Sapta 3

Man Bilong Redim Rot Em i Kamap

TAIM bilong Elisabet i karim pikinini em i klostu. Inap 3-pela mun Maria i bin i stap wantaim Elisabet. Tasol nau Maria i mas lusim Elisabet na i go bek long ples bilong em long Nasaret, i longwe liklik. Inap 6-pela mun moa na bai em tu i karim pikinini.

Maria i lusim Elisabet na taim i kamap bilong Elisabet i karim pikinini. Em i karim gut pikinini na mama wantaim pikinini i orait! Ol wanples na ol wanlain bilong Elisabet ol i amamas wantaim em long dispela pikinini.

Lo bilong God i tok, long de namba 8 bilong pikinini man ol i mas katim skin bilong em. Olsem na long de namba 8 ol pren na ol wanlain i kam long haus. Ol i laik givim nem Sekaraia long pikinini, olsem nem bilong papa. Tasol Elisabet i tok, “Nogat. Yumi mas kolim nem bilong en Jon.” Ensel Gebriel i bin tok olsem. Yu tingim?

Tasol ol pren bilong tupela i tok: “I no gat wanpela bilong ol wanlain bilong yupela i gat dispela nem.” Na ol i mekim toktok long han na ol i askim papa, em i laik givim wanem nem long pikinini. Sekaraia i makim olsem em i laik kisim wanpela samting bambai em i ken raitim tok long en. Olgeta i kirap nogut, long wanem em i raitim tok olsem: “Nem bilong en Jon.”

Na nau tasol maus bilong Sekaraia i op na em inap toktok gen. Em wanpela mirakel! Maus bilong Sekaraia i pas, long wanem, taim ensel Gebriel i tokim em, em wantaim Elisabet bai kamapim pikinini, em i no bilipim dispela tok. Orait, taim maus bilong Sekaraia i op na em i kirap long toktok, ol wanples bilong em ol i kirap nogut tru na ol i tingting planti long bel bilong ol, na ol i tok: “Dispela pikinini bai i kamap wanem kain man?”

Na spirit holi i pulap long Sekaraia, na em i amamas na em i tok: “Yumi litimapim nem bilong God, Bikpela bilong Israel. Em i . . . helpim yumi manmeri bilong en, na em i kisim bek yumi. Long lain bilong wokboi bilong en Devit, Bikpela i kamapim wanpela strongpela man bilong kisim bek yumi.” Dispela “strongpela man” em Jisas, bihain bai mama i karim em. Sekaraia i tok, long rot bilong em God “i laik tekewe yumi long han bilong ol birua, na yumi ken holim wok bilong em, na yumi no ken pret. Olsem na olgeta taim yumi stap laip, yumi ken wokabaut long ol pasin i stret long ai bilong em.”

Nau Sekaraia i mekim tok profet long pikinini bilong em Jon, olsem: “Bihain bai ol i kolim yu profet bilong God Antap Tru. Bai yu go pas long [Jehova], bilong redim rot bilong en. Bai yu lainim ol manmeri bilong en na bai ol i save, long bikpela marimari bilong en, God i laik tekewe sin bilong ol na kisim bek ol. Bai em i salim tulait bilong heven i kam long yumi, bilong givim lait long ol man i stap long ples tudak. Bai em i stiaim lek bilong yumi, na bai yumi wokabaut long rot bilong bel isi.”

Nau Maria i kamap pinis long Nasaret na em i no marit yet. Orait, taim ol man i lukim em i gat bel, wanem samting bai kamap? Luk 1:​56-80; Wok Pris 12:​2, 3.

▪ Jon i kamap hamas mun paslain long Jisas?

▪ Long de namba 8 bihain long taim mama i karim Jon, wanem ol samting i kamap?

▪ God i helpim ol manmeri bilong em olsem wanem?

▪ Jon bai mekim wanem wok, olsem Sekaraia i tok profet long en?