Sapta 46

Meri i Holim Klos Bilong Em

JISAS i bin i stap long Dekapolis na nau ol man i harim tok olsem em i laik i kam bek long Kaperneam, na bikpela lain manmeri i go bung long nambis na wetim em i kam. Ating ol i harim pinis olsem em i bin mekim dai bikpela win na si na em i bin rausim spirit nogut long tupela man. Taim bot i sua pinis na Jisas i lusim bot i go daun long nambis, ol manmeri i kam bung long em na ol i amamas.

Wanpela hetman bilong lotu, nem bilong em Jairus, em i wet long lukim Jisas. Em i brukim skru klostu long lek bilong Jisas na i krai long em olsem, “Liklik pikinini meri bilong mi klostu i laik i dai. Plis, yu mas kam putim han long em, na bai em i orait gen na i stap.” Jairus i gat wanpela pikinini tasol, olsem na Jairus i laikim tru em. Pikinini i gat 12-pela krismas.

Orait Jisas i wokabaut i go long haus bilong Jairus na planti manmeri i go wantaim em. Ol i amamas tru, long wanem ol i tingting long lukim narapela mirakel. Wanpela meri i stap em i gat bikpela hevi tru na tingting bilong em i stap long dispela.

Inap 12-pela yia em i save karim blut oltaim. Em i bin i go lukim planti dokta na i lusim olgeta mani bilong em long ol. Tasol i no gat wanpela i bin helpim em, na sik bilong em i go bikpela.

Dispela sik i mekim na skin bilong meri i no gat strong. Na tu, meri i sem long dispela sik. Sapos kain sik olsem i painim wanpela meri, meri i no laik tokaut long dispela long ai bilong ol man. Lo bilong Moses i tok, taim meri i karim blut em i no klin, na man o meri i putim han long em o long laplap bilong em i gat blut long en, em i mas go na waswas na em bai i stap olsem i no klin i go inap long apinun.

Dispela meri i bin harim stori bilong ol mirakel bilong Jisas, na nau em i laik painim Jisas. Em i save em i no klin, olsem na em i was gut na wokabaut isi isi namel long bikpela lain manmeri, na em i go klostu long Jisas. Em i tokim em yet: “Sapos mi putim han tasol long klos bilong em, bai mi orait gen.” Em i mekim olsem, na wantu sik bilong em i orait na blut i no kamap moa!

Kwiktaim Jisas i tok, “Husat i putim han long klos bilong mi?” Ating meri hia i kirap nogut long tok bilong Jisas! Olsem wanem na Jisas i save? Pita i tok, ‘Bikman, bikpela lain manmeri i sanap raunim yu, na ol i pas tru long yu. Na bilong wanem yu tok, “Husat i putim han long mi?” ’

Jisas i lukluk raun bilong save husat i bin holim klos bilong em. Em i tok: “Wanpela i bin putim han long mi. Mi pilim sampela strong i lusim mi na i go.” Taim meri i putim han long Jisas, sik bilong em i pinis na dispela i pulim sampela strong bilong Jisas.

Dispela meri i save nau, em i no inap hait long Jisas, olsem na meri i guria, na em i kam brukim skru klostu long lek bilong Jisas. Na long ai bilong olgeta manmeri em i tokaut long sik bilong em na olsem wanem dispela sik bilong em i orait nau.

Jisas i pilim tru hevi bilong dispela meri, na bel bilong em i sori long em, na Jisas i tokim em: “Pikinini, yu bilip long mi, olsem na yu kamap orait gen. Yu go, na bel bilong yu i ken i stap isi. Sik bilong yu i ken pinis.” Yumi amamas tru long kisim save olsem dispela man God i bin makim bilong bosim dispela graun, em i man bilong sori na em i gat strong bilong helpim ol manmeri! Matyu 9:​18-22; Mak 5:​21-34; Luk 8:​40-48; Wok Pris 15:​25-27.

▪ Jairus em i husat? Bilong wanem em i kam long Jisas?

▪ Wanpela meri i gat wanem hevi? Bilong wanem i hatwok long em i kam long Jisas bambai Jisas i ken helpim em?

▪ Olsem wanem na sik bilong meri i pinis? Na Jisas i strongim bel bilong em olsem wanem?