Sapta 71

Ol Farisi i No Laik Bilip

TAIM ol Farisi i singautim papamama bilong dispela rabisman bipo em i aipas, tupela i pret. Ol i save, sapos wanpela man i tok em i bilip long Jisas, ol Farisi bai tambuim em long i kam long lotu, na bai ol wanples i no laik poroman wantaim em. Em nau, sapos em i gat meri pikinini na ol i stap rabis, dispela inap givim bikpela hevi long ol. Olsem na papamama bilong dispela man i tingting planti.

Ol Farisi i tok: “Dispela em i pikinini bilong yutupela, a? Na taim mama i karim em, em i stap aipas pinis, yutupela i tok olsem, a? Orait, olsem wanem na em i save lukluk nau?”

Papamama i tok: “Mitupela i save, dispela em i pikinini bilong mitupela. Na taim mama i karim em, em i stap aipas, . . . Tasol nau ai bilong en i op olsem wanem, em mitupela i no save.” Ating pikinini bilong ol i bin tokim ol long samting i bin kamap, tasol ol i pret liklik na ol i tok: “Yupela i mas askim em. Em i bikpela pinis. Em i ken autim tok bilong em yet.”

Olsem na ol Farisi i singautim gen dispela man. Tasol nau ol i laik pretim em na ol i tok ol i painim pinis sampela rong long Jisas. Ol i tok: “Yu mas litimapim nem bilong God, na mekim strongpela promis long mekim tok tru tasol. Mipela i save, dispela man yu bin tok long en, em i man bilong sin.”

Dispela man pastaim em i aipas, em i tok: “Em i man bilong mekim sin, o nogat, em mi no save. Wanpela samting tasol mi save. Bipo mi stap aipas, tasol nau ai bilong mi i op.”

Ol Farisi i laik trikim em, na ol i askim em gen: “Em i mekim wanem long yu? Em i opim ai bilong yu olsem wanem?”

Dispela man i tok: “Mi tokim yupela pinis, tasol yupela i no laik harim. Bilong wanem na yupela i laik harim planti taim?” Na em i askim ol: “Ating yupela tu i laik kamap disaipel bilong em, a?”

Dispela tok i mekim na ol Farisi i belhat nogut tru, na ol i tok: “Yu tasol yu disaipel bilong en. Tasol mipela i disaipel bilong Moses. Mipela i save pinis, God i bin givim tok long Moses. Tasol dispela man i kamap we, em mipela i no save.”

Dispela rabisman i kirap nogut, na em i tok: “Yupela i mekim narakain tok tru. Dispela man i mekim ai bilong mi i op, na yupela i tok, yupela i no save, em i kamap we.” Nau em i kamapim tok long wanpela samting ol man i save long en, em i tok: “Yumi save, God i no save harim tok bilong ol man bilong mekim sin. . . . Long bipo tru na i kam inap nau i no gat stori bilong wanpela man em i stap aipas long taim mama i karim em, na bihain wanpela man i opim ai bilong em.” Olsem na olgeta i mas save, “Sapos God i no bin salim dispela man i kam, orait em i no inap mekim wanpela samting.”

Ol Farisi i no inap bekim tok long dispela man. Ol i no laik bilip long tok i tru, olsem na ol i tok bilas long em, olsem: “Pasin bilong sin i pas tru long yu, stat long taim mama i karim yu na i kam inap nau. Na yu laik skulim mipela, a?” Na ol i rausim em i go; ating ol i tambuim em long i kam moa long haus lotu.

Jisas i harim stori bilong dispela na em i go painim dispela man na i tok: “Yu bilip long Pikinini Bilong Man, o nogat?”

Dispela man i tok: “Bikman, dispela Pikinini Bilong Man em husat? Yu tokim mi na mi ken bilip long em.”

Na Jisas i tok: “Yu lukim em pinis. Em dispela man nau i toktok wantaim yu.”

Wantu man i brukim skru na i tok: “Bikpela, mi bilip.”

Na Jisas i tokim em: “Mi kam long dispela graun bilong skelim pasin bilong ol manmeri. Olsem na ol man i stap aipas, ol bai i lukluk. Na ol man i save lukluk, ol bai i kamap aipas.”

Sampela Farisi i harim dispela tok na ol i askim em: “Yu laik tok olsem mipela tu i aipas, a?” Sapos ol i tokaut olsem tru ol i aipas, olsem tingting bilong ol i pas, bai ol i no gat bikpela asua tumas long pasin birua ol i mekim long Jisas. Jisas i tokim ol: “Sapos ai bilong yupela i pas, orait yupela bai i no gat asua bilong sin.” Tasol ol i strong long tok ol i no aipas, na i no gat wok long wanpela i helpim ol long save long ol samting bilong God. Olsem na Jisas i tokim ol: “Yupela i save tok, ‘Ai bilong mipela i save lukluk.’ Olsem na sin bilong yupela i stap yet.” Jon 9:​19-41.

▪ Taim ol Farisi i singautim papamama bilong dispela man pastaim em i aipas, bilong wanem tupela i pret? Tupela i tok wanem long ol Farisi?

▪ Ol Farisi i tok wanem bilong pretim dispela man?

▪ Dispela man i tok wanem na ol Farisi i belhat nogut tru?

▪ Bilong wanem ol Farisi i gat asua long mekim pasin birua long Jisas?