Sapta 24

Ol Wok Jisas i Kam Bilong Mekim

LONG Kaperneam Jisas i mekim bikpela wok long san, na long apinun ol i bringim ol sikman i kam long em na em i oraitim ol. Em i no inap lusim ol man na bai em wanpela i stap.

Long de bihain long moningtaim tru, em i kirap na em wanpela i lusim haus i go long ples i no gat man bambai em inap beten. Tasol kwiktaim Pita wantaim sampela man moa i kirap long painim em.

Ol i painim em pinis na ol i tokim em, “Olgeta manmeri i wok long painim yu.” Ol Kaperneam i laik bai Jisas i stap wantaim ol. Ol i pilim tru ol wok em i bin mekim bilong helpim ol. Tru Jisas i bin oraitim sik bilong ol man, tasol yu ting em i kam bilong mekim dispela wok tasol? Em i tok wanem long wok tru bilong em?

Em i tok: “Mi laik autim tok long ol [arapela taun] tu, long wanem, em dispela wok tasol mi kam bilong mekim.” Ol man i laik pasim em, tasol em i tokim ol: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.”

Yes, namba wan wok bilong Jisas em bilong autim tok bilong Kingdom bilong God, em dispela Kingdom bai stretim bek nem bilong Papa bilong em na stretim olgeta hevi bilong ol man. Tasol bilong kamapim long ples klia olsem God i bin salim em i kam, em i wokim mirakel—em i oraitim sik bilong sampela man. Sampela handet yia bipo, Moses i bin mekim wankain pasin; em i wokim sampela mirakel bambai ol man i ken save em i wokman bilong God.

Jisas i lusim Kaperneam na em i go autim tok long ol narapela taun, na 4-pela disaipel i go wantaim em, em Pita wantaim brata bilong em Andru, na Jon wantaim brata bilong em Jems. Wanpela wik paslain em Jisas i bin singautim ol i go raun autim tok wantaim em. Yu tingim?

Em i raun wantaim ol long hap bilong Galili na wok bilong em i kamap gutpela tru! Stori bilong wok bilong em i go long olgeta hap bilong Siria tu. Planti manmeri bilong Galili na Judia na bilong Jordan long hap i go, ol i bihainim Jisas na ol disaipel bilong em. Mak 1:​35-39; Luk 4:​42, 43; Matyu 4:​23-25; Kisim Bek 4:​1-9, 30, 31.

▪ Jisas i mekim bikpela wok long Kaperneam inap wanpela san, na long de bihain long moningtaim, wanem samting i kamap?

▪ Bilong wanem God i salim Jisas i kam long graun? Ol mirakel em i wokim i bilong mekim wanem?

▪ Taim Jisas i go raun autim tok long hap bilong Galili, husat ol i go wantaim em? Ol man i harim tok bilong Jisas o olsem wanem?