Sapta 132

Long Han Sut Bilong God

SPIRIT HOLI i kam daun long ol disaipel long de Pentikos na dispela i makim olsem Jisas i go kamap pinis long heven. Stiven i lukim samting olsem piksa na dispela tu i makim olsem Jisas i go kamap pinis. Stiven i strong long autim tok, olsem na ol birua i laik tromoi ston long em, na nau em i tok: “Mi lukim heven i op, na Pikinini Bilong Man em i sanap i stap long han sut bilong God.”

Jisas i stap long han sut bilong God na wetim Papa i tokim em, ‘Yu go mekim wok king namel long ol birua bilong yu.’ Tasol taim em i no kirap yet long mekim dispela wok, em i mekim wanem? Em i mekim wok king na bosim lain disaipel bilong em, em God i bin makim ol long spirit holi. Em i bosim wok bilong ol long autim tok, na em i redim ol bilong kamap king wantaim em long Kingdom bilong Papa long bihain, taim ol i dai na kirap bek.

Jisas i makim Sol (nem bilong em long tok Rom em Pol) long i go pas long wok bilong kamapim ol disaipel long ol narapela kantri. Sol i strong long bihainim Lo bilong God, tasol ol hetman bilong lotu Juda i paulim tingting bilong em, olsem na em i orait long ol man i kilim i dai Stiven, na em i kisim tok orait long Hetpris Kaiafas na em i go long Damaskus bilong painim ol man na meri i bihainim Jisas, na em i laik kalabusim ol na kisim ol i kam long Jerusalem. Tasol long rot, wantu wanpela strongpela lait bilong heven i kam daun long em, na em i pundaun long graun.

Wanpela maus long heven i tok: “Sol, Sol, bilong wanem yu wok long bagarapim mi? ” Sol i tok: “Bikpela, yu husat? ”

Maus i tok: “Mi Jisas, yu wok long bagarapim mi.”

Dispela lait i mekim na ai bilong Sol i tudak. Jisas i tokim em long i go insait long Damaskus na wet, na bai Jisas i tokim em long ol samting em i mas mekim. Wanpela disaipel bilong Jisas i stap, nem bilong em Ananaias, na nau Jisas i kamap long em long driman, na em i tokim Ananaias long Sol. Em i tok: “Mi makim em pinis long i go long ol arapela lain manmeri na long ol king, na long ol Israel tu, na autim nem bilong mi long ol.”

Jisas i helpim Sol (nau ol i kolim em Pol) na ol narapela man bilong autim tok, na wok bilong ol i kamap gutpela tru. Inap olsem 25 yia bihain long taim Jisas i bin kamap long Pol long rot, Pol i tok ol i bin autim tok “long olgeta manmeri i stap long graun.”

Na planti yia bihain Jisas i givim sampela driman long aposel Jon, em dispela aposel Jisas i laikim tumas. Long rot bilong ol dispela driman em Jon i stori long en long Kamapim Tok Hait, i olsem em i lukim Jisas i kam bek taim em i kisim pinis bikpela namba long Kingdom. Jon i tok, “Holi Spirit i kamap strong” long em na i olsem em i stap long “de bilong Bikpela.” Wanem dispela “de”?

Sapos yumi skelim gut tok profet bilong Jisas long las taim na ol narapela tok profet bilong Baibel, yumi inap save, dispela “de bilong Bikpela” i bin kirap long yia 1914​—em taim bilong yumi! Long yia 1914 Jisas i bin kam bek, tasol ol man i no inap lukim em, na i no gat bikpela bung samting. Ol disaipel tru tasol i save em i kam bek pinis. Long yia 1914, Jehova i tokim Jisas long i go mekim wok king namel long ol birua bilong em!

Jisas i bihainim tok bilong Papa na em i rausim Satan wantaim ol narapela spirit nogut long heven, na em i tromoi ol i kam daun long graun. Jon i lukim dispela samting long wanpela driman, na bihain em i harim wanpela maus long heven i tok: “Nau God bilong yumi em i kisim bek yumi pinis, na strong bilong en i kamap pinis long ples klia, na em i stap king. Na dispela man em i makim bilong kisim bek ol manmeri [Krais] . . . , em i kisim pinis bikpela namba na strong.” Em i kirap mekim wok king long yia 1914!

Ol lain i lotuim Jehova long heven ol “i ken amamas”! Tasol olsem wanem long ol lain bilong graun? Dispela maus long heven i tok moa olsem: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol.”

Nau yumi stap long dispela sotpela taim. Na Krais i wok long tilim ol man i go tupela lain​—bilong kisim laip long nupela taim God i laik kamapim o bilong bagarap. Long nau Krais i bosim wok bilong autim gutpela tok bilong Kingdom bilong God long olgeta hap bilong graun, na sapos yu harim dispela tok o yu sakim, Krais i tingim dispela samting na makim yu bilong kisim laip o bilong bagarap.

Taim dispela wok bilong tilim ol man i pinis, long rot bilong Krais Jisas bai God i pinisim olgeta wok Satan i bin kamapim long graun, na bai em i pinisim olgeta man i helpim dispela wok. Jisas bai pinisim olgeta pasin nogut long bikpela pait em Baibel i kolim Armagedon. Bihain Jisas, em nambatu bikpela man long God Jehova long heven na long graun, em bai kalabusim Satan wantaim ol spirit nogut long “hul i no gat as” inap 1,000 yia. Bai i olsem ol i dai pinis, long wanem bai ol i no inap mekim sampela wok. Aposel 7:​55-60; 8:​1-3; 9:​1-19; 16:​6-10; Buk Song 110:​1, 2; Hibru 10:12, 13; 1 Pita 3:22; Luk 22:​28-30; Kolosi 1:​13, 23; Kamapim Tok Hait 1:​1, 10; 12:​7-12; 16:​14-16; 20:​1-3; Matyu 24:14; 25:​31-33.

▪ Jisas i go antap long heven na em i sanap we? Em i wetim wanem samting?

▪ Jisas i go antap pinis long heven na em i bosim wanem lain? Em i mekim olsem wanem?

▪ “De bilong Bikpela” i kirap long wanem yia? Taim dispela de i kirap, wanem samting i kamap?

▪ I gat wanem wok long nau bilong tilim ol man na i mekim samting long yumi olgeta wan wan? Jisas i tingim wanem samting na em i skelim ol man na tilim ol i go tupela lain?

▪ Taim wok bilong tilim ol man i pinis, wanem ol samting bai kamap?