Sapta 1

Ol Tok i Kam long Heven

OLGETA tok bilong Baibel i olsem tok i kam long heven, long wanem Papa bilong yumi long heven em i givim ol dispela tok long yumi bilong lainim yumi. Tasol klostu 2,000 yia bipo, wanpela ensel i save “sanap long pes bilong God,” em i kisim tupela bikpela tok i kam. Nem bilong dispela ensel em Gebriel. Orait, nau yumi ken skelim ol samting i bin kamap taim dispela ensel i kam long graun long dispela tupela taim.

Long yia 3 paslain long taim bilong Krais, long ol liklik maunten bilong Judia klostu liklik long Jerusalem, wanpela pris bilong Jehova em i stap. Nem bilong em Sekaraia. Em wantaim meri bilong em Elisabet, tupela i lapun pinis. Tupela i no gat pikinini. Em taim bilong Sekaraia long mekim wok pris long haus bilong God long Jerusalem. Em i wok i stap na wantu Gebriel i kam sanap long han sut bilong alta bilong wokim smok i gat gutpela smel.

Sekaraia i pret nogut tru. Tasol Gebriel i tok: “Yu no ken pret. God i harim pinis [beten] bilong yu. Meri bilong yu Elisabet bai i karim pikinini man. Na yu mas kolim nem bilong en Jon.” Na Gebriel i tok, Jon “bai i gat biknem long ai bilong Bikpela,” na em bai “redim ol man na ol i stap redi long Bikpela i kam.”

Tasol Sekaraia i no bilipim dispela tok. Em i ting em wantaim meri bilong em i no inap kamapim pikinini, long wanem tupela i lapun pinis. Olsem na Gebriel i tok: “Yu no bin bilipim tok bilong mi, olsem na nau maus bilong yu bai i pas na bai yu no inap toktok, inap long taim dispela olgeta samting i kamap pinis.”

Ol manmeri i wet long Sekaraia na ol i tingting planti, long wanem em i stap longtaim insait long haus lotu. Bihain em i kam ausait na em i no inap toktok long ol. Em i mekim toktok long han tasol. Olsem na ol i save em i bin lukim narapela kain samting.

Bihain, taim bilong Sekaraia i wok long haus lotu i pinis na em i go bek long ples bilong em. Nau ol samting i kamap olsem Gebriel i tok​—Elisabet i kisim bel! Em i hait i stap long haus inap 5-pela mun.

Bihain Gebriel i kam bek gen. Em i toktok wantaim husat? Em i toktok wantaim wanpela yangpela meri singel bilong taun Nasaret, nem bilong em Maria. Em i givim wanem tok long Maria? Yu harim! Gebriel i tok: “God em i belgut tru long yu. Harim. Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. . . . Em bai i stap king bilong ol lain bilong Jekop oltaim. Na wok king bilong en bai i no inap pinis.”

Yumi save Gebriel i amamas long kisim ol dispela tok i kam. Na bihain bai yumi stori moa long Jon na Jisas na bai yumi save, olsem wanem ol dispela tok i kam long heven i bikpela samting. 2 Timoti 3:16; Luk 1:​5-33.

▪ I gat wanem tupela bikpela tok i kam long heven?

▪ Husat i kisim ol dispela tok i kam? Em i givim long husat?

▪ Olsem wanem na i hatwok long ol i bilipim ol dispela tok?