Sapta 29

Mekim Gutpela Wok Long De Sabat

NAU yia 31 i kirap. Sampela mun bipo Jisas i bin lusim Judia na i go long Galili na em i bungim meri bilong Samaria long hul wara.

Jisas i mekim bikpela wok bilong lainim ol man long Galili na nau em i lusim Galili na go bek gen long Judia. Em i autim tok long ol haus lotu long Judia. Baibel i mekim bikpela stori long ol wok Jisas i mekim long hap bilong Galili, tasol Baibel i no stori tumas long ol wok Jisas i mekim long dispela taim long Judia, o ol wok em i bin mekim bihain long Pasova bilong yia 30, taim em i stap sampela mun long Judia. Long Galili planti man i bin harim tok bilong em, tasol long Judia, ating nogat.

Bihain liklik Jisas i kirap i go long namba wan biktaun bilong Judia, em Jerusalem. Em i go bilong lukim Pasova bilong yia 31. Long Jerusalem, klostu long Bikpela Dua Bilong Ol Sipsip, i gat wanpela liklik hul wara i stap, ol i kolim Betesda. Planti sikman, na aipas, na lek nogut, ol i kam long dispela liklik hul wara. Ol i bilip olsem, taim hul wara i meknais na man i go daun insait long wara, orait bai sik bilong em i pinis.

Em i de Sabat na Jisas i lukim wanpela man i stap klostu long dispela liklik hul wara, em i gat sik inap long 38 yia. Jisas i save, em i sik longtaim pinis, na Jisas i tokim em: “Ating yu laik bai skin bilong yu i kamap gutpela?”

Sikman i tok: “Bikman, taim wara i mekim nais, mi no gat man i ken kisim mi i go na putim mi insait long hul wara. Mi yet mi laik i go, tasol ol arapela man i save go daun pastaim.”

Jisas i tokim em: “Yu sanap na kisim bet bilong yu na wokabaut.” Orait, wantu tasol skin bilong dispela man i kamap gutpela, na em i kisim bet bilong em na i wokabaut i go!

Taim ol Juda i lukim dispela man, ol i tok: “Nau em i de Sabat. I tambu long yu karim bet bilong yu raun.”

Em i bekim tok long ol, “Dispela man i mekim mi i orait, em i tokim mi olsem, ‘Kisim bet bilong yu na wokabaut.’ ”

Ol i askim em: “Wanem man i tokim yu, ‘Kisim bet bilong yu na wokabaut’?” Tasol dispela man i orait gen, em i no save, long wanem i gat planti manmeri i stap na Jisas i go pinis. Bihain Jisas i bungim em long tempel na nau em i save, Jisas i bin oraitim em.

Orait, dispela man i go na tokim ol Juda, Jisas i bin oraitim em. Ol Juda i harim dispela tok na ol i go long Jisas. Bilong wanem ol i go? Ating ol i laik save olsem wanem em inap mekim ol dispela gutpela wok? Nogat. Ol i laik krosim em, long wanem em i mekim dispela gutpela wok long wanpela de Sabat. Na ol i kirap mekim nogut long em! Luk 4:44; Jon 5:1-16.

▪ Jisas i lusim Judia na ating hamas mun i lus na nau em i go bek gen long Judia?

▪ Bilong wanem planti man i go long liklik hul wara ol i kolim Betesda?

▪ Jisas i wokim wanem mirakel long dispela liklik hul wara? Orait, ol Juda i kirap na tok wanem?