapela samting na nau ol i no klin long ol samting bilong lotu. Olsem na ol i bihainim pasin bilong lotu long kamap klin na bai ol i ken mekim Pasova. Ol i bin i kam pas na ol i bung long tempel, na planti ol i stori long Jisas, em bai kam long Pasova o nogat.

Long Jerusalem ol man i gat kain kain tingting long Jisas na ol i tok pait long en. Olgeta i save, ol hetman bilong lotu i laik holim em bilong kilim em i dai. Ol hetman i putim tok olsem: Sapos wanpela man i save em i stap we, orait dispela man i mas i kam na ripot long ol. Insait long sampela mun i go pinis, ol i laik holim em inap 3-pela taim bilong kilim em i dai​—long Ol Bikpela De Bilong I Stap Long Haus Win, na long Ol Bikpela De Bilong Makim Tempel Olsem Haus Bilong God Yet, na long taim Jisas i kirapim bek Lasarus. Olsem na nau ol man i toktok namel long ol yet, olsem: “Em bai i kam lukim ol bikpela de bilong lotu, o nogat?”

Pasova i save kamap long Nisan 14 olsem kalenda bilong ol Juda i makim. Orait, 6-pela de paslain long Pasova, Jisas i kamap long Betani. Em i kamap long Fraide long apinun, em kirap bilong Nisan 8. Em i no inap i go long Betani long Sarere, long wanem, i tambu long ol Juda i raun long de Sabat, kirap long taim san i go daun long Fraide na i go inap long taim san i go daun long Sarere. Ating Jisas i go long haus bilong Lasarus olsem em i bin mekim bipo, na em i slip long dispela haus long Fraide long nait.

Tasol wanpela man i stap long Betani, em Saimon, em i singautim Jisas wantaim lain bilong em i go kaikai wantaim em long Sarere long apinun. Bipo em i gat sik lepra, na ating Jisas i bin oraitim em. Marta na Maria tu i go. Marta i wok strong long redim kaikai na mekim gut long ol narapela manmeri i kam long kaikai. Tasol Maria i sindaun klostu long lek bilong Jisas na em i kirap mekim wanpela samting i skrapim bel bilong sampela.

Em i opim wanpela botol i gat gutpela wel sanda long en, inap olsem hap kilo. Dispela kain sanda i gat bikpela pe, inap olsem pe wanpela wokman i kisim long wanpela yia! Nau Maria i kapsaitim wel long het na lek bilong Jisas na em i mekim drai lek bilong Jisas long gras bilong em. Gutpela smel bilong sanda i kisim haus olgeta!

Ol disaipel i bel nogut long dispela na ol i tok: “Bilong wanem em i pinisim nating dispela sanda?” Na Judas Iskariot i tok: “Bilong wanem yumi no larim ol man i baim dispela sanda na yumi kisim 300 mani silva long en, na yumi givim long ol rabisman?” Tasol Judas i no tingim ol rabisman na em i tok olsem. Nogat. Em i save stilim mani i stap long bokis mani ol disaipel i lukautim.

Tasol Jisas i tok: “Yupela larim dispela meri. Watpo yupela i givim hevi long en? Em i bin mekim gutpela pasin tru long mi. Oltaim ol rabisman bai i stap wantaim yupela. . . . Tasol mi, bai mi no inap i stap wantaim yupela oltaim. . . . Em i putim sanda long bodi bilong mi bilong redim bodi bilong mi long matmat. . . . Long olgeta hap graun ol i go long en na autim gutnius, ol bai i toktok tu long samting dispela meri i bin mekim.”

Jisas i stap long Betani inap 24 aua samting na planti man i harim olsem em i stap long dispela hap. Olsem na planti ol i kam long haus bilong Saimon bilong lukim Jisas. Tasol ol i laik lukim Lasarus tu, long wanem em tu i stap long dispela haus. Olsem na ol bikpris i bung na ol i pasim tok long kilim i dai Jisas na Lasarus tu. As bilong en, em planti man i bilip long Jisas, long wanem ol i lukim dispela man Lasarus em Jisas i bin kirapim bek long matmat. Em nau, yumi save, ol dispela bikpris ol i man nogut tru! Jon 11:​55–12:11; Matyu 26:​6-13; Mak 14:​3-9; Aposel 1:12.

▪ Long tempel long Jerusalem ol man i toktok long wanem samting? Bilong wanem ol i toktok long dispela samting?

▪ Olsem wanem yumi ken save, Jisas i kamap long Betani long Fraide, na long Sarere nogat?

▪ Long Betani ating Jisas i stap long haus bilong husat long Sabat?

▪ Maria i mekim wanem na kros i kamap long en? Jisas i tok wanem bilong helpim Maria?

▪ Wanem samting i kamap na yumi save, ol bikpris i man nogut tru?