Sapta 83

Long Haus Bilong Farisi

JISAS i stap yet long haus bilong bikpela Farisi na nau tasol em i oraitim wanpela sikman. I gat sampela moa i stap long dispela kaikai, na Jisas i lukim ol i laik sindaun long ol namba wan sia. Orait em i kirap skulim ol long mekim pasin daun.

Jisas i tok: “Sapos wanpela man i singautim yu na yu go long bikpela kaikai bilong marit, yu no ken i go sindaun long namba wan sia. Nogut ol i makim pinis . . . long narapela man i gat biknem i winim nem bilong yu. Na bihain man i bin singautim yu em bai i kam tokim yu olsem, ‘Yu givim dispela namba wan sia long dispela man.’ Na bai yu sem nogut tru.

“Olsem na . . . yu mas i go sindaun long baksait tru. Yu mekim olsem, na dispela man i bin singautim yu em bai i kam na tokim yu, ‘Pren, yu kam sindaun long namba wan sia.’ Em i mekim olsem, na bai yu kisim biknem long ai bilong olgeta man i kaikai wantaim yu.” Na Jisas i tok: “Man i litimapim nem bilong em yet, bai God i daunim em. Tasol man i daunim em yet, bai God i litimapim em i go antap.”

Orait nau Jisas i givim tok long dispela Farisi i bin singautim em i kam long kaikai. Jisas i tokim em long pasin bilong wokim wanpela kaikai na God i amamas long dispela pasin. Jisas i tok: “Sapos yu mekim wanpela kaikai, yu no ken singautim ol pren na brata na wanlain bilong yu, na ol wanples i gat planti mani. Nogut bihain ol i bekim kaikai long yu. . . . yu mas singautim ol rabisman na ol man bodi bilong ol i bagarap na ol lek nogut na ol aipas. Ol dispela kain man i no inap bekim kaikai.”

Sapos man i singautim ol dispela kain taranguman i kam, em i ken amamas, long wanem Jisas i tok: “Bihain God bai i bekim dispela kaikai long yu, long taim ol stretpela man i kirap bek long matmat.” Jisas i tok olsem na wanpela man i kaikai wantaim Jisas em i tingim narapela kaikai. Em i tok: “Ol manmeri bai i sindaun kaikai insait long kingdom bilong God, ol i ken amamas.” Tasol i no olgeta i amamas long dispela gutpela samting ol inap mekim bihain. Olsem na Jisas i mekim wanpela tok piksa, olsem:

‘Wanpela man i laik mekim bikpela kaikai, na em i singautim planti man long i kam. Orait bihain em i tokim wokboi long go lukim ol man bipo em i bin singautim. Na wokboi i mas tokim ol olsem, “Yupela kam. Olgeta samting i redi pinis.” Tasol olgeta dispela man i tok long ol i no inap i go.’ Wanpela i tok, “Mi baim pinis wanpela gaden, na mi mas i go lukim.” Na narapela i tok, “Mi baim 10-pela bulmakau bilong wok, na mi laik i go traim ol.” Na narapela i tok, “Nau tasol mi marit. Olsem na mi no inap i kam.”

Tasol ol dispela man i giaman tasol! Sapos man i laik baim wanpela gaden o bulmakau, em i save lukim na skelim gut taim em i no baim yet. Na sapos wanpela man i marit nupela, dispela i no inap pasim em long i go long kain kaikai olsem. Olsem na taim bikman i harim ol dispela tok, em i belhat na i tokim wokboi bilong em:

“ ‘Yu go kwiktaim long olgeta . . . rot bilong dispela taun, na yu kisim ol rabisman, na ol man bodi bilong ol i bagarap, na ol aipas na ol lek nogut, na yu bringim ol i kam insait long haus bilong mi.’ Orait wokboi i mekim olsem pinis, na em i tok, ‘Bikman, . . . haus i no pulap yet.’ Na bikman i tokim wokboi olsem, ‘Yu lusim taun na yu go long olgeta bikrot na yu bihainim banis bilong ol gaden, na taim yu lukim ol manmeri yu tok strong long ol i mas i kam long kaikai bilong mi. Mi laik bai haus bilong mi i pulap. . . . olgeta dispela man bipo mi bin singautim, ol bai i no inap tru long kisim wanpela liklik hap kaikai bilong mi.’ ”

Wanem insait bilong dispela tok piksa? Em olsem: Dispela “bikman” i wokim kaikai em i makim God Jehova; “wokboi” i bringim tok i go long ol man, em i makim Krais Jisas; dispela “bikpela kaikai” i makim olsem rot i op long ol man na ol inap i go insait long lain bilong Kingdom bilong heven.

Ol namba wan lain bilong kisim tok long i kam insait long lain bilong Kingdom, em ol bikpela man bilong lotu Juda long taim bilong Jisas. Tasol ol i sakim dispela tok. Orait, kirap long de Pentikos long yia 33, namba tu singaut i go long ol rabisman na ol narapela man bilong lain Juda em ol bikpela man bilong lotu i daunim ol. Tasol i no planti man i kam bilong inapim 144,000 sia long Kingdom bilong God. Olsem na 3-pela yia samting bihain, olsem long yia 36, laspela singaut i go long ol man i no bilong lain Juda na ol i no bin katim skin. Na wok bilong bungim lain bilong Kingdom i stap yet long taim bilong yumi. Luk 14:​1-24.

▪ Olsem wanem Jisas i skulim ol man long mekim pasin daun?

▪ Taim man i wokim bikpela kaikai, em i ken mekim wanem na bai God i amamas long em? Bilong wanem man i ken amamas?

▪ Ol dispela man em bikman i singautim ol i kam long kaikai, olsem wanem yumi save ol i giaman taim ol i tok ol i no inap i kam?

▪ Ol samting long tok piksa bilong Jisas long “bikpela kaikai” ol i makim wanem samting?