Sapta 41

Ol Man i Gat Kain Kain Tingting Long Jisas

JISAS i kaikai pinis long haus bilong Saimon na bihain liklik em i kirapim namba tu raun bilong autim tok long Galili. Bipo, taim Jisas i raun long dispela hap, ol nupela disaipel, em Pita na Andru na Jems na Jon i go wantaim em. Tasol nau ol 12-pela aposel wantaim sampela meri i go wantaim em, olsem Maria bilong Makdala, na Susana, na Joana em meri bilong wanpela bosman bilong haus bilong King Herot.

Wok bilong Jisas i go bikpela na ol man i gat narapela narapela tingting long en. Ol i bringim wanpela man long Jisas i gat spirit nogut i stap long em na em i aipas na mauspas. Jisas i rausim spirit nogut na nau man inap toktok na lukluk. Ol manmeri i lukim dispela samting na ol i kirap nogut na i tok, “Ating dispela man em i Pikinini Bilong Devit, a?”

Bikpela lain manmeri i wok long bung bung ausait long haus Jisas i stap long en, olsem na Jisas na ol disaipel i no gat taim bilong kaikai. Sampela i ting Jisas em i “Pikinini Bilong Devit,” tasol sampela saveman bilong lo na ol Farisi ol i bin lusim Jerusalem i kam bilong daunim Jisas. Taim ol wanblut bilong Jisas i harim olsem bikpela toktok i kamap long Jisas, ol i kam bilong kisim em i go. I gat wanem as na ol i laik kisim em i go?

Long dispela taim ol brata bilong Jisas ol i no bilip olsem em i Pikinini Bilong God. Na ol samting Jisas i mekim i kamapim bikpela toktok na ol man i bung na paitim tok i go i kam. Taim Jisas i yangpela yet long Nasaret, em i no bin mekim pasin i kirapim kros pait olsem nau em i mekim. Olsem na ol brata bilong Jisas i ting Jisas i gat bikpela sik long tingting. Ol i tok, “Em i longlong pinis.” Olsem na ol i laik kisim em i go.

Taim Jisas i oraitim dispela man i gat spirit nogut i stap long em, ol man i bin lukim. Na ol saveman bilong lo na ol Farisi i save ol i no inap tok olsem Jisas i no bin wokim dispela mirakel. Olsem na ol i tok: “Dispela man i save rausim ol spirit nogut long strong bilong Belsebul tasol, em hetman bilong ol spirit nogut.”

Jisas i save long tingting bilong ol na em i tokim ol, “Sapos ol man bilong wanpela kantri i bruk tupela lain na ol i pait, orait dispela kantri bai i bagarap. . . . Olsem tasol, sapos Satan i rausim Satan, yumi save lain bilong en i bruk pinis.”

Tok bilong Jisas i stret tru! Ol Farisi i tok, sampela long lain bilong ol i bin rausim ol spirit nogut, olsem na Jisas i tok: “Sapos em i tru Belsebul i save helpim mi na mi rausim ol spirit nogut, orait husat i save helpim ol lain bilong yupela, na ol i rausim ol spirit nogut?” I olsem Jisas i laik tok, sapos ol i tok Belsebul i helpim em long rausim spirit nogut, ating Belsebul tasol i helpim ol tu long mekim. Bihain em i tokim ol, olsem: “Sapos Spirit bilong God i helpim mi na mi rausim ol spirit nogut, orait yupela i ken save, kingdom bilong God i kam pinis long yupela.”

Taim Jisas i rausim ol spirit nogut dispela i makim olsem em i gat strong bilong daunim Satan tu. Olsem na Jisas i tok: “Olsem wanem na wanpela man em inap i go insait long haus bilong wanpela strongpela man na kisim ol samting bilong en? Em i mas pasim dispela strongpela man long baklain pastaim. . . . Man i no pren bilong mi, em i save birua long mi. Na man i no helpim mi long bungim ol manmeri, em i save ranim ol i go nabaut.” Tru tumas, ol Farisi ol i birua long Jisas, olsem na ol i lain bilong Satan. Ol i ‘ranim ol Israel i go nabaut’ bambai ol i no ken bihainim Jisas.

Olsem na Jisas i givim strongpela tok long ol Farisi, olsem: “Man i mekim tok nogut long Pikinini Bilong Man, God bai i lusim dispela sin bilong em. Tasol man i mekim tok nogut long Holi Spirit, God bai i no lusim dispela sin bilong em nau na long taim bihain tu.” Spirit holi i as bilong ol mirakel Jisas i wokim, tasol ol saveman bilong lo na ol Farisi i tok, Satan i as bilong ol dispela mirakel. Olsem na ol i mekim bikpela sin tru long spirit holi na God i no inap lusim dispela kain sin. Matyu 12:​22-32; Mak 3:​19-30; Jon 7:5.

▪ Olsem wanem na namba tu raun bilong Jisas long Galili em i narapela kain long namba wan raun bilong em?

▪ Bilong wanem ol wanblut bilong Jisas i laik kisim em i go?

▪ Ol Farisi i tok wanem bilong daunim wok mirakel bilong Jisas? Tasol Jisas i bekim wanem tok long ol?

▪ Ol Farisi i mekim wanem kain sin? Olsem wanem na ol i gat asua long dispela kain sin?