Sapta 21

Long Haus Lotu Long As Ples Bilong Em

TAIM Jisas i kam bek long as ples bilong em, ating bel bilong ol Nasaret i kirap na ol i tingting long em. Em i bin lusim Nasaret inap wanpela yia samting bipo na em i go long Jon bilong kisim baptais. Long dispela taim em i wanpela kamda. Tasol nau ol man long planti hap ol i save long em, em i man bilong wokim ol mirakel. Ol man bilong Nasaret i laik bai em i wokim sampela mirakel namel long ol.

Ol i wet i stap na long de Sabat Jisas i go insait long haus lotu, olsem em i save mekim oltaim. Ol i mekim lotu na nau Jisas i kirap sanap bilong kaunim tok bilong God, na ol i givim buk bilong profet Aisaia long em. Em i opim long Aisaia sapta 61 na painim rait i stori long wanpela Man, em spirit bilong Jehova i stap long em.

Jisas i kaunim ol tok i stori long God i makim dispela Man bilong telimautim tok olsem ol kalabus i ken lusim kalabus na ol aipas i ken lukluk gen, na i stori long gutpela taim bilong Jehova. Kaunim pinis, orait em i bekim buk long man bilong lukautim ol buk, na em i sindaun. Na olgeta manmeri long haus lotu i lukluk long em. Orait, em i tokim ol: “Dispela tok . . . nau tasol em i kamap tru.”

Ol man i kirap nogut long “ol gutpela tok” i kamap long maus bilong Jisas na ol i tok: “Dispela man em i pikinini bilong Josep. Olsem wanem na em inap mekim olkain tok olsem?” Jisas i save ol i laik lukim em i wokim sampela mirakel, olsem na em i tokim ol: “Ating yupela bai i kisim dispela tok ol manmeri i save mekim na autim long mi, ‘Dokta, yu mas mekim orait skin bilong yu yet.’ Na bai yupela i tok, ‘Mipela i harim pinis tok long ol samting yu bin mekim long Kaperneam. Orait nau yu mas mekim ol wankain samting hia long as ples bilong yu.’ ” Ol dispela as ples bilong Jisas i pilim olsem Jisas i mas helpim ol wanples bilong em pastaim.

Jisas i save long tingting bilong ol, olsem na em i stori long sampela samting i bin kamap long bipo i makim stret ol. Em i tok, long taim bilong Elaija planti meri wanpis i stap long Israel, em man bilong ol i dai pinis, tasol God i salim Elaija i go long wanpela meri wanpis em i no bilong lain Israel. Elaija i wokim mirakel na kirapim bek pikinini bilong dispela meri. Na i olsem tu long taim bilong profet Elisa​—planti lepraman i stap long Israel, tasol Elisa i oraitim sik lepra bilong Naman bilong Siria tasol.

Dispela tok bilong Jisas i kamapim long ples klia pasin bilong ol​—ol i tingim ol yet tasol na ol i no bilip. Olsem na ol i belhat nogut na ol i kirap na rausim Jisas i go ausait long taun. Ol i bringim em i go long arere bilong wanpela maunten na ol i laik tromoi em i go daun. Tasol Jisas i wokabaut namel long ol na em i go pinis. Luk 4:​16-30; 1 King 17:​8-16; 2 King 5:​8-14.

▪ Bel bilong ol Nasaret i kirap na ol i tingting long husat?

▪ Ol i ting olsem wanem long tok bilong Jisas? Tasol bilong wanem ol i belhat?

▪ Ol i laik mekim wanem long Jisas?