Sapta 68

Long Namba Seven De Em i Lainim Ol Moa

OL SAMTING bilong namba 7 de bilong dispela bikpela bung i wok long kamap yet na Jisas i autim tok insait long “rum mani bilong tempel” (ol i kolim Ples Bung Bilong Ol Meri). Ol bokis mani i stap long dispela hap, na ol manmeri i save kam putim mani long en.

Long olgeta nait bilong dispela bung, i gat ol lait long dispela hap bilong tempel. I gat 4-pela traipela lam i stap, na olgeta wan wan lam i gat 4-pela dis em wel i pulap long en. Taim ol i laitim wel i stap long dispela 16 dis, bikpela lait tru i sut i go longwe. Nau Jisas i mekim narapela tok, na ating ol man i harim dispela tok ol i tingim dispela lait i stap long tempel. Jisas i tok: “Mi yet mi lait bilong graun. Man i bihainim mi, em bai i no inap wokabaut long tudak. Nogat. Em bai i gat lait bilong laip.”

Ol Farisi i no amamas long dispela tok bilong Jisas, na ol i tok: “Yu save tokaut long ol wok na pasin bilong yu yet. Olsem na ol man i no [ken] bilipim dispela tok yu autim.”

Jisas i tokim ol: “I tru, mi autim tok long pasin bilong mi yet. Tasol ol man i ken bilipim tok bilong mi, long wanem, mi save long ples mi kirap long en na mi kam, na mi save long ples mi bai i go long en. Tasol yupela i no save long as ples bilong mi. Na mi go we, em tu yupela i no save.” Na em i tok moa: “Mi yet mi save autim tok long ol wok na pasin bilong mi yet, na Papa i salim mi na mi kam, em tu i autim tok long wok na pasin bilong mi.”

Ol Farisi i tok: “Dispela Papa yu tok long en, em i stap we?”

Jisas i bekim tok olsem: “Yupela i no save long mi, na yupela i no save long Papa bilong mi. Sapos yupela i save long mi, orait yupela bai i save long Papa bilong mi tu.” Ol Farisi i laik holimpas Jisas, tasol i no gat wanpela man i mekim.

Jisas i tok: “Yupela i no inap i go long ples mi go long en.”

Ol Juda i tingting planti long dispela, na ol i tok: “Olsem wanem na em i tok, ‘Yupela i no inap i go long ples mi go long en’? Ating em bai i kilim i dai em yet?”

Jisas i tokim ol: “Yupela ol lain bilong daunbilo. Tasol mi, mi bilong antap. Yupela i bilong dispela graun. Tasol mi no bilong dispela graun.” “Sapos yupela i no bilip olsem [mi dispela Man], orait ol sin bilong yupela bai i stap yet, na yupela bai i dai.”

Jisas i toktok long taim em i bin stap yet long heven, na em i tok em i dispela man God i bin tok long salim i kam. Tasol ol i sakim Jisas na ol i tok: “Yu husat?”

Jisas i tok: “Mi tokim yupela pinis.” “Man i bin salim mi na mi kam, pasin bilong en i tru olgeta. Na olgeta tok mi harim long em, em mi save autim long ol manmeri bilong graun.” Na em i tok moa: “Taim yupela i litimapim Pikinini Bilong Man, orait yupela bai i save olsem, [mi dispela Man]. Na bai yupela i save, mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi. Papa i bin salim mi na mi kam, em i stap wantaim mi. Em i no lusim mi, na larim mi i stap wanpis. . . . long wanem, oltaim mi save mekim ol samting em i laikim.”

Taim Jisas i mekim dispela tok, planti ol i bilip long em. Na em i tokim ol: “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri.”

Ol birua bilong em i tok: “Mipela i lain bilong Abraham. I no gat wanpela taim mipela i bin i stap wokboi nating bilong wanpela man. Olsem na bilong wanem yu tok, ‘Yupela bai i kamap fri’?”

Narapela narapela lain i bin bosim ol Juda, tasol ol Juda i no laik ting ol i stap olsem wokboi nating aninit long ol dispela bos. Tasol Jisas i tok, tru ol i stap wokboi nating. Olsem wanem na ol i stap wokboi nating? Jisas i tok: “Tru tumas mi tokim yupela, olgeta man i save mekim sin, ol i stap wokboi nating bilong sin.”

Ol Juda i no bilip olsem ol i stap wokboi nating bilong sin, na dispela tingting inap nogutim ol. Jisas i tok: “Ol wokboi nating ol i no save stap long haus oltaim. Nogat. Pikinini tasol i save stap oltaim.” Wokboi nating i no inap kisim samting bilong bos taim bos i dai, na bos inap rausim wokboi long laik bilong em. Tasol pikinini i save stap oltaim long haus inap long taim em i dai.

Jisas i tok: “Sapos Pikinini i mekim yupela i kamap fri, orait yupela i stap fri tru.” Olsem na dispela tok i tru i mekim man i kamap fri, em tok i tru i stori long dispela Pikinini, em Krais Jisas. Long ofa bilong Krais tasol yumi inap lusim kalabus bilong sin. Jon 8:​12-36.

▪ Long namba 7 de Jisas i autim tok we? Long olgeta nait, wanem samting i kamap long dispela hap? Olsem wanem dispela i stret wantaim tok Jisas i autim?

▪ Jisas i tok em i kam we? Dispela i mas helpim ol manmeri long save olsem wanem long em?

▪ Ol Juda i stap wokboi nating bilong wanem samting? Wanem tok i tru bai helpim ol long i stap fri?