Sapta 13

Ol Traim Bilong Jisas i Lainim Yumi

JISAS i baptais pinis na bihain spirit bilong God i bringim em i go long ples i no gat man long hap bilong Judia. I gat planti samting Jisas i mas tingim, long wanem, taim em i baptais “heven i op” bambai em i ken save long ol samting bilong heven.

Jisas i stap 40 san na 40 nait long dispela ples i no gat man na em i no kisim kaikai. Bihain em i hangre na Satan i kamap long em bilong traim em. Satan i tok: “Sapos i tru yu Pikinini Bilong God, orait yu tok na ol dispela ston i ken tanim na i kamap bret.” God i bin givim strong long Jisas bilong wokim mirakel, tasol Jisas i save i no stret sapos em i mekim wok long dispela strong bilong inapim laik bilong em yet. Olsem na em i sakim Satan.

Tasol Satan i no lusim Jisas. Em i putim narapela traim gen long Jisas. Em i kisim Jisas i go sanap antap long banis bilong haus lotu na tokim em long kalap i go daun na bai ol ensel i kam helpim em. Tasol Jisas i no mekim. Em i kolim tok bilong Baibel na em i tok i no stret em i traim God olsem.

Long namba 3 traim Satan i soim olgeta kingdom bilong dispela graun long Jisas; em i mekim long wanpela rot yumi no save long en​—olsem wanpela mirakel samting. Em i tokim Jisas: “Sapos yu brukim skru na lotu long mi, orait bai mi givim yu dispela olgeta samting.” Tasol Jisas i no mekim pasin i no stret; em i stap gut long God.

Ol dispela traim i painim Jisas ol inap lainim yumi olsem: Satan em i stap tru; em i no olsem tingting nogut o pasin nogut i stap long bel bilong man olsem sampela man i tok. Na ol dispela traim i lainim yumi olsem: Olgeta gavman bilong dispela graun ol i bilong Satan. Sapos ol i no bilong Satan, bai Satan i no inap tok long givim long Krais, a?

Na tingim dispela samting tu: Satan i tok, sapos Jisas i lotu wanpela taim tasol long em, bai em i givim olgeta kingdom bilong dispela graun long Jisas. Ating Satan bai putim wankain traim long yumi. Ating bai em i opim rot bambai yumi inap kisim bikpela mani kago o bikpela nem na namba long dispela graun. Tasol yumi mas bihainim pasin bilong Jisas. Maski wanem wanem kain traim i painim yumi, yumi mas i stap gut long God! Matyu 3:16; 4:​1-11; Mak 1:​12, 13; Luk 4:​1-13.

▪ Taim Jisas i stap 40 de long ples i no gat man, ating em i tingim wanem ol samting?

▪ Satan i traim Jisas olsem wanem?

▪ Ol traim bilong Jisas i lainim yumi long wanem ol samting?