Sapta 88

Maniman na Lasarus

JISAS i bin toktok long ol disaipel bilong em long stretpela wok ol i mas mekim long ol mani samting bilong dispela graun, na em i tok yumi no inap i stap wokboi bilong mani na bilong God tu wantaim. Ol Farisi tu i harim dispela tok, na ol i tok bilas long em, long wanem ol i save laikim mani. Olsem na em i tokim ol: “Yupela i laik bai ol man i ting, yupela i man bilong mekim stretpela pasin tasol. Tasol God i save long ol samting i stap hait long bel bilong yupela. Samting ol man i ting em i gutpela samting tru, em i samting nogut tru long ai bilong God.”

Bikpela senis i laik kamap long ol bikman bilong lotu ol i gat planti samting bilong skin na bikpela namba na strong bilong bosim ol man. Em taim bilong daunim ol dispela man na litimapim ol man i stap rabis long ol samting bilong God na ol i laik tru long kisim. Jisas i givim sampela tok moa long ol Farisi na em i makim dispela bikpela senis i laik kamap, em i tok:

“Tok bilong lo wantaim tok bilong ol profet em i stap inap long taim bilong Jon. Tasol stat long taim bilong Jon, gutnius bilong kingdom bilong God em i kamap long olgeta ples. Na olgeta man ol i strong tumas long i go insait long dispela kingdom. Skai wantaim graun bai inap lus. Tasol i no gat wanpela liklik hap tok bilong lo bilong God bai i lus.”

Ol saveman bilong lo na ol Farisi ol i save hambak na tok ol i save bihainim Lo bilong Moses. Yu tingim ol tok ol i bin mekim taim Jisas i opim ai bilong wanpela aipas long Jerusalem? Ol i bin hambak na tok: “Mipela i disaipel bilong Moses. Mipela i save pinis, God i bin givim tok long Moses.” Tasol nau Lo bilong Moses i mekim pinis wok bilong en bilong bringim ol man i go long King em God i bin makim, em Krais Jisas. Olsem na kirap long taim Jon i autim tok, olgeta kain kain man i wok strong long kamap lain bilong Kingdom, na ol man nating na ol rabisman i wok strong moa.

Olgeta samting bilong inapim Lo i wok long kamap, olsem na liklik taim na bai ol i no gat wok moa long bihainim. Lo i orait long ol i katim marit long kain kain as, tasol nau Jisas i tok: “Wanem man i lusim meri bilong en na i maritim narapela meri, em i mekim pasin pamuk. Na man i maritim wanpela meri, bipo man bilong en i bin lusim em, em tu i mekim pasin pamuk.” Ating ol Farisi i bel nogut long dispela tok, long wanem ol yet i orait long ol man i katim marit long kain kain as.

Nau Jisas i givim wanpela tok piksa long ol Farisi. Em i stori long tupela man na i stap bilong tupela i senis olgeta. Tupela man ya i makim husat? Na dispela senis i makim wanem samting?

Jisas i tok: “Bipo wanpela maniman i stap, na oltaim em i save putim naispela naispela siot na gutpela retpela klos. Na . . . em i save kisim gutpela gutpela kaikai. Na klostu long dua bilong haus bilong dispela maniman, wanpela rabisman i save slip i stap. Nem bilong dispela rabisman em Lasarus, na em i ting long kisim hap kaikai i pundaun aninit long tebol bilong dispela maniman, bilong em i ken kaikai. Ol sua i gat blut ol i pulap long skin bilong en, na ol dok i save kam rapim ol sua bilong en long tang bilong ol.”

Dispela maniman i makim ol hetman bilong lotu Juda, em ol Farisi na ol saveman bilong lo na ol Sadyusi na ol bikpris tu. Ol i gat “planti samting,” olsem ol wok bilong God ol inap mekim, na ol i mekim pasin wankain olsem dispela maniman. Retpela klos bilong maniman i makim olsem ol i bikpela man, na naispela waitpela siot i makim olsem ol i ting ol i stretpela man.

Dispela lain em maniman i makim, ol i gat pasin antap; ol i daunim tru ol man nating i stap rabis na tingim ol i olsem pipia nating (‛am ha·’aʹrets). Rabisman Lasarus i makim ol dispela man, em ol hetman bilong lotu i no save givim tru ol kaikai bilong spirit long ol na i pasim ol long mekim ol wok bilong God i stret ol i ken mekim. Long ai bilong ol hetman, ol dispela man nating i no klin long spirit​—i olsem ol i gat sua olsem Lasarus, na ol dok tasol i laik i go klostu long ol. Tasol ol i laik tru long kisim kaikai bilong spirit, olsem na ol i save wet long kisim liklik hap kaikai bilong spirit i pundaun aninit long tebol bilong maniman.

Nau Jisas i stori long bikpela senis i kamap long maniman na long Lasarus. Wanem dispela senis? Na em i makim wanem samting?

Senis i Kamap long Maniman

na Lasarus

Maniman i makim ol hetman bilong lotu ol i gat “planti samting,” olsem ol wok bilong God ol inap mekim, na Lasarus i makim ol man nating ol i hangre long kisim ol kaikai bilong spirit. Nau Jisas i stori long bikpela senis i kamap long i stap bilong tupela.

Em i tok: “Bihain dispela rabisman i dai, na ol ensel i karim em i go na putim em i stap wantaim Abraham. Na dispela maniman em tu i dai, na ol i planim em. Em i stap long ples bilong ol man i dai pinis na em i gat bikpela pen. Em i lukluk i go antap, na em i lukim Abraham i stap longwe tumas, na Lasarus i stap wantaim em.”

Maniman na Lasarus i no man tru; tupela i olsem piksa na i makim tupela lain. Olsem na i dai bilong tupela tu i olsem tok piksa. Orait, i dai bilong tupela i makim wanem samting?

Jisas i bin stori long wanpela bikpela senis i laik kamap, em i tok, ‘Tok bilong Lo na ol profet i stap inap long taim bilong Jon, tasol bihain gutnius bilong kingdom bilong God i kamap.’ Olsem na taim Jon na Krais Jisas i mekim wok autim tok, nau bikpela senis i kamap long i stap bilong dispela tupela lain em maniman na Lasarus i makim. I dai bilong tupela i makim dispela samting.

Ol man Lasarus i makim na ol i tanim bel, nau ol i no i stap hangre moa long ol samting bilong spirit. Bipo ol i wetim ol hetman bilong lotu i givim kaikai bilong spirit long ol na ol i bin kisim ol liklik hap kaikai i pundaun aninit long tebol, tasol nau ol i kisim planti tok i tru bilong Baibel em Jisas i autim long ol na ol inap tru. Long dispela rot i olsem ol i ‘go i stap wantaim Abraham’​—ol i stap gutpela long ai bilong ‘Bikpela Abraham,’ em God Jehova.

Ol man em maniman i makim, bipo i olsem ol i stap gutpela long ai bilong God, tasol bihain nogat, long wanem ol i sakim tok bilong Kingdom em Jisas i autim long ol man. I olsem ol i dai. Na Baibel i stori olsem ol i gat bikpela pen. Maniman i tok:

“Papa Abraham, yu mas . . . tokim Lasarus long kisim liklik wara long pinga bilong en na kam putim long tang bilong mi bai em i kol liklik. Mi stap long dispela paia na mi pilim pen nogut tru.” Ol disaipel bilong Jisas i autim tok long strafe bilong God bai painim dispela lain na i olsem paia i kukim ol. Ol dispela tok i givim bikpela pen long dispela lain, na ol i laik bai ol disaipel i no ken autim moa ol dispela tok, na bai pen bilong ol i ken pinis.

Tasol Abraham i tok, ‘Taim yu stap laip, yu bin kisim olgeta gutpela samting. Na Lasarus em i kisim olgeta samting nogut. Tasol nau long dispela ples, bel bilong en i stap gutpela. Na yu kisim pen nogut. Na tu, namel long mipela na yupela God i bin putim wanpela bikpela baret. Olsem na ol man i stap hia na i laik brukim dispela baret na i go long yupela, ol i no inap. Na ol man i stap long hap, ol i no inap brukim baret na i kam long mipela.’

I stret tru bikpela senis olsem i kamap long dispela tupela lain em Lasarus na maniman i piksa bilong ol! Dispela senis i kamap tru sampela mun bihain, olsem long de Pentikos long yia 33, long taim nupela kontrak i senisim olpela kontrak bilong Lo. Long dispela taim ol man inap save tru, God i orait long ol disaipel bilong Jisas na em i no orait long lain Farisi na ol narapela hetman bilong lotu Juda. Olsem na “bikpela baret” i stap namel long dispela lain na ol disaipel em i makim stretpela kot bilong God, olsem em i skelim pinis dispela lain na em i kolim pinis strafe bilong ol na em i no inap senisim dispela.

Nau maniman i tokim “papa Abraham”: “Yu salim Lasarus i go long haus bilong papa bilong mi. Mi gat 5-pela brata.” Em nau, maniman i tokaut olsem em i gat narapela papa. Dispela papa em Satan tasol. Maniman i laik bai Lasarus i no ken tokaut strong long kot bilong God, na bai ol “5-pela brata” bilong em, olsem ol wanlain bilong em long lotu, ol i no ken pilim pen.

“Tasol Abraham i tok, ‘Tok bilong Moses na bilong ol profet i stap. Ol i ken putim yau long dispela.’ ” Tru tumas, sapos ol “5-pela brata” i laik abrusim pen, ol i mas bilip long tok bilong Moses na bilong ol profet i makim olsem Jisas i dispela Man em God i bin tok long salim i kam, na ol i mas kamap disaipel bilong Jisas. Tasol maniman i tok: “Papa Abraham, nogat. Em i no inap. Tasol sapos wanpela man i dai pinis, em i kirap long matmat na i go long ol, orait ol bai inap tanim bel.”

Tasol Abraham i tok: “Sapos ol i no save harim tok bilong Moses na bilong ol profet, orait maski sapos wanpela man i kirap bek long matmat, dispela tu bai i no inap mekim ol i bilip.” God i no ken wokim ol narapela kain mak o mirakel bilong kirapim ol manmeri long bilip. Nogat. Sapos ol i laik bai God i orait long ol, ol i mas kaunim na bihainim ol tok bilong Baibel. Luk 16:​14-31; Jon 9:​28, 29; Matyu 19:​3-9; Galesia 3:24; Kolosi 2:14; Jon 8:44.

▪ Olsem wanem yumi save, i dai bilong maniman na bilong Lasarus i olsem tok piksa tasol? I dai bilong tupela i makim wanem samting?

▪ Taim Jon i kirap mekim wok bilong em, wanem senis i kamap, olsem Jisas i makim?

▪ Taim Jisas i dai pinis, wanem samting i pinis? Dispela i mekim wanem long pasin bilong katim marit?

▪ Long tok piksa bilong Jisas, maniman i makim wanem lain? Lasarus i makim wanem lain?

▪ Wanem dispela pen i painim maniman? Em i tok wanem bambai dispela pen i ken tekewe long em?

▪ “Bikpela baret” i makim wanem samting?

▪ Husat i papa tru bilong maniman? Husat i olsem ol 5-pela brata bilong em?