Sapta 97

Ol Wokboi i Wok Long Gaden Wain

JISAS i bin tok, “planti man nau ol i stap namba wan, ol bai i stap las tru. Na planti man nau ol i stap las, ol bai i stap namba wan.” Orait nau em i mekim wanpela tok piksa long dispela samting, olsem: “Kingdom bilong heven em i olsem wanpela man i gat planti graun. Long moningtaim tru em i go bilong kisim ol wokboi long wok long gaden wain bilong en.

“Ol dispela wokboi i orait long kisim wan kina wan kina long dispela de, na bikman i salim ol i go wok long gaden wain bilong en.” Orait long 9 klok samting, na long belo, na long 3 klok long apinun, na long 5 klok samting long apinun, em i kisim sampela man moa na salim ol i go wok long gaden.

Papa bilong gaden wain em i makim God Jehova, na gaden wain i makim lain Israel. Ol wokboi i makim ol man i insait long kontrak bilong Lo; em ol Juda i stap long taim bilong ol aposel. Ol wokboi i wok inap wanpela san olgeta, em bikman i bin pasim tok wantaim ol long pe ol bai kisim, tasol long ol narapela wokboi nogat. Pe em i wan kina long dispela de. Ol narapela wokboi em bikman i bin kisim ol bihain, olsem long 9 klok moningtaim na long belo na long 3 klok apinun na long 5 klok apinun, ol i wok inap olsem 9-pela aua na 6-pela aua na 3-pela aua na wanpela aua tasol.

Ol wokboi i bin wok inap wanpela de olgeta, olsem 12-pela aua, ol i makim ol hetman bilong lotu Juda ol i mekim wok lotu oltaim. Tasol ol disaipel bilong Jisas i no olsem​—inap planti yia ol i bin wok bisnis long kisim pis o mekim ol narapela wok mani. Orait, long yia 29 “papa bilong gaden,” em Jehova, i salim Jisas i kam bilong singautim ol long kamap disaipel. Olsem na ol i kamap “las tru,” olsem ol wokboi i bin kirap wok long 5 klok apinun.

Orait, dispela de bilong wok i pinis long taim Jisas i dai, na nau em i taim bilong givim pe long ol wokboi. “Orait papa bilong gaden wain i tokim bosboi bilong en olsem, ‘Yu singautim ol wokboi na givim pe long ol. Yu stat long ol wokboi i bin kamap bihain tru, na yu givim pe long wan wan bilong ol i go inap long ol wokboi i bin kam paslain.’ ” Olaman! Ol man i bin kam bihain tru, ol i kisim pe pastaim! Orait “ol man i bin stat wok long 5 klok long apinun, ol i kam na ol i kisim wan kina wan kina.” Olsem na ol man i bin kirap wok paslain tru ol i ting ol bai kisim bikpela pe moa. Tasol ol tu i kisim wan kina wan kina tasol. “Ol i lukim mani ol i kisim, na ol i tok kros long papa bilong gaden olsem, ‘Dispela ol man i kamap bihain tru, ol i wok wan aua tasol, na yu givim ol wankain pe olsem pe bilong mipela. Tasol mipela i bin hatwok tru stat long moningtaim tru i kam inap nau, na san i kukim nogut mipela.’ Papa bilong gaden . . . i bekim tok olsem long wanpela bilong ol dispela wokboi, ‘Pren, mi no mekim rong long yu. Ating pastaim mitupela i bin orait long mak bilong wan kina, o nogat? Yu kisim pe bilong yu na yu go. Long laik bilong mi tasol, na mi givim wankain pe long dispela man i kam bihain tru. Em i samting bilong mi. . . . Sapos mi laik mekim gutpela pasin long ol dispela man, orait watpo yu bel nogut?’ ” Orait nau Jisas i tok: “Olsem tasol ol man i bin i stap las tru ol bai i stap namba wan. Na ol man i stap namba wan, ol bai i stap las tru.”

Taim bilong kisim pe em long de Pentikos long yia 33, taim “bosboi,” em Krais Jisas, em i kapsaitim spirit holi i kam daun long ol disaipel. Ol dispela disaipel i olsem ol wokboi i bin kirap wok long 5 klok apinun, olsem “las tru.” Dispela wan kina i no makim presen bilong spirit holi yet. Nogat. Em i makim samting ol i mas mekim wok long en taim ol i stap long graun na bai ol i ken kisim laip i stap oltaim. Em i makim gutpela samting ol i kisim, olsem ol i stap Israel bilong spirit, na God i makim ol long spirit holi bilong autim tok bilong Kingdom bilong God.

Ol man i bin kisim wok pastaim, ol i lukim ol disaipel bilong Jisas i kisim pinis pe na ol i mekim wok long en. Tasol ol dispela man i laik kisim bikpela pe moa​—ol i no laik kisim spirit holi na wok bilong Kingdom tasol. Ol i bel nogut na toktok planti long dispela​—ol i kirap mekim nogut long ol disaipel bilong Jisas, em ol wokboi i “las tru” long kisim wok long “gaden wain.”

Olsem wanem? Dispela tok piksa i gat wanpela truim tasol i bin kamap long taim bilong Jisas? Nogat. Ol pris pasto bilong ol lotu bilong nau ol i kolim Kristen, ol i bin kisim namba na wok insait long lotu, olsem na ol i “namba wan” long kisim wok bilong God, olsem long “gaden wain” bilong em. Ol i ting ol manmeri i wok wantaim Sosaiti Was Taua, em ol i dediket pinis na i mekim wok bilong autim tok bilong God, ol i “las tru” bilong kisim wok bilong God. Tasol dispela lain em ol pris pasto i bel nogut long ol, ol i bin kisim pe olsem “wan kina”​—olsem God i makim ol long spirit holi na ol i kisim wok bilong autim tok bilong Kingdom. Matyu 19:​30–20:16.

▪ Gaden wain i makim wanem samting? Papa bilong gaden wain i makim husat? Ol wokboi i bin wok inap 12-pela aua na ol narapela i bin wok inap wanpela aua ol i makim husat?

▪ Dispela de bilong wok i pinis long wanem taim? Ol i kisim pe long wanem taim?

▪ Dispela pe olsem wan kina em i makim wanem samting?