Sapta 51

Long Pati Bilong Betde Ol i Kilim Man i Dai

JISAS i givim sampela tok long ol aposel bilong em, na bihain em i salim ol i go tupela tupela. Ating Pita na brata bilong em Andru i go wantaim, na Jems wantaim brata bilong em Jon, na Filip wantaim Bartolomyu, na Tomas wantaim Matyu, na Jems wantaim Tadius, na Saimon wantaim Judas Iskariot. Dispela 6-pela lain i go nabaut, na long olgeta hap ol i go long en ol i autim gutpela tok bilong Kingdom na oraitim sik bilong man.

Jon Bilong Baptais i stap yet long kalabus. Em i kalabus klostu tupela yia pinis. Jon i bin tokaut klia olsem samting Herot i bin mekim i no stret; Herot i bin maritim Herodias, em meri bilong Filip, brata bilong Herot. Herot i tok em i bihainim Lo bilong Moses, olsem na Jon i tokaut long rong bilong Herot, em i brukim lo bilong marit na mekim pasin pamuk. Em nau, Herot i holimpas Jon na putim em long kalabus; ating Herodias i bin kirapim Herot long mekim olsem.

Herot i save Jon em i gutpela man, na em i save amamas long harim tok bilong Jon. Olsem na nau em i no save em bai mekim wanem long Jon. Tasol Herodias em i bel nogut tru long Jon, na em i wok long painim rot bilong kilim em i dai.

Paslain liklik long Pasova long yia 32, Herot i wokim wanpela bikpela pati bilong tingim de mama i karim em. Em i singautim ol bikman bilong distrik Galili. Ol i pati i stap na yangpela pikinini meri bilong Herodias na Filip, em Salome, i kam insait na danis. Ol man i sindaun lukim na ol i amamas tru long en.

Herot i amamas tru long Salome, na em i tok: “Mi bai givim yu wanem samting yu laikim. Yu tokim mi tasol, na bai mi givim yu.” Na em i mekim strongpela tok promis olsem: “Sapos yu tok long mi mas brukim kantri bilong mi long tupela hap na givim wanpela hap long yu, orait bai mi mekim.”

Salome i no bekim kwik tok. Em i go askim mama bilong em pastaim, olsem: “Bai mi tokim em long givim wanem samting long mi?”

Em nau, Herodias i painim pinis rot bilong kilim Jon i dai. Em i kirap tokim Salome, “Yu tokim em long kisim het bilong Jon Bilong Baptais na givim yu.”

Salome i go bek na tokim Herot: “Mi laik bai yu putim het bilong Jon Bilong Baptais long wanpela plet, na givim long mi.”

Herot i bel hevi tru. Tasol ol manmeri i sindaun kaikai wantaim em ol i bin harim dispela strongpela tok promis em i bin mekim, na em i no laik kisim sem long ai bilong ol, olsem na em i orait long dispela samting. Em i salim wanpela soldia i go katim nek bilong Jon na bihain soldia i putim het bilong Jon long wanpela plet na kisim i kam givim long Salome. Na Salome i go givim long mama bilong em. Taim ol disaipel bilong Jon i harim tok long dispela samting, ol i kam kisim bodi bilong Jon na karim i go planim long matmat, na bihain ol i go toksave long Jisas.

Bihain Herot i harim tok long Jisas i wok long oraitim sik bilong ol man na rausim spirit nogut long ol, na em i pret na tingting planti, long wanem em i ting Jisas em Jon i kirap bek long matmat. Olsem na em i laik tru long lukim Jisas bambai em i ken save, tru Jisas em i Jon o nogat? Matyu 10:​1-5; 11:1; 14:​1-12; Mak 6:​14-29; Luk 9:​7-9.

▪ Bilong wanem Jon i stap long kalabus? Bilong wanem Herot i no laik kilim em i dai?

▪ Wanem samting i kamap na nau Herodias i gat rot bilong kilim i dai Jon?

▪ Taim Jon i dai pinis, bilong wanem Herot i laik lukim Jisas?