Sapta 66

Long Ol Bikpela De Bilong i Stap Long Haus Win

KIRAP long taim Jisas i kisim baptais na i go inap 3-pela yia moa, planti man i kisim save long em. Planti tausen ol i bin lukim ol mirakel bilong em, na stori bilong dispela i go long olgeta hap. Nau ol manmeri i bung long Jerusalem long taim bilong Ol Bikpela De Bilong I Stap Long Haus Win, na ol i wok long painim Jisas.

Ol man i toktok planti long Jisas namel long ol yet. Sampela i tok: “Em i gutpela man.” Na sampela i tok: “Nogat. Em i save giamanim ol manmeri.” I gat kain tok olsem i kamap. Tasol olgeta i pret long mekim sampela tok bilong helpim Jisas, long wanem ol i ting ol bikman bilong ol Juda bai mekim nogut long ol.

Orait namel long ol dispela bikpela de, Jisas i kam na em i go insait long tempel, na ol man i kirap nogut long pasin bilong em long skulim ol. Em i no bin go long bikpela skul bilong lotu, olsem na ol Juda i tok: “Olsem wanem na [em] i gat ol dispela save?”

Jisas i tokim ol: “Dispela tok mi givim yupela, em i no bilong mi yet. Nogat. Em i bilong God . . . Sapos wanpela man i gat laik tru bilong bihainim tok bilong God, orait em bai i save tru long as bilong dispela tok mi autim. Em bai i save, dispela tok i kam long God, o em i kamap long tingting bilong mi yet.” Em i skulim ol man stret long lo bilong God. Olsem na ol man inap save, em i laik litimapim nem bilong God​—i no nem bilong em yet. Jisas i krosim ol na i tok: “Bipo Moses i bin givim lo long yupela. Tasol i no gat wanpela man namel long yupela i save bihainim dispela lo.”

Na Jisas i askim ol: “Watpo yupela i laik kilim mi i dai?”

Ol manmeri i kam long dispela bung, ol i no save ol man i laik kilim Jisas i dai. Ol i ting i no inap wanpela man i gat laik long kilim i dai dispela gutpela tisa. Olsem na ol i ting tingting bilong Jisas i paul na em i tok olsem. Ol i tokim em: “Ating wanpela spirit nogut i stap long yu. Husat i laik kilim yu i dai?”

Ol i no save ol hetman bilong lotu Juda i laik kilim Jisas i dai. Inap wanpela yia hap bipo, Jisas i bin oraitim wanpela man long de Sabat, na ol bos bilong lotu Juda i bin painim rot bilong kilim em i dai. Olsem na Jisas i kamapim tingting kranki bilong ol, na em i tok: “Yupela i laik bihainim gut lo bilong Moses, na yupela i save katim skin bilong pikinini long de Sabat. Orait sapos mi mekim orait tru bodi bilong wanpela man long de Sabat, watpo yupela i belhat long mi? Yupela i no ken skelim ol samting long ai nating. Yupela i mas skelim olgeta samting long pasin i stret.”

Ol manmeri bilong Jerusalem i save long dispela samting i bin kamap, na ol i tok: “Olsem wanem? Em dispela man tasol ol bikman i laik kilim em i dai. Na lukim. Em i mekim toktok long ples klia, na ol i no mekim wanpela tok long em. Ating ol i save, em i dispela man God i bin promis long salim i kam bilong kisim bek ol manmeri bilong en?” Ol Jerusalem ol i no bilip olsem Jisas em i Krais, olsem Man bilong kisim bek ol. Ol i kamapim as bilong dispela tingting bilong ol, na ol i tok: “Yumi save long as ples bilong dispela man. Na taim man God i bin promis long salim i kam, em i kamap, bai i no gat wanpela man i save long as ples bilong en.”

Jisas i tokim ol: “Yupela i ting yupela i save long mi, na yupela i save long as ples bilong mi, a? Tasol mi no kam long laik bilong mi yet. Papa i salim mi na mi kam. . . . tasol yupela i no save long em. Mi, mi save long em. Mi bin i stap wantaim em, na em i salim mi na mi kam.” Em i tok olsem, na nau ol i laik holim em​—ating ol i laik putim em long kalabus o kilim em i dai. Tasol ol i no inap, long wanem i no taim yet bilong Jisas i mas i dai.

Tasol planti ol i bilip long Jisas, long wanem em i bin wokabaut antap long wara, na em i mekim i dai win wantaim si, na em i kisim sampela bret na pis na givim kaikai long planti tausen manmeri, na oraitim sikman, na helpim lek nogut long wokabaut, na opim ai bilong ol aipas, na oraitim man i gat sik lepra, na kirapim bek man i dai pinis. Olsem na ol i tok: “Taim dispela man God i bin promis long salim i kam, em i kamap, ating em bai i wokim planti mirakel i winim ol mirakel dispela man hia i wokim?”

Taim ol Farisi i harim dispela tok ol man i mekim, ol bikpris na Farisi i salim ol plisman i go bilong holim Jisas. Jon 7:​11-32.

▪ Wanem taim Jisas i kam long bikpela bung long Jerusalem? Ol manmeri i tok wanem long Jisas?

▪ Ating i gat wanem as na sampela i tok Jisas i gat spirit nogut i stap long em?

▪ Ol manmeri long Jerusalem i ting olsem wanem long Jisas?

▪ I gat wanem as na planti ol i bilip long Jisas?