Sapta 130

Long Raunwara Galili

NAU ol aposel i go bek long Galili, olsem Jisas i bin tokim ol. Tasol ol i no save gut long ol i mas mekim wanem. Olsem na bihain liklik, Pita i tokim Tomas na Nataniel na Jems wantaim brata bilong em Jon na tupela narapela aposel: “Mi bai go painim pis.”

Sikspela i tok: “Mipela tu bai i go wantaim yu.”

Long dispela nait olgeta ol i no kisim wanpela pis. San i laik kamap na ol i lukim Jisas i sanap i stap long nambis, tasol ol i no save olsem em Jisas. Jisas i singaut long ol na i tok: “Ol pikinini, ating yupela i gat sampela pis? ”

Ol i stap long raunwara, longwe liklik long nambis, na ol i singaut na tok: “Nogat.”

Jisas i tokim ol: “Tromoi umben long han sut bilong bot, na bai yupela i kisim sampela.” Ol i mekim olsem na ol i kisim planti pis moa, na ol i no inap pulim umben i kam antap.

Jon i tok: “Em Bikpela tasol.”

Pita i harim dispela tok na em i pasim saket na kalap i go daun long wara na subim wara i go long nambis (em inap 90 mita samting). Ol narapela i bihainim em long liklik bot na pulim umben i kam.

Ol i sua pinis na ol i lukim wanpela paia, na pis i stap long paia, na bret tu i stap. Jisas i tok: “Ol pis nau yupela i kisim, em yupela kisim sampela i kam.” Pita i kalap long bot na pulim umben i kam antap long nambis. I gat 153 bikpela pis long umben!

Jisas i tokim ol olsem: “Yupela kam kaikai.”

Ol disaipel i pret, na i no gat wanpela i askim em, “Yu husat? ” Olgeta i save em i Jisas. Em namba 7 taim em i kamap long ai bilong ol disaipel, bihain long em i kirap bek, na em i namba 3 taim em i kamap long lain aposel tasol. Nau Jisas i givim bret na pis long ol na ol i kaikai.

Ol i kaikai pinis na ating Jisas i lukluk long ol planti pis ol i bin kisim na em i tokim Pita, ‘ Saimon, pikinini bilong Jon, ating yu laikim mi moa yet, winim ol dispela, a? ’ Ating em i laik tok, ‘Yu laikim wok bilong kisim pis moa yet, winim wok mi redim yu bilong mekim? ’

Pita i tok: “Bikpela, yu save, mi laikim yu.”

Orait, Jisas i tokim em: “Yu lukautim ol pikinini sipsip bilong mi.”

Namba 2 taim Jisas i tok: “Saimon, pikinini bilong Jon, ating yu laikim mi, o nogat? ”

Pita i strong long tok: “Bikpela, yu save, mi laikim yu.”

Jisas i tokim em gen: “Yu was long ol sipsip bilong mi.”

Nau, long namba 3 taim, Jisas i tok: “Saimon, pikinini bilong Jon, ating yu laikim mi? ”

Pita i bel hevi na ating em i tingting planti, nogut Jisas i ting Pita i no givim bel tru long em. Long wanem liklik taim bipo, taim Jisas i kot na ol birua i laik kilim em i dai, inap 3-pela taim Pita i bin tok em i no save long Jisas. Olsem na nau Pita i tok: “Bikpela, yu save long olgeta samting. Yu save, mi laikim yu.”

Namba 3 taim Jisas i tokim em: “Yu lukautim ol sipsip bilong mi.”

Long rot bilong ol dispela tok Jisas i givim long Pita, Jisas i laik kirapim ol narapela long tingim gut dispela wok em i laik bai ol i mekim. I no longtaim na bai em i lusim graun, na em i laik bai ol i go pas long helpim ol manmeri ol bai kam insait long banis sipsip bilong God.

Jisas i mekim wok God i bin givim long em na ol birua i pasim em na kilim em i dai, na nau em i toksave olsem wankain hevi bai painim Pita. Em i tokim Pita: “Taim yu stap yangpela yet, yu save pasim let bilong yu yet na yu wokabaut long ples yu laik i go long en. Tasol taim yu kamap lapun, . . . narapela man bai i pasim let long yu na i kisim yu i go long ples yu no laik i go long en.” Maski dispela kain dai bai painim Pita, Jisas i tokim Pita: “Yu bihainim mi.”

Pita i tanim na i lukim Jon na em i tokim Jisas: “Bikpela, olsem wanem long dispela man? ”

Jisas i tok: “Sapos mi laik bai em i stap inap long taim mi kam bek, ating em i samting bilong yu, a? Yu bihainim mi.” Planti disaipel i ting dispela tok bilong Jisas i makim olsem aposel Jon i no inap i dai. Tasol bihain aposel Jon yet i tok, Jisas i no bin tok olsem em i no inap i dai; Jisas i bin tok tasol, “Sapos mi laik bai em i stap inap long taim mi kam bek, ating em i samting bilong yu, a? ”

Bihain Jon i autim tok tru olsem: “I gat planti arapela samting tu Jisas i bin mekim. Tasol sapos ol i laik raitim ol buk i gat tok long olgeta dispela samting wan wan, ating graun bilong yumi bai i no gat ples inap long yumi ken putim ol dispela buk.” Jon 21:​1-25; Matyu 26:32; 28:​7, 10.

▪ I gat wanem samting na yumi ken save, ol aposel i no save gut long ol samting ol i mas mekim long Galili?

▪ Olsem wanem ol aposel i luksave long Jisas long raunwara Galili?

▪ Nau Jisas i bin kamap long ai bilong ol disaipel hamas taim, bihain long em i kirap bek?

▪ Long wanem rot Jisas i kirapim ol aposel long tingim gut wok em i laik bai ol i mekim?

▪ Jisas i tok wanem bilong makim kain dai bai painim Pita?

▪ Planti disaipel i kisim wanem tingting kranki long sampela tok Jisas i bin mekim long Jon?