Sapta 18

Nem Bilong Jon i Go Daun, Nem Bilong Jisas i Kamap Bikpela

PASOVA bilong yia 30 i pinis na bihain Jisas wantaim ol disaipel i lusim Jerusalem. Tasol ol i no i go bek long ples bilong ol long Galili. Ol i raun long hap bilong Judia na ol i baptaisim sampela man. Inap wanpela yia pinis Jon Bilong Baptais i bin mekim wankain wok na sampela disaipel i bung yet wantaim em.

Jisas yet em i no baptaisim sampela man, tasol em i tokim ol disaipel long mekim. Baptais ol i givim long ol man i wankain olsem baptais bilong Jon. Dispela baptais i makim olsem ol Juda i tanim bel na ol i hevi long ol rong ol i bin mekim long kontrak bilong Lo God i kamapim. Tasol taim Jisas i kirap bek em i tokim ol disaipel long givim baptais long ol man na dispela baptais i makim narapela samting. Baptais Kristen i makim man i givim bel olgeta long God Jehova, olsem dediket long Em, bilong mekim wok bilong Em.

Nau tasol Jisas i kirap mekim wok bilong em na em i no wok wantaim Jon, tasol tupela i mekim wok bilong lainim na baptaisim ol man i tanim bel. Ol disaipel bilong Jon i bel nogut long wok bilong Jisas na ol i tokim Jon: “Tisa, . . . dispela man nau em i givim baptais long ol manmeri, na olgeta ol i go long em.”

Jon i no bel nogut long dispela samting; em i amamas long wok bilong Jisas i kamap gutpela. Em i laik bai ol disaipel bilong em tu i amamas long dispela na em i tokim ol: “Yupela yet i harim pinis dispela tok mi mekim bipo, ‘Mi no dispela man God i makim bilong kisim bek ol manmeri bilong en, tasol God i salim mi na mi kam paslain long em.’ ” Na bihain Jon i mekim gutpela tok piksa, olsem: “Sapos wanpela man i maritim meri, orait dispela meri em i bilong dispela man i maritim em. Na poroman bilong dispela man em i save sanap na putim yau na amamas tru long harim tok bilong dispela man i marit. Olsem tasol nau amamas i pulap long bel bilong mi.”

Jon em poroman bilong dispela Man i laik marit, na 6-pela mun bipo em i amamas long tokim ol disaipel bilong em long dispela Man, em Jisas. Sampela i go bihainim Jisas na ol inap kamap lain bilong em long heven, olsem meri bilong em; ol Kristen God i makim long spirit holi ol i bilong dispela lain. Tasol sampela disaipel i bihainim yet Jon na em i laik bai ol tu i mas bihainim Jisas, long wanem wok bilong Jon em bilong redim rot tasol bambai wok bilong Jisas i ken kamap gutpela. Jon i tok: “Nem bilong em i mas kamap bikpela, na nem bilong mi i mas i go daun.”

Wanpela nupela disaipel bilong Jisas, em Jon, bipo em i disaipel bilong Jon Bilong Baptais, em i stori long Jisas i kam we na long wok bilong Jisas long kisim bek ol man na em i tok: “Man i kam long heven, em i antap long olgeta samting. . . . Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip.”

Liklik taim bihain King Herot i salim ol man i go holim Jon. Herot i bin kisim Herodias i stap olsem meri bilong em, tasol Herodias em i meri bilong brata bilong em Filip. Taim Jon i tokaut olsem dispela pasin i no stret, Herot i putim Jon long kalabus. Jisas i harim tok olsem Jon i stap long kalabus na em wantaim ol disaipel bilong em i lusim Judia na ol i go long Galili. Jon 3:​22–4:3; Aposel 19:4; Matyu 28:19; 2 Korin 11:2; Mak 1:14; 6:​17-20.

▪ Taim Jisas i no dai na kirap bek yet na em i tokim ol disaipel long givim baptais long ol man, dispela baptais i makim wanem samting? Olsem wanem long baptais ol i givim long ol man bihain long taim Jisas i kirap bek?

▪ Olsem wanem Jon i helpim ol disaipel bilong em long save i no stret ol i bel nogut long wok bilong Jisas?

▪ Bilong wanem Jon i kalabus?