Sapta 15

Namba Wan Mirakel Jisas i Wokim

NAU tasol Andru na Pita na Jon na Filip na Nataniel, na ating Jems tu, ol i bin kamap disaipel. Ol i paslain long ol narapela. Nau ol i laik go bek long as ples bilong ol, em Galili. Ol i laik i go long wanpela kaikai bilong marit long taun Kana, em ples bilong Nataniel. Kana i stap long ples maunten klostu long taun Nasaret, em ples Jisas i bin i go bikpela long en.

Maria, em mama bilong Jisas, em tu i go long dispela kaikai. Maria i pren bilong famili bilong man na meri i laik marit na ating em i helpim ol long lukautim ol man i kam long kaikai. Olsem na taim em i lukim wain i sot, em i tokim Jisas: “Ol i no gat wain.”

I olsem Maria i tok Jisas i mas mekim samting bilong stretim dispela hevi. Tasol Jisas i no kirap kwik long mekim wanpela samting. Em i tok: “Mama, dispela em i samting bilong yu. Em i no samting bilong mi.” God i bin makim em bilong kamap King, olsem na famili bilong em na ol wantok i no ken bosim em. Maria i bihainim gutpela tingting na em i no mekim sampela tok moa. Em i tok tasol long ol wokman: “Sapos em i tokim yupela long mekim wanpela samting, orait yupela i mas mekim.”

I gat 6-pela sospen ston i stap, em ol inap pulimapim olsem 100 lita wara long olgeta wan wan. Jisas i tokim ol wokman: “Pulimapim wara long ol sospen.” Na ol i pulimapim tru. Jisas i tok: “Kisim sampela nau na karim i go long man i bosim kaikai.”

Bos bilong kaikai i laikim tru dispela wain. Em i no save dispela wain i bin kamap long rot bilong wanpela mirakel. Em i tokim man i marit: “Olgeta man i save tilim gutpela wain pastaim. Na taim ol man i dring planti pinis, orait ol i save tilim wain i nogut liklik. Tasol yu, yu bin pasim gutpela wain, na nau tasol yu kisim i kam.”

Dispela em i namba wan mirakel Jisas i wokim. Taim ol nupela disaipel bilong Jisas i lukim dispela samting Jisas i mekim, dispela i strongim bilip bilong ol. Bihain, ol yet wantaim mama na ol brata bilong Jisas ol i go daun long taun Kaperneam i stap klostu long raunwara Galili. Jon 2:​1-12.

▪ Dispela marit long Kana i kamap long wanem taim?

▪ I gat wanem as na Jisas i no bihainim kwik tok bilong mama?

▪ Jisas i wokim wanem mirakel? Dispela samting i mekim wanem long ol man?